ELONGESO 34
Oityi Tuna Okulinga Huku Etyimone Okuti Tumuhole?
Nkhele apa wahimbika okulilongesa Ombimbiliya, mokutala pahe Huku umuhole vali, ine hatyo? Okuti uhanda ñgeno oupanga wove na Siovaa upama vali? Opo una okulinga ovipuka mavimoneka umwe okuti uhole Siovaa Huku. Tyina Huku amamono okuti umuhole, nae mekuhumbu vali. Mahi muene-muene, oityi una okulinga Huku etyimone okuti umuhole?
1. Oityi tuna okulinga Siovaa etyimone okuti tumuhole?
Tyina tutavela etyi Siovaa apopia, ngotyo tuli nokumupopila okuti tumuhole. (Tanga 1 Suau 5:3.) Mahi Siovaa hamunthu una wokuti ‘ngaliti pano una vala okunthavela.’ Muene munthu na munthu oe utyii ine memutavela ine kemetavela. Mahi oityi Siovaa ehetukuluminyina tumutavele? Omokonda uhanda tumutavele “nomutima auho.” (Ova Loma 6:17) Onondaka ombo mbahanda okuti, Siovaa uhanda tumutavele, ha mokonda vala tyatiwa tyilingei, mahi omokonda tumuhole. Onthele ya tatu no ya kuana yomukanda ou, mbupopia unene ovipuka Siovaa ehole, novipuka eyele. Pahe onthwe tyina tulinga vala evi ehole, atulityilika evi eyele, opo nae utyimona umwe okuti tumuhole unene.
2. Oityi tyahapepukilile okutavela ku Siovaa?
Ombimbiliya yati: “Ononkhumbi mbomuviuki ononyingi.” (Salmo 34:19) Tyimwe, omokonda atuho tuna onkhali mokati ketu. Tupu pamwe tuna ovitateka ovikwavo. Pamwe tulingwa onya na vakuetu. Pamwe tuahepa umwe, netyi vala tulia meumbo tutupu. Ovipuka ngovio, ovio pamwe vitulingisisa atyitupuiya okutavela etyi Siovaa etutuma. Mahi tyina tulikuatehila, atulingi etyi etutuma, naapa tyetupona, Siovaa utyimona umwe okuti naina tumuhole vali tyipona ovipuka ovikwavo. Onthwe tyina tuahayeke-po Siovaa, nae ketuyeke-po. — Tanga Salmo 4:3.
KUHANDE OKUNOÑGONOKA VALI?
Monoñgonoka oityi Siovaa ahambukilwa tyina tumutavela. Tupu motale oityi matyikukuatesako okumutavela, naapa umwe tyepuiya.
3. Ove Satanasi wekutendeleya
Kohale kwali omukulu umwe ankho uhole unene Huku utiwa o Sobe. Ombimbiliya ipopia okuti Satanasi atendeleya omukulu oo Sobe. Mahi ine tusoka nawa konondaka apopile, matutyimono okuti muene-muene watendeleya ovanthu aveho vahanda okutavela ku Huku. Tangei Jó 1:1, 6 – 2:10, amutomphola omapulo aa:
Eliapu liapopia okuti Sobe ankho utavelela- tyi ku Siovaa? — Tala Jó 1:9-11.
Oityi Eliapu liatendeleya ovanthu aveho? — Tala Jó 2:4.
Tangei Jó 27:5b, amutomphola epulo eli:
Pahe oñgeni tyamoneka umwe nawa okuti Sobe ankho uhole Siovaa?
Sobe kayekele-po Huku mokonda ankho umuhole unene
Onthwe tyina tutavela ku Huku, atuehemuyeke-po, ngotyo tuli nokumupopila okuti tumuhole
4. Hambukiswa Siovaa
Tangei Provérbios 27:11, amutomphola omapulo aa:
Siovaa ukala ñgeni tyina ekutala ñgaa, ulinga ovipuka nonondunge, umutavela etyi apopia? Oityi akalela ngotyo?
5. No ove motyivili okupameka, ohayeke-po Siovaa
Onthwe mokonda tuhole Siovaa Huku yetu, tuhanda-vo ñgeno na vakuetu vemunoñgonoka. Otyo tulongesila vakuetu Ombimbiliya naapa umwe tyalema. Talei OVIDIU, amutomphola omapulo aa:
Okuti no ove pamwe tyikupuiya okupopila vakwenyi Ondaka ya Huku?
Omukulu tuamona movidiu, oityi alinga ahatile vali owoma?
Opo tuahayeke-po Siovaa, tuna okuhumba etyi ehole, atuyale etyi eyele. Tangei Salmo 97:10, amutomphola omapulo aa:
Pahe okutala etyi welilongesa-le, ovipuka patyi Siovaa ehole? Ovipuka patyi ahahande?
Oityi ove una okulinga utyivile okuhumba otyiwa, oyale ovivi?
6. Okutavela etyi Siovaa apopia, tumonena-po oviwa
Etyi Siovaa etutuma tulinge, onthwe vala muene tyipa ouwa. Tangei Isaías 48:17, 18, amutomphola omapulo aa:
Ove utyitavela umwe okuti etyi Siovaa etutuma, otyo tyaviuka? Oityi wapopila ngotyo?
Tundee apa wahimbika okulilongesa Ombimbiliya atee hono, oviwa patyi wamona-mona, mahi tyina uvitala ñgaa, viatuka umwe vala kokutavela Siovaa Huku?
OVANTHU VAMWE VATI: “Ndyilinge-linge oviwa, ndyilinge-linge ovivi, ina Huku kesukile-ale.”
Ñgeno wemutangela otesitu patyi etyimone okuti etyi asoka tyapenga?
ETYI WELILONGESA
Welilongesa okuti ine tutavela ku Siovaa, atuehemuyeke-po naapa umwe ovipuka vialema, ngwe metyimono umwe okuti naina tumuhole.
Okupitulula
Oityi welilongesila ku Sobe?
Oityi una okulinga Siovaa Huku etyimone okuti umuhole?
Oityi una okulinga wahayeke-po Siovaa?
KUHANDE OKUOVOLA VALI?
Tala ovipuka vimwe omunthu wokutavela ku Siovaa, nokutavela ku vana Siovaa apa otyilinga tyokutululika, alinga.
Noñgonoka etyi tyaendelepo etyi Eliapu liatendeleya ovanthu.
Tala oñgeni ovana vapondola okuhambukiswa Siovaa.
Pamwe ovakuendye novahikuena vahongiliyua na vakuavo valinge ovipuka Siovaa ahahande. Mahi pahe oityi mavalingi vehetavele?