“Ankho Uhambukiswa Nawa Huku”

ENOKE wakaleleko omanima omanyingi. Tyipondola okutupuiya unene okutyisoka, mahi omulume oo, wakaleleko omanima alamba po 365​—hono omienyo vio vanthu vekuana, kohale ankho upondola okukala womunthu wike vala! Mahi Enoke kakaleleko omuvo omunyingi tyipona ovanthu vamwe pomuvo opo. Kohale ovanthu ankho vakala omanima omanyingi-nyingi tyipona hono. Etyi Enoke atyitwa, Andau o mulume wotete ankho una-le omanima alamba po 600 iya akalako vali omanima 300! Ovanthu vamwe vakaleleko vali omuvo omunyingi tyipona Andau. Namphila Enoke akalako omanima ena 365, mahi ankho una ekongoko ewa, omulume oo kakaleleko vali ehimbwe tyipona ovanthu vamwe valiko. Tyotyili, kakaleleko unene.

Enoke wakalele motyiponga otyinene. Soka Enoke uhateka, otyo asoka kuetyi ovanthu mavakala tyina amevepopila onondaka mbekoyeso mba Huku. Ovanthu ovo ankho vanumana unene. Ovanthu ovo ankho vemuyele unene. Ankho veyele onondaka apopia, tupu veyele Huku watuma Enoke. Ankho kavapondola okuveta Huku ya Enoke Jeova, mahi ankho vapondola okuveta Enoke. Tyafuile Enoke ankho ulipula inkha nthiki imwe mamono vali ombunga yae. Okuti ankho usoka omukai wae novana vae ovahikuena ine omona wae Metusalei ine omutekula wae Lameke? (Gênesis 5:21-23, 25) Okuti otyo ankho onthyulilo?

Enoke omunthu umwe uhuvisa wapopiwa mo Mbimbiliya. Mombimbiliya muna ononthele ononthatu mbupopia katutu konthele ya Enoke. (Gênesis 5:21-24; Hebreus 11:5; Judas 14, 15) Mahi, ono versikulu ombo mbutulekesa okuti omulume oo ankho una ekolelo enene. Okuti ove utekula ombunga yove? Okuti ove uhole okulinga ononkhono mbokukakatela muetyi wii okuti tyaviuka? Inkha ongotyo, upondola okulilongesila unene kekolelo lia Enoke.

Etyi Enoke atyitwa, ovanthu ankho valinga ovivi. Enoke omulume wapandu-vali mombuto ya Andau. Ovanthu ankho vekahi vali popepi nomuenyo uhena nkhali Andau na Eva vavombesa. Otyo ankho ovanthu vakalela-ko omanima omanyingi. Onkhalelo yavo tyilinge movituwa viavo no moupanga wavo na Huku, ankho kaikahi nawa. Ankho oungangala wakaka. Oungangala oo wahimbikila mombuto ya vali ya Andau, etyi Kaim aipaa ondenge yae Abele. Umwe po vana va Kaim wamuene oñgeni oungangala weliyawisa vali unene tyipona etyi tyalingile Kaim! Mombuto ya tatu, ovivi ankho vieliyawisa unene. Ovanthu ankho vahimbika okutumbula enyina lia Jeova, mahi ankho vetupu onthilo nefendelo liotyotyili. Ankho vaundapesa enyina likola lia Huku monkhalelo yapenga, ihalekesa onthilo.​—Gênesis 4:8, 23-26.

Efendelo liomatutu ankho lieliyawisa vali unene momuvo wa Enoke. Etyi Enoke ekula, ankho una okulinga etokolo. Okuti Enoke ankho upondola okulipaka kumwe novanthu vo pononthiki mbae? Ine ankho upondola okuovola Huku yotyotyili, Jeova, walinga eulu nohi? Enoke ankho welilongesila unene konthele ya Abele, waipaelwe mokonda ankho ufenda Jeova monkhalelo imuhambukiswa. Enoke atokola okukoleleya. Genesis 5:22 itupopila okuti: “Enoke watuaileko okueenda na Huku yotyotyili.” Onondaka ombo mbulekesa okuti Enoke ankho una ekolelo liapama mouye wovanthu valinga ovivi. Oe omulume wotete Ombimbiliya ipopia monkhalelo oyo.

Ono versikulu mbumwe mbupopia okuti Enoke watuaileko okueenda na Jeova konyima yetyi atyita omona wae Metusalei. Ngotyo, tuaimbuka okuti Enoke wakala onkhalamutwe yombunga etyi ankho ena omanima 65. Wali nomukai wahapopilwe mo Mbimbiliya, nombalulo yeheiwe nawa “yovana ovakuendye novahikuena.” Inkha tate yovana weenda na Huku tyina atekula ombunga, una okuvetekula monkhalelo Huku ahanda. Enoke ankho utyii okuti Jeova uhanda akakatele momukai wae noukuatyili. (Gênesis 2:24) Tupu Enoke walingile atyiho evila opo alongese ovana vae konthele ya Jeova Huku. Ouwa patyi watundililako?

Ombimbiliya kaipopi unene konthele yotyo. Tupu kaipopi ekolelo liomona wa Enoke, Metusalei, omunthu Ombimbiliya ipopia okuti wakaleleko vali ehimbwe alo konthyulilo yenima Ombila Onene yahimbika. Mahi Metusalei wakalele tate ya Lameke. Lameke na Enoke vakaleleko momuvo wike mokueenda kuomanima 100. Iya Lameke etyi ekula akala nekolelo liapama mu Huku. Jeova wapopilile Lameke opo aule konthele ya Noe, omona wa Lameke iya eulo olio alifuisuapo konyima Yombila Onene. Nga Enoke, Noe nae wapopiwa okuti waendele na Huku. Noe kakalele momuvo wike na Enoke. Mahi Enoke wasapo ongeleka ongwa. Noe welilongesilile unene ku tate yae Lameke, noku tate-mbuale yae Metusalei ine oku Jalede tate ya Enoke. Jalede wankhia etyi Noe ankho ena omanima 366.​—Gênesis 5:25-29; 9:1.

Enoke welikalela unene na Andau. Namphila ankho Andau ehena onkhali, mahi walinga onkhali ku Jeova iya aetela ovana vae oumphuki no nonkhumbi. Enoke, namphila ankho omukuankhali, mahi waendele na Huku iya wasapo ongeleka yekolelo kovana vae. Andau wankhia etyi Enoke ena omanima ena 308. Okuti ombunga ya Andau yañgoñgene mokonda yetyi ankhia? Onthue katutyii. Nongotyo, Enoke “watuaileko okuenda na Huku yotyotyili.”​—Gênesis 5:24.

Inkha ove utekula ombunga, tala oityi ove upondola okulilongesila kekolelo lia Enoke. Tyakolela unene okutekula ombunga, mahi tyakolela vali okukuatesako ombunga okukala noupanga omuwa na Huku. (1 Timóteo 5:8) Ove upondola okufuisapo otyilinga otyo, ha muetyi vala upopia mahi no muevi ulinga. Inkha ove uholovona okueenda na Huku ngetyi Enoke alingile, oyeke ovitumino via Huku vihongolele omuenyo wove, tupu noove mosila ongeleka ongwa ombunga yove maihetekela.

Enoke ankho ulitehela okuti wike mokonda ankho ukahi pokati kovanthu vehena ekolelo pomuvo opo. Mahi okuti Huku yae, Jeova, ankho umueete? Yoo ankho umueete. Omuvo wokupopia nomuumbili wae wekolelo wehikapo. Huku watumine Enoke onondaka mbeyovo liovanthu vo pononthiki mbae. Huku watuma Enoke opo akapopie eulo liotete liapopiwa mo Mbimbiliya. Otyo onthue tutyii mokonda kohale Juda, ondenge ya Jesus watuminwe na Huku opo ahoneke konthele ya Enoke.a

Olipi eulo lia Enoke? Eulo liatyo liati: “Jeova weya nomambamba ae ono sandu, opo akoyese ovanthu aveho, nokulekesa okuti onondingavivi ambuho vena onkhali yovipuka aviho valinga monkhalelo ombi, novipuka vietesa omatuenyonga ovanthu onondingavivi vapopia konthele yae.” (Judas 14, 15) Otyipuka tyotete ove upondola okunoñgonoka, okuti Enoke wapopia otyipuka otyo ngatyina tyamonekele-ale, ngatyina Huku afwisapo-ale eulo olio. Omaulo Ombimbiliya alandulako, nao ongotyo aenda. Otyipuka tyakolela otyetyi: Omuuli ankho ukahi nokupopia otyipuka tyimwe ayumba onthumbi, iya etyipopi ngatyina tyamonekale!​—Isaías 46:10.

Oñgeni Enoke ankho apondola okutavela konondaka ombo, namphila ovanthu aveho kavetavelele? Tala oñgeni Enoke apopia, movikando vikuana waundapesa ondaka “onondingavivi,” pala okuhololola ovanthu, novipuka ovivi valinga iya nonkhalelo vevilinga. Eulo ankho lilondola ovanthu aveho okuti valinga ovivi tunde etyi Andau atewa mo Endene iya vasoka vala ovivi omuvo auho. Ouye ankho tyipondola ukahi konthyulilo yovivi etyi Jeova eya “nomambamba ae ono sandu,” onoandyu mbepondolo ankho mambueta ehanyauno. Enoke tyakola omutima apopi elondolo liatunda ku Huku iya etyilingi aike! Tyafuile omukuendye Lameke, otyo atala tate-mbuale yae wakola omutima. Inkha ongotyo, tupondola okunoñgonoka omokonda yatyi.

Ekolelo lia Enoke lituavela ondundo yokutala ovanthu tukala navo ngetyi Huku evetala. Onondaka mbekoyeso Enoke apopile nomutima wakola nkhele kambunefwisue-po; mbupopia ouye wo hono ngetyi ankho mbupopia ouye wo pononthiki mba Enoke. Ngetyi tyipopia elondolo lia Enoke, Jeova waeta Ombila Onene opo ahanyeko ovanthu onondingavivi pono nthiki mba Noe. Mahi ehanyauno olio lielikuata nehanyauno enene maliya apa katutu. (Mateus 24:38, 39; 2 Pedro 2:4-6) Hono, ngo pomuvo pana, Huku makakatula onoandyu mbae opo mbuete ekoyeso mokuhayaunako ovanthu onondingavivi. Kese umwe puonthue wesukisa okuhalimbwa elondolo lia Enoke nokulipopila vakuavo. Ombunga yetu nomapanga vena okukala konthele yetu. Pamwe onthue tupondola okulitehelela okuti tukahi atuike. Mahi Jeova nalumwe asilepo Enoke iya na hono nalumwe masipo ovaumbili vae vekolelo!

Oipi onthyulilo ya Enoke? Ononkhia mbae ehuviso enene tyipona omuenyo wae. Omukanda wa Genesis upopia okuti: “Enoke watuaileko okueenda na Huku yotyotyili. Konyima kamonekele vali, mokonda Huku wemutyindapo.” (Gênesis 5:24) Omonkhalelo patyi Huku atyindapo Enoke? Apostolu Paulu wahangununa okuti: “Mokonda yekolelo, Enoke watyinduapo, opo ahamone ononkhia iya kavasilwe vali na kumwe, mokonda Huku wemutyindapo, mokonda etyi nkhele ehenepolueko, wakalele noumbangi wokuti wahambukisilue nawa Huku.” (Hebreus 11:5) Onondaka mba Paulu mbokuati “watyinduapo opo ahamone ononkhia” mbulekesa tyi? Onombimbiliya mbumwe mbupitiya onondaka ombo okuti Enoke wantyinduapo atualwa keulu. Mahi otyo omatutu. Ombimbiliya ilekesa okuti Jesus Kristu oe omunthu wotete watutiliswa opo ende keulu.​—João 3:13.

Oityi tyihangununa okuti Enoke “watyinduapo” opo “ahamone ononkhia”? Jeova tyafuile watyindapo Enoke opo ahankhie monkhalelo ombi. Mahi tete, Enoke watambula “oumbangi wokuti wahambukisilue nawa Huku.” Ñgeni ngotyo? Etyi ehenenkhie, Enoke wamuene emonekelo liatunda ku Huku, liemulekesa ohi ikahi ngomphangu yombembwa. Nemonekelo lialekesa okuti wapandua na Huku, alangalapo alala iya konyima ankhi. Etyi apostolu Paulu apopia konthele ya Enoke novalume vamwe, novakai vali nekolelo, tupu apopi okuti: “Aveho ovo vankhia tyina ekolelo.” (Hebreus 11:13) Konyima yotyo, onondyale mbae mbaovolele olutu lwae, mahi “aveheluvasi” mokonda Jeova weluholeka, opo ovanthu veheluvase opo veluundapese mefendelo liomatutu.b

Mokonda pahe tuanoñgonoka nawa etyi tyapopia o Vihonekwa, tupondola okusoka oñgeni omuenyo wae wehika konthyulilo. Okusoka kuotyo, tyituhinangesa okuti otyo otyipuka tyamonekele. Enoke ankho ukahi nokukahateka tyanumana tupu tyaponwa. Onondyale mbae ankho mbukahi nokumulandula tyanumana mokonda yo nondaka apopia mbekoyeso. Enoke avasi omphangu apa ankho apondola okupululukwa, mahi ankho ketyii okuti mahupu konondyale mbae. Kwe, ononkhia ankho mbukahi unene popepi. Puetyi ankho ekahi nokupululukwa-po elikuambela ku Huku yae. Etyi akala pomphangu opo liwa-liwa elitehelela nawa. Amono emonekelo limwe lialinga ngatyina liemutuala kokule.

Soka Enoke wamona emonekelo limwe, lialekesa ouye welikalela unene nou ankho ei. Ankho tyafuile omphangu ina ongwa ikahi ngo tyikunino tyo Endene, mahi ankho mutupu onoandyu mbutualako okuyunga ovanthu. Omulume nomukai vena ekongoko nononkhono ononyingi. Ankho vena ombembwa. Momphangu omo ankho mutupu oundyale nokumoneswa ononkhumbi mokonda yokufenda Huku ngetyi ankho Enoke ei. Enoke waimbukile okuti Jeova, wemukuatesako, umuhole iya una oluembia nae. Ankho ulitehelela okuti omphangu ina ikahi nawa iya wiisoka ngatyina eumbo liae. Namphila ombembwa ankho ili kokule nae, Enoke waika omaiho ae iya aliwa notumphoki alala.

Alo hono opo ekahi, tyilele kononkhia, okukevelela noumphua-lundo okutuliswa na Jeova Huku! Ngetyi Jesus apopile komanima okualamba, wapopia okuti nthiki imwe ovanthu aveho vekahi mehinangelo lia Huku mavekeiva ondaka ya Kristu iya avatundumo iya avakamona omphangu imwe yombembwa mouye omupe.​—João 5:28, 29.

Okuti ove uhanda okukakalamo? Soka tyina muamekelivasa na Enoke. Soka kovipuka vihuvisa ove mokelilongesila kwe! Oe upondola okuketupopila ovipuka viaendele mononthiki mbahulililako mbomuenyo wae. Mahi otyo, otyipuka onthue tuesukisa okunoñgonoka konthele yae pehepano. Etyi amana okupopia konthele ya Enoke, apostolu Paulu ahoneka okuti: “Tyihena ekolelo tyipuiya okuhambukiswa nawa Huku.” (Hebreus 11:⁠6) Olio ehunga limwe enene lio mokonda yatyi onthue tuna okuhetekela ekolelo lia Enoke!