Huku Wemuihana Okuti “Onkhai-hamba”

SARA ukahi nokuundapa, akatuka, otyo atala koutakelo. Ovaundapi vae vahambukwa tyina evehongolela. Sara nae ukahi nokuundapa. Hinangela Sara ukahi nokuliseketa otyo elisula komankhanya. Tyafwa nae wakuatesileko okutunga ekaka omu vakala. Ekaka liavo lialingwa nomainya ovikhombo, ankho liapwa mokonda yomutenya, otyo ankho tyihinangelesa Sara omanima eñga-pi vakala mohika. Ekumbi lietaka, pahe akuhimbika okuwiwila. Ngwe wamona Abraiaua etyi apita komuhuka, pahe otyo alavesa oku Abraiau aile nako. Tyina amona omulume wae ulauka omphunda imonekela ngo oko, ngwe ahimbika okuliyolela.

Palambale omanima ekwi tunde etyi vayauka Ondongi Eufrates, avai no ko Kanaa. Mokueenda kuomuvo oo, Sara wakuatesako omulume wae moungendi oo valinga, mokonda ankho utyii okuti Jeova una otyilinga tyimwe otyinene emuavela, tyokukutula omona makala elongo enene. Oñgeni Sara ankho mafuisipo otyilinga tyae tyina ankho ahamono ovana iya ankho una-le omanima 75? Tyafwa Sara welipulile okuti: ‘Oñgeni omulao wa Jeova maufuiswapo angwe ame mukai wa Abraiau himono ovana?’ Tyipondola ongotyo umwe elitehelele.

Nonthue pamwe tupondola okulipula onalupi omilao via Huku mavifuisuapo. Katyapepukile, haunene inkha tukahi nokukevelela okufuiswa-po kuomulao umwe tuhole unene. Oityi tupondola okulilongesila kekolelo liomukai oo?

Ombunga aiho ya Abraiau ankho yatunda pahe ko Egitu. (Gênesis 13:1-4) Ankho vehikila ko nomphunda mbo Betele, ine ko Luz ngetyi ova Kanaa vembuihana. Oko, Sara ankho upondola okutala onthele imwe Yotyilongo Tyalaelwe. Ankho muna omapunda-umbo ova Kanaa, no nondyila mbuenda kovilongo viokokule-kule. Kotyilongo ankho veli katyelekwa no omu Sara atyitilwa. Sara watyitilwa ko Ur, epunda-umbo limwe likala ko Mesopotamia, apa ankho veli paendwa ono kilometru 1.900. Sara ankho wasapo epunda-umbo lina onopalasa nomaande omawa, tupu wasapo ombunga yae neumbo liae nomapanga ae! Onthue katutyii nawa inkha Sara welivelele etyi atala okuti motyilongo vakala katyelifuile netyi atyitilwa.

Tala oityi apostolu Paulu atumwa okuhoneka na Huku konyima yomanima 2.000. Puetyi ena nokupopia ekolelo lia Sara na Abraiau wati: “Inkha vatuaileko nokusoka unene kotyilongo vatunda, ñgeno vakala nomphitilo yokukondoka.” (Hebreus 11:8, 11, 15) Tyilinge Sara tyilinge Abraiau, ankho kavakalela vala okusoka kovipuka vasapo. Inkha vasokele kovipuka vasa konyima, ñgeno vatokolele okukondoka. Mahi, inkha vakondokele ko Ur, ñgeno vapumbilwe otyilinga Jeova eveavelele. Vakala ongeleka imwe ongwa pala ovanthu ovanyingi.

Sara ankho katale konyima, ankho utala komutwe. Ngotyo, atualako nokukuatesako omulume wae moungendi wavo, otyo emukuatesako okutungulula omakaka na vailukile ponomphangu ononkhuavo. Sara watualako okukoleleya namphila ankho pamoneka ovitateka ovinyingi. Jeova apopila vali Abraiau omulao emulingilile, mahi no ngotyo ahatumbula-po Sara!​—Gênesis 13:14-17; 15:5-7.

Pahe, Sara asoko okupopila Abraiau etyi ankho eli nokusoka. Hinangela oñgeni Sara akala etyi emupopila okuti: “Pahe, mbambavo tehelela! Jeova wanthyika opo nahamone ovana.” Konyima emupopila alale nomupika wae womuhikuena omu Egitu utiwa Agar, opo amone omona. Utyivila okusoka ku Sara oñgeni tyemuihamene etyi apopila onondaka ombo omulume wae? Etyi aita, kuonthue ngoti tyapenga, mahi pononthiki opo, omulume ankho upondola okuovola omukuavo opo amone omphinga.b Namphila ankho katyapepukile, mahi ngwe etyilingi. Oñgeni Abraiau akala? Mombimbiliya tutanga-mo okuti, ngwe “atehelela etyi [Sara] emupopila.”​—Gênesis 16:1-3.

Okuti Ombimbiliya ipopia okuti o Jeova walunda Sara okukapopia nomulume wae? Au. Omu etyilingila ha Huku wemutuma okutyilinga. Mokonda wasoka okuti o Huku ukahi nokumumonesa ononkhumbi. Ankho kasokele okuti Huku upondola okumukuatesako. Etyi Sara alinga, wasoka okuti matyitetulula otyitateka tyae. Mahi no ngotyo, muetyi alinga walekesa okuti utupu elungavi. Mouye uno mueyula ovanthu vapaka omasuka-suka avo pomphangu yotete, okuti etyi Sara alinga katyihuvisa? Inkha tupaka omasuka a Huku komutwe oetu, matuhetekela ekolelo lia Sara.

Kapakalele ehimbwe, Agar akala omulemi. Tyafwa mokonda Agar wasoka okuti etyi akala omulemi wakolela vali ku Sara, ngwe ahimbika okumukuela. Otyo atyimuihama unene! Sara apopila Abraiau otyitateka tyae. Abraiau emupopila okuti, mulinga ngetyi wasoka. Sara akundisa Agar. Agar akutula Ismayeli , omanima otyo enda no komutwe. (Gênesis 16:4-9, 16) Pahe, Ombimbiliya aipopi onondaka mba Jeova. Sara ankho una omanima 89, omulume wae ankho una 99. Vapopilwa onondaka mbumwe onongwa!

Jeova apopila vali epanga liae Abraiau okuti, ovana vae maveliyawisa avakala ovanyingi. Tupu apilulula enyina lia Abraiau. Aloo opo ankho wiiwe avala okuti Abrau. Mahi Jeova emuluku okuti Abraiau. Enyina olio lihangununa okuti, “He yovanthu ovanyingi.” Pahe, Jeova apopi otyilinga Sara makala natyo. Apilulula enyina lia Sarai, tyafwa lihangununa okuti “Onondyaya,” alikala Sara enyina eli atuho twii. Enyina Sara lihangununa-tyi? Lihangununa okuti: “Onkhai-hamba”! Jeova wapopia omokonda yatyi emulukila enyina olio, wati: “Ame mandyimupe ononkhano onongwa, tupu menyina liae mandyikuavela omona womulume. Iya mandyimupe ononkhano onongwa, oe makakala omalongo. Mwe mamukatunda onohamba mbomalongo.”​—Gênesis 17:5, 15, 16.

Omphango Jeova alingile yokuetako ombuto maikaetela ononkhano onongwa ovanthu aveho, maifuiswapo momona wa Sara! Enyina Jeova aluka omona wa Sara Isake lihangununa okuti, “Tyiyolesa.” Etyi Abraiau anoñgonoka okuti Jeova makanena nawa Sara, mamono omona, Abraiau “Elipetamena-po, ahimbika okuyola.” (Gênesis 17:17) Ankho tyemuhuvisa, ahambukwa unene. (Romanos 4:19, 20) Iya oñgeni Sara akala?

Kapakalele-ale ehimbwe, ovalume vamwe vetatu aveya mekaka lia Abraiau. Ankho okomeliya, mahi ovalinepi ava avevetambula nawa. Abraiau apopila Sara okuti: “Kuluminya! Kaete ononeka ononthatu mbohinde yanyetuka nawa, olingi onombolo.” Kohale okutambula nawa ovaenda ankho katyapepukile. Abraiau kapopilile vala omukai wae ngae ulinga vala ovilinga aike. Ngwe waheteka aipaa onthane, akataindya vali okulia novikunwa. (Gênesis 18:1-8) “Ovalume” vana ankho onoandyu mbatumwa na Jeova! Apostolu Paulu tyafwa ovo ankho asoka etyi ahoneka okuti: “Muhalimbueiko okutambula nawa ovaenda, mokonda moluotyo vamwe tyihetyii, vatambulile onoandyu.” (Hebreus 13:⁠2) Okuti nove upondola okuhetekela ongeleka ongwa ya Abraiau na Sara?

Etyi imwe ponoandyu yapopila vali Abraiau omulao wa Huku wokuti Sara mamono omona, ankho Sara kepo, uli mokati otyo atehelela vala. Etyi oandyu yapopia okuti Sara mamono omono, ku Sara ngoti ankho oandyu inyana vala mokonda ngwe ankho wakulupale. Sara ahimbika okuliyolela, apopi okuti: “Pahe ñga tyina ame nakulupale, iya ombuale yange yakulupale, okuti tyotyili mandyikala umwe nehambu olio?” Oandyu aimupopila okuti: “Okuti pena otyipuka tyimwe Jeova ehevili okulinga?” Sara atili owoma, ahimbika okuliamena, ngetyi ovanthu valinga. Sara ati: “Ame hayolele!” Oandyu aimupopila okuti: “Wayola umwe.”​—Gênesis 18:9-15 18:9-15.

Okuti etyi Sara ayola tyilekesa okuti kayumbile onthumbi mu Huku? Au. Ombimbiliya yati: “Tupu, mokonda yekolelo, Sara namphila ankho akulupa-le, mahi wapewa epondolo opo amone omona, mokonda kwe una wemulaa omukuatyili.” (Hebreus 11:11) Sara ankho wii Jeova. Ankho utyii okuti Jeova upondola okufuisapo kese mulao alinga. Olie puonthue wehesukisile ekolelo ngo olio? Matulingi nawa inkha tunoñgonoka nawa Hekulu Yombimbiliya. Inkha tulinga ngotyo, matunoñgonoka nawa okuti, Sara kapengesile etyi ayumba onthumbi mu Huku. Tyotyili Jeova omukuatyili, apeho ufuisapo omilao aviho alinga. Pamwe utyilinga monkhalelo imwe ituhuvisa atunkhi okuyola!

Puetyi Sara atuula omanima 90, amono otyipuka tyimwe ehenemone momuenyo wae. Akutula omona, omulume wae pahe ankho una omanima 100! Abraiau emuluku okuti Isake, ine “Tyiyolesa,” ngetyi Huku emupopilile. Pahe, hinangela Sara unkhia okuyola otyo apopia okuti: “Huku wandyolesa, kese munthu utyiiva mandyolo.” (Gênesis 21:⁠6) Ehuviso olio otyiawa tya Jeova, tyemuhambukiswa alo anyima. Mahi, otyo tyimuetela otyilinga tyimwe otyinene.

Puetyi Isake atuula omanima 5, ombunga ya Abraiau aikala notyitateka tyimwe otyinene. Ankho ha atyiho tyikahi nokuenda nawa. Mombimbiliya tutanga-mo okuti, Sara “amono” otyituwa tyimwe otyivi. Ismayeli omona wa Agar una omanima 19 ahimbika okulinga omukuele Isake. Ankho kekahi vala nokunyana. Konyima apostolu Paulu wahoneka konthele yotyituwa otyo tya Ismayeli. Sara etyimono okuti omona wae ukahi nokulewa. Mahi ankho ha-kuleva vala, mokonda ankho tyipondola okupaka omuenyo womona wae motyiponga. Sara ankho utyii okuti Isake oe mafuisipo omulao wa Jeova. Ngotyo akapopia na Abraiau. Sara aiti ku Abraiau inkha upondola okutaata Agar na Ismayeli.​—Gênesis 21:8-10; Gálatas 4:22, 23, 29.

Oñgeni Abraiau emukumbulula? Ombimbiliya yati: “Etyi apopilwa konthele yomona wae Abraiau tyemuihama unene.” Mokonda Abraiau ankho uhole unene Ismayeli, tyemuihamene unene komutima. Mahi, Jeova wetyimona nawa etyi tyaendapo. Ombimbiliya yati: “Pahe Huku apopila Abraiau okuti: ‘Wahanumane mokonda yetyi Sara ekupopila konthele yomona wove nomupika wove. Mutehelela, mokonda una maihanwa okuti ombuto yove matuku mu Isake.’ ” Jeova apopila Abraiau okuti matekula Agar nomona wae. Abraiau etavela.​—Gênesis 21:11-14.

Sara oe mukai wotyotyili wa Abraiau. Ngwe kapopilile omulume wae etyi ahanda okutehelela. Etyi amona otyitateka ombunga yae maikala natyo, etyipopila omulume wae. Omu apopila katyilekesa okuti ankho utupu onthilo nomulume wae. Apostolu Petulu, nae ankho wanepa, konyima wapopia okuti Sara ongeleka ongwa mokonda wakala nonthilo nomulume wae. (1 Coríntios 9:5; 1 Pedro 3:5, 6) Tyotyili, inkha Sara watile filuu ahapopi natyike, opo ñgeno kalekesile onthilo ku Abraiau, mokonda otyitateka otyo ankho tyakutikinya ombunga yatyo aiho. Sara wapopia umwe etyi tyaviuka.

Ovakai ovanyingi vanepwa vehole unene ongeleka ya Sara. Velilongesa ku Sara okuti, tyina vatomphola novalume vavo, vesukisa okutyilinga monkhalelo ilekesa okuti vena onthilo navo. Vamwe vahanda ñgeno Jeova nae ulipaka potyitateka vena ngetyi tyaendele na Sara. No ngotyo, velilongesa okukala nekolelo, nohole noumphua-lundo nga Sara.

Namphila Jeova aihana Sara okuti “Onkhai-hamba,” mahi Sara ankho kakevelela okutekulwa ngo nkhai-hamba. Etyi Sara anyima nomanima 127, Abraiau “ahimbika okulila Sara nokuliyavela.”c (Gênesis 23:1, 2) Tyotyili Abraiau ankho uivaluka “Onkhai-hamba” yae. Jeova Huku nae wiivaluka omukai oo omukuatyili iya mekemututilisa opo akale momphangu yombembwa. Vana vahetekela ekolelo lia Sara, navo mavakapewa ononkhano onongwa.​—João 5:28, 29.