Oityi Una Okulinga Mewaneno Mukale Ombembwa?

Tyina tuna vakuetu vo mewaneno tukala umwe ngetyi tyakalele Ohamba Daviti watile: ‘Otyiwa, tyihambukiswa ovakulu nonondenge okukala mphangwa ike!’ (Salmo 133:1) Ombembwa oyo tuna-yo mewaneno, kaiya vala ngotyo! Atuho mewaneno tuna okulikuatehila tuahalinge ovipuka vipondola okutuyapaula.

1. Oityi tyihuvisa kovanthu va Siovaa?

Ine utunda motyilongo tyenyi oende kotyilongo otyikwavo, tyina uhika oko oende keliongiyo, meliongiyo kumavombo, naapa umwe lieheli nokulingwa melaka lienyi. Omokonda yatyi? Omokonda onthwe Nombangi mba Siovaa tulilongesa vala otyipuka tyike mouye auho. Katyiti vo oku veli nokulilongesa etyi, vo oku veli nokulilongesa etyi. Tupu kamavekuniangela vala opo, mokonda tulinga ononkhono tulihumbe pokati. Onthwe atuho ‘tupopia enyina lya Siovaa, tumufenda kumwe tyelikwatapo.’ — Sofonias 3:9.

2. Oityi tuna okulinga tukale nombembwa pokati ketu?

‘Kalei noluembia na vakwenyi, oluembia umwe lwo komutima.’ (1 Petulu 1:22) Onondaka ombo mbahanda okutiwi? Mbahanda okuti katupondola vala okuyunga ovivi vakuetu valinga, mahi tuna okutala koviwa viatyo. Katupondola vala okulinga omapanga a vana vehole ovipuka onthwe tuhole. Tuna okulikuatehila tunoñgonoke ovanthu aveho vo mewaneno atukala omapanga avo. Ine nkhele pamwe tyina tulitala ñgaa tuna okapungulula, tuna okututumba tulipoleko. — Tanga 1 Petulu 2:17.a

3. Oityi una okulinga ine kamuelivilile na mukwenyi mewaneno?

Tyili Onombangi mba Siovaa ovanthu vamwe velihole. Mahi mokonda atuho tupengesa, pamwe tupondola atulingi otyipuka tyinumanesa mukuetu. Otyo Ombimbiliya yatila: ‘Tualeiko okulievela na vakwenyi. Ngetyi Siovaa emuevela nomutima auho, no onwe otyo muna okulinga.’ (Tanga Ova Kolosu 3:13.) Ine tuhinangela ovipuka tuapengesa-pengesa ku Huku yetu Siovaa, atuvivalula, katuvivili nii. Mahi ina Siovaa apeho utuevela. Otyo etutumina no onthwe tuevele vakuetu. Ine wetyimona okuti una etyi walinga tyanumanesa mukwenyi mewaneno, enda-ko wahasete amutomphola, amuliiti otyiponyo. — Tanga Mateusi 5:23, 24.b

KUHANDE OKUNOÑGONOKA VALI?

4. Lipola okapungulula

Onthwe tuahanda umwe ñgeno tuhumba ovanthu vatyo aveho. Mahi hamwe nkhele momutima, ovanthu vamwe katuvehande nawa, tuevetomba. Pahe oityi molingi ulipole-ko okapungulula? Tangei Ovilinga 10:34, 35, amutomphola omapulo aa:

• Siovaa utupu okapungulula, ovanthu vatyo aveho uveyeka vemufende, vakale Onombangi mbae. Oñgeni upondola okulinga nga Siovaa, haunene umwe tyina una vakwenyi vovilongo ovikwavo, no vovivala ovikwavo?

• Potyilongo tyenyi, haunene ovanthu patyi vatombwa vali? Pahe oityi molingi opo ove wehevetombe?

Tangei 2 Ova Kolindu 6:11-13, amutomphola epulo eli:

• Oityi molingi ukale epanga liovanthu aveho mewaneno, ohalingi okapungulula?

5. Evela vakwenyi

Onthwe tutupu-ale onthiki matuevela Huku. Mahi soka ngwe utuevela vala ononthiki ambuho. Tangei Salmo 86:5, amutomphola omapulo aa:

• Okuti Siovaa una onthiki ati ‘hono hievela vali ovanthu’?

• Oñgeni ukala tyina uhinangela okuti Siovaa wekupolela-po ononkhali walinga-linga?

• Tuahanda ñgeno tulivila nawa novanthu aveho. Mahi pahe ovipuka patyi vipondola okutulingisisa atuehelivili vali?

Oityi tupondola okulinga tuhetekele Siovaa, atulivili na vakuetu? Tangei Provérbios 19:11, amutomphola epulo eli:

• Ine pena omunthu walinga otyipuka tyekunumanesa, oityi una okulinga wahalinge onkhongo?

Pamwe no onthwe muene tuhole okulinga ovipuka vinumanesa vakuetu. Pahe ine tulinga otyipuka tyimwe, mukuetu atyimunumanesa, oityi tuna okulinga? Talei OVIDIU, amutomphola epulo eli:

OVIDIU: Okuovola Okukala Nombembwa Tyieta Ouwa (6:01)

• Oityi omuhikuena tuamona movidiu alinga, etyi etyimona okuti kaveli nokulivila na mukwavo?

6. Tala koviwa vakwenyi valinga

Tyina tukala omapanga a vakuetu mewaneno, tumona okuti ovanthu vamwe vekahi nawa. Mahi tupu tumona umwe okuti vena vimwe valinga viehekahi nawa. Pahe molingi ñgeni utale vala koviwa viatyo valinga? Talei OVIDIU, amutomphola epulo eli:

OVIDIU: Kala Omunthu Ukahi Vali Nawa! (5:10)

• Oityi una okulinga utale vala koviwa vakwenyi mewaneno valinga?

Siovaa kayungu ovivi vietu, utala vala koviwa tulinga. Tangei 2 Crônicas 16:9a, amutomphola epulo eli:

• Tyina usoka okuti Siovaa utala vala koviwa ulinga, tyikukalesa-vo ñgeni?

ETYI WELILONGESA

Welilongesa okuti opo ewaneno likale apeho nombembwa, una okuhumba vakwenyi, ovepolela-po tyina pena etyi vekulinga wahahandele.

Okupitulula

• Oityi una okulinga ulipole okapungulula?

• Oityi una okulinga ine kamuelivilile nomunthu umwe mewaneno?

• Okuti no ove uhanda okuhetekela Siovaa okuevela vakwenyi?

KUHANDE OKUOVOLA VALI?

Sesusi wapopile okuti katupondola okupolapo vakuetu omapita.

Pola-mo Omuti Ukahi Meiho Liove (6:56)

Soka ñgeno pena omunthu umwe muehelivilile nae, mahi ku ove ngoti oe wapengesa. Okuti no ngotyo una okukemuita otyiponyo?

“Okuita Otyiponyo Tyeeta Ombembwa” (Omutala Womulavi 1 ya Novembro yo 2002)

Tala oityi vamwe valinga vahalinge vali okapungulula.

Uhakoyese Vakuenyi Okutalela Kolupe (5:06)

Tala ovipuka vimwe upondola okulinga tyina omunthu umwe mewaneno amekunumanesa opo tyahaye kokule.

“Tetululei Ovitateka Vienyi Nohole” (Omutala Womulavi wa Maio yo 2016)