2 Itukuatesako Okutetulula Ovitateka

Rosie wati: “Ndyikala unene notyiho iya ovikando ovinyingi ovitateka vikala vala momutwe wange.” Otestu patyi yemukuatesileko? Imwe o ya Mateus 6:34 yati: “Muhakalei notyiho nonthiki yomuhuka, mokonda kese onthiki ina omasukalalo ayo. Kese onthiki ina ovivi viayo.” Rosie wapopia okuti, onondaka ombo mba Jesus mbemukuatesako okuhasukalala unene netyi matyiya muhuka. Wayawisako okuti: “Ankho ndyina-le ovitateka ovinyingi iya ankho hipondola vali okuyawisako ovitateka vihenemoneke iya alo umwe hamwe nalumwe mavikamoneka.”

Yasmine nae ankho ulitehelela okuti una ovitateka ovinyingi. “Onosimanu ambuho ankho ndyilila iya ankho ononthiki mbumwe hikala nolumphoki. Mokonda yonkhalelo ndyilitehelela, ankho ndyisoka okuti mandyinkhi.” Otestu patyi yemukuatesileko? Wapopia okuti omukanda wa 1 Pedro 5:7, wati: “Pakulei omasukalalo enyi aeho ku Huku, mokonda oe wasuka noonwe”. Yasmine wayawisako okuti: “Putyina omuvo ulamba, natualako okulikuambela ku Jeova iya wankhumbulula omalikuambelo ange. Ame nelitehelela ngatyina napolwa omulemo omunene komapepe. Pamwe ndyikala vali nomalusoke omavi, mahi pahe ndyityii oñgeni mandyitetulula otyitateka otyo.”

Omuhikuena umwe utiwa Isabella wati: “Ame ankho ndyisoka okuti okupanga otyipuka otyituwa tyimwe tyombunga, mokonda na tate ankho ongotyo ekahi. Ankho ndyipaka ponthele ovipuka viakolela unene pala okupululukwa-po vala nokutala otelevisau. Otyituwa otyo otyivi unene, mokonda omunthu unumana unene iya kalingi nawa ovilinga viae.” Otyipuka tyemukuatesako okusokolola onondonga mbuvasiwa mu 2 Timóteo 2:15, yati: “Linga ononkhono opo ulipakule ku Huku tyapandwa, ngo muundapi uhena etyi tyimukalesa nohonyi.” Isabella wapopia okuti: “Ame ankho hihande Jeova akale nohonyi yovilinga viange mokonda yokuhevilingi momuvo watyo.” Isabella walinga omapiluluko omanene.

Tyelifwa na Isabella, Kelsey nae wapopia okuti: “Namphila ankho ovilinga viange vina onthiki yanakwa pala okuvilinga, mahi ankho ndyivilinga vala monthiki yahulilila. Mokonda yotyo, ankho ndyilila, tupu hilala iya ankho ndyina otyiho. Otyipuka otyo ankho katyinkhalesa nawa.” Kelsey wavasa ekuateso liatunda ku Huku livasiwa mo Provérbios 13:16 liati: “Omunthu omunongo ulinga ovipuka nenoñgonoko, mahi omuhima ulekesa owova wae.” Kelsey wahangununa okuti, okusokolola konondaka ombo tyemukuatesako unene. Wati: “Ounongo okulinga nawa ovipuka nokuvipanga nawa. Pahe ndyina ehinangeleso nalinga linkhuatesako okupanga nawa ovipuka mandyilingi iya otyo tyinkhuatesako okuhalingi vali ovipuka monthiki yahulilila.”

Kirsten wati: “Omulume wange wanthyapo novana vekuana.” Otestu patyi yo Mbimbiliya yemukuatesileko? O testu ya Provérbios 17:17 yati: “Epanga liotyotyili ulekesa ohole omuvo auho iya omukuatate watyitua pala okuvatela pomuvo wononkhumbi.” Kirsten waovola ekuateso lia vana vaumbila Jeova ngae. Oityi avasa? “Omapanga ange ankhuatesako mononkhalelo ononyingi! Pamwe ankho ndyivasa ovikulia no nonthemo pombundi yange. Movikando vitatu tuailuka, omapanga etukuatesako okuilukila komphangu onkhuavo. Omunthu umwe ankhuatesako okuvasa ovilinga. Omapanga ange apeho ankho afuapo pala okutukuatesako.”

Delfina wapopiwa konyima, nae ankho ulitehelela okuti ukahi vala aike. Mokuhinangela etyi tyaendele nae, wapopia okuti: “Ame ankho ndyitala okuti vakuetu vena ehambu, mahi ame ankho ndyiletehelela okuti ndyimulike iya ankho ndyitupu ehambu. Ankho ndyilitehelela unene omapita.” O testu imwe yemukuatesako o Salmo 68:6, yati: “Huku wavela omphangu vana vehena apa vakala.” Delfina wahangununa okuti: “Ame andyinoñgonoka okuti otyo katyilekesa okuti mandyipewa ondyuo pahetyino. Mahi, nanoñgonoka okuti Huku mandyavela ondyuo omu ndyipondola okuvasa ekuateso. Momphangu omu ndyipondola okuvasa epamo, nokukala noupanga ukahi nawa novanthu vehole Jeova. Mahi tupu ankho ndyityii okuti opo ndyifuene kovaumbili va Jeova tete ankho ame ndyina okufuena ku Jeova. Ngotyo, nakuateswako unene no Salmo 37:4, yati: ‘Hambukilwa Jeova. Iya oe mekuavela evi wiita momutima wove.’”

Delfina wamanuhula okuti: “Naimbuka okuti nesukisa okupameka oupanga wange na Jeova. Huku epanga ewa. Ngotyo, nahoneka ovipuka ndyihole okulinga na vakuetu opo ndyikale omapanga avana vehole Jeova. Nelilongesa okutala ovipuka oviwa kuvakuetu iya anahatale vala kovipuka ovivi valinga.”

Aloo umwe omapanga aumbila Jeova navo ovakuankhali. Onombangi mba Jeova valinga atyiho opo vatetulule ovitateka vena momuenyo ngetyi tyilinga ovanthu ovakuavo. Mahi etyi tulilongesa mo Mbimbiliya tyitulunda okukuatesako vakuetu. Otyiwa okulinga oupanga novanthu ovo. Mahi okuti Onondonga mbo Mbimbiliya mbupondola okutukuatesako movitateka tuhevili okutetulula mononthiki mbo hono, ngetyi omauvela ahaveluka noluihamo tukala nalo tyina omunthu tuhole amankhi?