Oityi Tulilongesila Koviila

OMANIMA 3.000 konyima, omukuaukulu Job wanoñgonoka okuti tupondola okulilongesila koviila konthele yovilinga via Huku. Onkhalelo vikahi itukuatesako okuava onongeleka no nonthengele-popia. Mombimbiliya, muna ononthele ononyingi mbupopia konthele yovilia mbutulongesa ovipuka oviwa konthele yomuenyo wetu, noupanga wetu na Huku. Matutale onongeleka mbumwe.

Ovanthu ankho vakala mo Jerusalei vatyiliya okutala ovityiyu viovimphiapia viatungilwa momalukaka onondyuo. Ovityiyu vimwe ankho vili Mondyuo ya Huku yatungwa na Salomau. Tupu, ovimphiapia ankho vitungila ovityiyu mondyuo ya Huku kese nima, ankho vivasa omphangu ikahi nawa omu ankho omailona avio apondola okukala tyapama.

Omuhoneki wo Salmu 84, umwe povana va Koraa ankho undapa mondyuo ya Huku osimanu ike monohanyi epandu, wamuene ovityiyu ovio mondyuo ya Huku. Ankho uhambukwa unene okutala ovimphiapia vikala omuvo auho mondyuo ya Jeova iya apopi okuti: “Ondyuo yove ongwa unene, Jeova ngombo yovita! Neivaluka unene ondyuo yove, nakala tyihena ononkhono mokonda nahanda okukala pepata liove. Alo umwe oviila vivasa omphangu mondyuo yove iya ovimphiapia vivasa ovityiyu opo vitekule omailona avio kombanda yondyuo yove, Jeova ngombo yovita, Hamba yange, Huku yange!” (Salmo 84:1-3) Okuti onthue kumwe novana vetu, tupanda okukala kumwe novanthu va Huku?—Salmo 26:8, 12.

“Omuuli Jeremia wahoneka okuti: “Ekaluhane lii omuvo walio.” Tyafuile Jeremia ankho walinga otyiho nonkhalelo omaila oo alinga oungendi maakala, mokonda ankho avasiwa mononthele ambuho mbo Tyilongo Tyalaelwe. Pondyovo, omakaluhane ena 300.000 alinga oungendi okutunda mo Afrika alo koutundilo wo Europa aekehika Mevota lio Jordão. Ovanthu vokuovolola vapopia okuti omaiila oo ei nawa omuvo wokukondoka oku atundile. Tyelifwa noviila ovikuavo vilinga oungendi, omakaluhane nao “atualako okutala nawa omuvo wokukondoka.”—Jeremias 8:7.

“Omukanda utiwa (Atlas Collins da Migração das Aves) wapopia okuti: “Onkhalelo oviila vilinga oungendi, ihuvisa unene.” Jeova Huku waavela oviila ounongo uvihongolela tyina vilinga oungendi, mahi waavela ovanthu ounongo wokunoñgonoka nawa omivo. (Lucas 12:54-56) Tyelikalela nounongo wekaluhane, enoñgonoko lia Huku otyipuka tyikuatesako ovanthu okunoñgonoka etyi tyihangununa ovipuka vikahi nokumoneka momuvo tukahi. Ova Isilayeli mono nthiki mba Jeremia ankho kavesukile na kese nyingilikilo. Huku wahangununa otyitateka otyo, etyi apopia okuti: “Vaanya ondaka ya Jeova, ounongo patyi vena?”—Jeremias 8:9.

Onthue hono tuanoñgonoka nawa etyiOmbimbiliya ipopia okuti “ononthiki mbahulilila.” (2 Timóteo 3:1-5) Okuti ove uhetekela ekaluhane iya utala nawa ‘omivo’?

Onkhombe yapopiwa ovikando ovinyingi mo Mbimbiliya iya ankho iiwe nawa motyilongo Tyalaelwe mokonda ankho yakaka unene. Ombimbiliya yati: Onkhombe ityivila “okuovola okulia” otyo ili potyiyu tyayo keulu liomuti, aiyawisako vali okuti: “Omaiho ayo amona otyipuka tyikahi kokule unene.” (Jó 39:27-29) Omaiho onkhombe atala kokule unene iya omikanda vimwe viapopia okuti onkhombe ityivila okutala o otyindimba tyili kokule okilometulu ike naapa ikahi.

Ngetyi onkhombe ipondola “okutala kokule,” Jeova nae utyivila okutala ovipuka mavikamoneka komutwe. Jeova wapopia okuti: “Tunde konthyimbi upopia onthyulilo iya tunde kohale upopia ovipuka nkhele vihenelingwe.” (Isaías 46:10) Pokati konondonga mba Jeova, onthue tupondola okupola ouwa kounongo nekuateso liae.—Isaías 48:17, 18.

Ombimbiliya tupu yeeleka vana vayumba onthumbi mu Huku ngatyina ononkhombe etyi yatyi: “Vana vakevelela ku Jeova mavakakala no nonkhono. Mavakanthanana ngononkhombe.” (Isaías 40:31) Tyina onkhombe inthanana, ikuatesuako nokamphepo katokota katunda momavava. Tyina inthanana omapapatelo ayo atandavela iya otyo tyiikuatesako okukala ehimbwe meulu. Mahi onkhombe kaitei kuotyo opo inthanane iya ayeende ovikambo ovile. Tupu, vana vayumba onthumbi mu Jeova vapondola okukala nonthumbi yokuti meveavela “ononkhono mbavilapo.”—2 Coríntios 4:7, 8.

Etyi kuakamba osimanu ike opo aipawe, Jesus watala epundaumbo liova Judeu apopi okuti: “Jerusalei, Jerusalei, muiipai wovauli, wiipaa nomamanya vana vatumuamo. Ovikando viñgapi nahandele okuongiya ovana venyi ngetyi otyuufwa tyiongiya ovipiyona momavava atyo! Mahi onwe kamuetavelele.”—Mateus 23:37.

Otyipuka tyimwe tyihuvisa koviila, ehando vina liokuyakulila omailona avio. Oviila viyumbilila pohi ngetyi oviufwa, vina okukala tyalunguka opo viahaliwe novinyama. Inkha otyiufwa tyitala okuti ovipiyona viavomba, tyipopila peulu opo tyiviihane iya tyina ovipiyona viametyimono, avihatekela mombuelo yomavava otyiina. Tyina nkhele otyipiyona otyitutu, tyipondola okuvasa epameko tyina omutenya watokota na tyina ombila iloka. Tyelifwa notyo, Jesus ankho uhanda okukuatesako ovanthu vomo Jerusalei opo vakale noupanga omuwa na Huku nokuveyakulila. Hono, Jesus tupu utukonga opo tufuene kwe, etukuateseko momuenyo wetu ononthiki ambuho.—Mateus 11:28, 29.

Tyotyili, onthue tupondola okulilongesila unene koviila. Tyina ove utala etyi oviila vilinga, mohinangela etyi ovihonekwa vipopia konthele yonongeleka nononthele-popia. Ovimphiapia ovinyingi vitukuatesako okupanda efendelo lia Jeova. Ovanyingi vatala Huku nekevelelo liokuti meveavela ounongo ngetyi aavela ounongo onkhombe. Opo uvase otyili konthele yolumono lwa Huku, una okufuena ku Jesus opo ekuyakulile, ngetyi otyuufwa tyilinga opo tyiyakulile ovipiyona viatyo. Tupu ekaluhane lituhinagelesa okuti tuesukisa okukala tyalunguka kovipuka vikahi nokumoneka momuvo wetu.