Omokonda Yatyi Ovanthu Vapopila Okuti Huku Omukalavi?

OKUTI wahuva etyi wamona epulo likahi kondye yomukanda ou? Ovanthu vamwe vahuva, mahi ovanyingi velipula inkha Huku omukalavi, ine vapopia umwe okuti Huku omukalavi. Omokonda yatyi?

Vamwe vahupile kovinimawe nomitetanena, vapula okuti: “Omokonda yatyi Huku ayekela ovipuka ovio vimoneke? Okuti kesukile novanthu? Ine omukalavi?”

Ovakuavo valinga epulo olio tyina vatanga Ombimbiliya. Tyina vamatange ehipululo lipopia konthele ya Noe Nombila Onene, velipula okuti, ‘Omokonda yatyi Huku wokuna oluembia aipaele ovanthu ovo aveho? Okuti omukalavi?’

Okuti noove pamwe ulilinga omapulo oo? Ine hamwe kutyivili okukumbulula vana vapula inkha Huku omukalavi? Inkha ongotyo, tala oñgeni ekumbululo liepulo eli lipondola okukukuatesako.

Tuyele oukalavi mokonda tutyivila okunoñgonoka etyi tyaviuka netyi tyahaviukile. Katukahi ngovinyama. Omutungi wetu wetulinga “otyifuika tyae.” (Gênesis 1:27) Otyo tyilekesa tyi? Tyilekesa okuti Huku wetulinga nepondolo liokuhetekela ovituwa viae, novitumino viae, opo tutyivile okunoñgonoka etyi tyaviuka netyi tyahaviukile. Pahe soka: Inkha o Huku wetulinga nepondolo liokunoñgonoka etyi tyaviuka netyi tyahaviukile, iya tuyele oukalavi, otyo katyilekesa okuti na Huku uyele oukalavi?

Ombimbiliya tupu ipopia okuti otyo otyili, mokonda Huku utupopila okuti: “Onondyila mbange mbaya vali peulu tyipona onondyila mbenyi, nomalusoke ange apona omulusoke enyi.” (Isaías 55:9) Mahi, inkha tupopia okuti Huku omukalavi, katukahi nokupopia okuti onondyila mbetu mbaya vali peulu tyipona mbae? Tyotyili otyiwa nkhele okuovola okumunoñgonoka vali nawa tyipona okusoka ngotyo. Hamwe tupondola okupula, inkha Huku hamukalavi omokonda yatyi pamwe alingila ovipuka vimukalesa ngoti omukalavi. Pala okutukuatesako, tete tutalei oityi ondaka oyo “omukalavi” tyilityili ihangununa.

Tyina tupopia okuti omunthu umwe omukalavi, tukahi nokupopia okuti una omalusoke omavi. Omunthu omukalavi oyouna uhambukilwa okutala ononkhumbi mbavakuavo ine kesuku nambo. Mongeleka, he uveta omona wae mokonda vala utyihole, omukalavi. Mahi, he uveta omona wae opo emulongese ine okumuyakulila, ondalawa. Mokonda pamwe katutyii oityi tyihindila ovanthu okulinga otyipuka tyimwe, tyapepuka okupopia okuti vetyilinga mokonda ovakalavi. Hamwe noove wapopilueale ngotyo.

Tutalei omahunga evali alekesa omokonda yatyi vamwe vasokela okuti Huku omukalavi, ovinimawe nomitetanena tumona hono, nomahipululo Ombimbiliya apopia oñgeni Huku akoyesile ovanthu. Okuti tyilityili Huku omukalavi?