“Oñgeni Mandyilingi Onkhali Onene Ngoyo?”

JOSE ukahi nokufuima omphepo imwe yatokota, nokutala ononthemo onongwa mbomiti vikala momaande. Ankho ukahi nokulandula omutanda wovakua-vitanda, pahe vekahi nokutauluka omaluhandya okutyama nondongi yo Nilo. Soka kovalume vekahi nokutaha omakulu avo molutyamo luondongi okuenda nokonthele onkhuavo yepundaumbo lio Egitu, Jose otyo tala omakaluhane nomakanthata ekahi nokukatuka. Jose usoka vali keumbo liavo ko Hebron otyilongo tyonomphunda mbasukulwa nomphepo, kokule unene, pahe ukahi motyilongo tyelikalela unene.

Soka kovindondi vikahi nokuliyavela nokulombauka komiti otyo vilia omahipwa ine omakuyu. Ku Jose, tyina atala ovanthu vapopia vekahi nokuenda-enda ngoti vei vali ovipuka. Tyafuile Jose ankho uhetekela okunoñgonoka etyi vekahi nokupopia. Ankho utyiivite katutu. Etyi haunene ei, okuti nalumwe vali makondoka keumbo liavo.

Jose ankho omukuendye una vala omanima 17 ine 18, mahi ankho ukahi movitateka vipondola okutilisa owoma alo ovakulu. Mokonda Jose ankho uholwe vali na tate yae, ovakulu vae avemulingi onkhi, avahande okumuipaa. Mahi, avemulandesa kovakwa-vitanda ovo. (Gênesis 37:2, 5, 18-28) Etyi valinga oungendi mo nosimano mbehehi, katutu-katutu avahambukwa tyina vehika popepi nepundaumbo enene muna ankho makavamona onombongo ononyingi tyina vamalandesa Jose novipuka ovikuavo viakolela vatyinda. Oityi tyakuatesileko Jose okuhakala unene notyiho nokuhanumana unene? Iya oñgeni hono tupondola okulikuatehila tyina tuvasiwa novitateka vipondola okunyona ekolelo lietu? Tupondola okulilongesila unene ku Jose.

“Jose watualwa nokombwelo yo Egitu, iya omu Egitu umwe utiwa o Potifar, omutumini wombala ya Farao, tupu omutumini wovayungi wae, emulande kova Ismaelita vemutuala nokombuelo oko. (Gênesis 39:1) Monondaka ombo mbehehi, Ombimbiliya itukuatesako okusoka onkhalelo ankho ikundisa omukuandye oo ekahi etyi alandeswa vali. Ankho ukahi vala ngotyuma! Pahe tusokei Jose ukahi nokulandula omuhona wae omukuavo, omu Egitu omutumini wombala, vekahi nokulamba onovenda nokutauluka omatapalo, okueenda nokeumbo oku Jose makakala.

Eumbo! Ankho tyikahi unene na Jose okusoka etyi tyitiwa eumbo. Jose wekulila mombunga ihena omphangu ankho ikala vala momakaka, nokuilauka okuyunga ovipako. Pahe, ukahi meumbo liomuhona omu Egitu itiwa o Potifar ukala monondyuo onongwa nokualombwa nawa. Ovanthu vokuheya omatunthu vapopia okuti ova Egitu kohale ankho vena onondyuo onongwa, mbuna omaiva omaande okuyoa, na pana patuikwa eholi, nomiti, nononthemo, nomiti omikuavo vikala momaande. Omaumbo amwe ankho ekahi pokati komiti vitema nawa, nokuna onombalanda mbokuombela ine omaombelo, no nondyanena ononene opo mufile omphepo, nokuna onokuartu ononyingi, no nondyuo mbokulila nombokukala ovaundapi.

Okuti Jose ankho wahuvile mokonda yomalumono oo? Tyafuile au. Mokutala, otyipuka ankho tyemusukalesa vali unene ounye. Ova Egitu ankho vapopia elaka ehei, omuvalo wavo nonkhalelo yokulihiwisa yelikalela, alo umwe onongeleya mbavo. Ankho vafenda ovikahuku ovinyingi, nokuna omatambu, nokuna owoma novanthu vokuankhia nonondele. Mahi, otyipuka ankho tyaihama vali Jose ounye. Ombimbiliya itupopila okuti: “Jeova Ankho Ukahi na Jose” (Gênesis 39:2) Tyotyili Jose wapopilile Huku yae etyi tyikahi momutima wae. Ombimbiliya yati: “Jeova ukahi popepi novanthu aveho vemuihana.” (Salmo 145:18) Omonkhalelo patyi vali onkhuavo Jose ankho ekahi popepi na Huku yae?

Jose ankho ulikuatehila opo ahasoke unene, nokulinga nawa ovilinga viae. Ngotyo Jeova avela Jose ononkhano onongwa iya akala omunthu wapandua nomuhona wae omupe. Potifar amono okuti omuundapi wae omukuendye Jose wayambua na Jeova, Huku yombunga ya Jose iya ononkhano ombo tyotyili mbukahi nokueta olumono meumbo liae mo Egitu. Katutu-katutu Jose atualako okuhumbwa alo Potifar emutuma ayunge atyiho tyikahi meumbo liae.​—Gênesis 39:3-6.

Jose wava ongeleka ongwa kovakuendye valingila Huku hono. Mongeleka tyina ovakuendye vekahi mosikola vapondola okukala pokati kovanthu vehei, avelitehela ngatyina vaomba, mouye uno wokuna ovipuka vipondola okuvepaka monkhalelo yomuenyo ihekahi nawa nokuhena ekevelelo. Inkha ove ukahi monkhalelo ngoyo, hinangela okuti Jeova kapiluluka. (Tiago 1:17) Jeova walekesa okuti makala na aveho vatualako noukuatyili mwe nokuovola okulinga ovilinga vimuhambukiswa. Meveyambe unene, iya noove mekuyambe.

Tupu, ehipululo litupopila okuti, Jose akala omunthu walongoka nawa. Omukuendye oo, akala omulume, “omuwa unene, nokuapama.” Onondaka ombo mbulekesa okuti ouwa oo ankho maupake Jose motyiponga tyokupeleyua nokufewa monkhalelo ihaviukile.

Jose ankho omukuatyili, mahi omukai wa Potifar ankho hamukuatyili-ko. Ombimbiliya yati: “Omukai womuhona wae ehimbika okutala unene Jose iya emuti: ‘Lala naame.’” (Gênesis 39:7) Okuti Jose wasokele okutavela omukai oo uhaumbila Huku? Ombimbiliya kaitupopila okuti Jose ankho utupu omahando okukaenda-enda novakuendye vakuavo ine nomukai oo, omukai wankhimana mombala, una omalumono nokuatyiliyiswa omapita, wakala nomahando omavi. Okuti Jose wasokele okuti omuhona wae nalumwe metyinoñgonoka? Okuti wasokele okuti upondola okumona omalumono inkha utavela omukai oo?

Tyotyili, onthue katwii atyiho ankho Jose asoka. Mahi tuete nawa etyi ankho tyikahi momutima wae. Otyo tutyitalela mekumbululo liae, etyi ati: “Omuhona wange kei atyiho ndyikahi nokuyunga, iya atyiho ena wetyava pomaoko ange. Petupu nawike omunene tyipona ame meumbo lino, iya oe kandyilikile na tyimwe, ove vala, mokonda ove mukai wae. Oñgeni ndyipondola okulinga otyipuka otyo otyivi unene, nokulinga onkhali ku Huku?” (Gênesis 39:8, 9) Soka komukuendye upopia onondaka ombo tyapama omutima. Alo umwe tyimuihama unene tyina ankho asoka omukai oo uhanda okulala nae. Omokonda yatyi?

Ngetyi Jose apopia, omuhona wae ankho wemuyumba onthumbi unene. Potifar watuma Jose ayunge atyiho tyikahi meumbo liae natyike emuilika, mahi omukai wae vala. Oñgeni ankho Jose apondola okuenda konyima omuhona wae? Jose ankho uyele unene olusoko olo. Mahi etyi ankho aanyena vali unene otyetyi: Okusoka okulinga onkhali ku Huku yae, Jeova. Jose welilongesilile unene kovotate yae konthele yo ñgeni Huku atala otyinepo noukuatyili. Jeova walinga otyinepo tyotete iya apopi nawa etyi ankho asoka. Omulume nomukai vawanekwa kumwe, avakala “olutu lwike” (Gênesis 2:24) Vana vatauluka otyitumino otyo vankhindula onyengo ya Huku. Mongeleka, vana vahandele okulala nomukai wa Abraiau he mbuale ya Jose, nomukai wa Isake, he mbuale ya Jose, kuakambele katutu ñgeno vaipaelwe. (Gênesis 20:1-3; 26:7-11) Jose ankho wanoñgonoka nawa onondonga ombo nokuatokola okuendelamo.

Omukai wa Potifar kahande okuiva otyo tyikahi nokupopia Jose! Omokonda yatyi? Soka komupika weliola omutima wanya omukai oo, emupopila okuti, oñgeni apondola okulinga “onkhali ngoyo onene”! Nongotyo, omukai oo utualako. Tyafuile nokuelipepesa nomalityindailo ankho watokola okuhongiliya Jose alo etavela. Walekesa otyituwa ngo tya Satanasi, walolele Jesus. Satanasi walolele Jesus ehetyivili, iya emuyekepo, akevelela “omuvo omukuavo utavela.” (Lucas 4:13) Ovanthu vekolelo vesukisa okutokola nokupama. Ongotyo Jose alingile. Namphila ankho ekahi motyitateka otyo “nthiki na nthiki” Jose nalumwe ayekelepo etyi asoka. Ombimbiliya yati: “Nalumwe etavelele.” (Gênesis 39:10) Mahi omukai wa Potifar atualako okumuhongiliya opo etavela.

Omukai oo ankho wovola omuvo ovaundapi aveho vekahi kondye. Ankho utyii okuti Jose makala mokati okulinga ovilinga viae. Tyina amanyingila na emuhupulilemo. Etyi anyingila emukuate, emuiiti otyikando tyahulililako okuti: “Lala naame”! Jose kasokele tuvali. Liwa-liwa elitukumuna, asoponoka pomaoko ae, mahi omukai akuate motyikutu tyae. Jose etyisi pomaoko ae, akahateka!​—Gênesis 39:11, 12.

Tuesukisa okuhinangela elondolo apostolu Paulu atumwa okuhoneka liati: “Tilei oundalelapo!” (1 Coríntios 6:18) Jose wasapo ongeleka ongwa pala Ovakristau aveho votyotyili! Omasuka-suka omuenyo apondola okutukalesa novanthu vehena onthilo novitumino via Huku konthele yotyinepo, mahi otyo katyilekesa okuti tupondola okuliyeka atuhongiliyua okulinga ovipuka ovivi. Namphila tyipondola okutupuiya, mahi tuna okuenda nkholo.

Jose tyemupulisile unene. Omukai wa Potifar pahe ankho uhanda okulitalelapo nae. Liwa-liwa eliyavela, opo ovaundapi ovakuavo vanyingile mondyuo. Apopi okuti Jose uhanda okumukuata kononkhono pahe wakahateka etyi eliyavela. Atualako nokulila otyo akuata ovikutu okukevela alo omulume wae eya. Etyi omulume eya, emupopila omatutu, okulekesa okuti omulume wae walinga omapita etyi aeta meumbo omunthu uheiwe. Potifar alingi ñgeni? Ombimbiliya yati: “Anumana unene”! Atumu Jose apakwe mokaleya.​—Gênesis 39:13-20.

Katwii nawa oñgeni ankho tyikahi ovikalavoso vio Egitu kohale. Vokuheya omatunthu vavasa ovimato vionondyuo ankho mbuna omaleva nomatoto. Konyima Jose wapopia omphangu oyo nonondaka mbuhangununa okuti “etoto,” tyilekesa okuti ankho mutupu otyimimi nokuhena ekevelo. (Gênesis 40:15, okatoi) Omukanda wa Salmo, utulongesa okuti Jose ankho wamona ononkhumbi, wati: “Vemukuta konomphai nomalienge, ehinga liae veliwingaila movivela.” (Salmo 105:17, 18) Ova Egitu ankho ononkhuatwa vembukuta nomalienge tyapikulwa omaoko konyima avakutila pononkhokolwa; otyivela otyikuavo atyikutwa momunyino. Tyotyili Jose wamonesilwe unene ononkhumbi, ngwe ankho utupu etyi alinga otyivi!

Haunene, kakalelemo omuvo wehehi. Ehipululo liati Jose “watuaileko okukala mokaleya.” Jose wakalele omanima omanyingi momphangu oyo ombi!a Iya Jose ankho ketyii okuti nthiki imwe matundumo. Ononthiki ombo onombi mbakala onosimano alo onohanyi, oñgeni Jose elikuatehila ahakala tyasoya nokunumana?

Ehipululo lituavela ekumbululo ewa liati: “Jeova ankho ukahi na Jose iya emulekesa oluembia olunene.” (Gênesis 39:21) Kutupu ovimato viokoleya, kutupu omalienge, kutupu enthiki, lipondola okutyika oluembia olunene lwa Jeova, okuhika kovaumbili vae. (Romanos 8:38, 39) Tupondola okusoka Jose nokuaihamenwa ukahi nokulikuambela ku Tate yae woluembia keulu iya apewa ombembwa netuliyo litunda vala ku “Huku weungumaneso aliho.” (2 Coríntios 1:3, 4; Filipenses 4:6, 7) Oityi vali Jeova alingila Jose? Ehipululo liati Jose watuaileko “nokupandwa nomutumini wokaleya.”

Ononkhuatwa ankho mbupewa ovilinga iya Jose ankho uviavela Jeova opo emuyambe. Jose ankho uundapa nononkhono, okulinga atyiho evila iya ovikuavo evipakula ku Jeova. Nononkhano onongwa mba Jeova, Jose ayambwa nokupandwa ngetyi ankho ekahi meumbo lia Potifar. Ehipululo liati: “Ngotyo omutimini wavilapo wondyuo yononkhuatwa aavela Jose otyilinga tyokuyunga ononkhuatwa ambuho, iya atyiho ankho tyilingwa mokaleya omo, tyimoneka okuti oe wetyilinga. Omutumini wavilapo mondyuo yononkhuatwa kayungu natyike Jose alinga, mokonda Jeova ankho ukahi na Jose iya ankho utyiendeka nawa.” (Gênesis 39:22, 23) Ankho tyipameka unene Jose okunoñgonoka okuti Jeova ukahi nokumukuatesako!

Mouye uno tupondola okuvasiwa novitateka nononkhumbi alo umwe okulingwa onya, mahi tulilongesila kekolelo lia Jose. Inkha tufuena ku Jeova melikuambelo, nokuendela movitumino viae nokuundapa unene okulinga etyi tyaviuka komaiho ae, matuavela Jeova etyi mayambe. Ku Jose, Jeova ankho una ononkhano onongwa ononyingi mbapakwa vala nawa, ngetyi matukatala mononthele ngei komutwe.