Omaulo Konthele ya Mesiya

MOKONDA ankho ova Judeu vei nawa etyi Isaia novauli ovakuavo vahoneka konthele ya Mesiya, elongo olio ankho lityii tunde kohale okuti makuya o Mesiya. Konthele yonthiki ya Jesus, ova Judeu ovanyingi “ankho vakevelela” okuti okumoneka kua Mesiya kuli popepi. (Lucas 3:15) Tyakolela vali, omokonda omaulo Ombimbiliya, apopia nawa ovipuka viaenda momuenyo wa Mesiya. Naumue omunthu upondola okuula ovipuka viatyo ovio ine okuvimonekesa.

Ovipuka Ankho Vikamoneka Pokutyitwa kua Mesiya. Isaia waulile okuti Mesiya, ine o Kristu makatyitwa nomufikuena omumphembela. Etyi apostolu Mateusi apopia konthele yokukutulwa kuhuvisa kua Jesus, ahoneka okuti: “Otyo atyiho tyamoneka pala okufuisapo etyi tyapopia Jeova menyina liomuuli wae, etyi ati: ‘Tala, omumphembela makala omunthimba, iya atyiti omukuendye.’” (Mateus 1:22, 23; Isaías 7:14) Tupu, Isaia waulile okuti Kristu makatyitwa mombunga ya David, atumbula alo umue Jesse, tate ya David. Tyotyili Jesus watyitua umue mombunga ya David. (Mateus 1:6, 16; Lucas 3:23, 31, 32) Moluotyo, etyi Jesus ehenekutulwe, oandyu Gabrieli yapopilile Maliya ina yae okuti: “Huku memuavela otyipundi tyoutumini tya David tate yae.”—Lucas 1:32, 33; Isaías 11:1-5, 10; Romanos 15:12.

Ovipuka Ankho Vikamoneka Momuenyo wa Mesiya. Etyi Jesus pahe ekula, onthiki imue mondyuo yokufendela (sinagoga) mo Nazare, atangela peulu eulo lia Isaia, liati: “Ononkhono mba Jeova mbukahi kuame, mokonda oe wanaka opo ndyiivise onondaka onongwa kovahepi.” (Lucas 4:17-21; Isaías 61:1, 2) Tupu, Isaia waulile konthele yoñgeni atuwa, noutendi wae, nonkhalelo yae yokutala vana vesukisa okuvelulwa. Mateusi wahoneka okuti: “Tupu ovanyingi avemulandula, iya evevelula aveho. Mahi, wevelondolele no nonkhono opo vehetyipopie kovanthu. Opo etyi tyapopile omuuli Isaia tyifuiswepo, etyi ati . . . ‘Oe kamakatañguna, ine okukaluluka . . . Kamamiangula olumbungu naluike luatyatyuka.’”—Mateus 8:16, 17; 12:10-21; Isaías 42:1-4; 53:4, 5.

Ononkhumbi Ankho Mesiya Meya Okumona. Isaia waulile okuti Mesiya kamatavelwa novanthu ovanyingi mo Isilayeli, anthi makala ‘emanya lio kuvepundukisa.’ (1 Pedro 2:6-8; Isaías 8:14, 15) Namphila Jesus alingile omahuviso omanyingi, mahi ovanthu “kavakalele nekolelo mue. Ngotyo, ondaka ya Isaia omuuli yafuiswapo, yokuati: ‘Jeova olie wakala nekolelo muetyi onthue tueiva?’” (João 12:37, 38; Isaías 53:1) Tupu, ova Judeu ankho vetupu ekolelo, mokonda yolusoke luapenga ovanthu ankho vena. Vati Mesiya ankho mayovola liwa-liwa elongo liavo moutumini wo Roma nokupindulapo ouhamba wa David pano pohi. Mokonda Jesus wamonesua emone aipawa, ova Judeu ovanyingi kavetavelele okuti oe Mesiya. Mahi, Isaia ankho waulile okuti Mesiya makamona ononkhumbi tyina nkhele ehenekale Ohamba.

Momukanda wa Isaia, Mesiya wati: “Naava omuongo wange kuvana ankho vambeta . . . Haholekele otyipala tyange kovipuka vikundisa, nokunthilwa omakolate.” Mateusi wahipulula etyi tyapita na Jesus puetyi amoneswa ononkhumbi. Wati: “Vemunthila omate motyipala, nokumuveta no nonyongo. Ovakuavo avemuvandula nomalukuhi.” (Isaías 50:6; Mateus 26:67) Isaia wahoneka okuti, “Oe eliyeke okumoneswa emone, mahi kaikulile omulungu wae.” Ngotyo, etyi Pilatu apula Jesus konthele yo va Judeu ankho vemutendeleya, Jesus “kemukumbululile nondaka naike, moluotyo omutumini ahuvu unene.”—Isaías 53:7; Mateus 27:12-14; Atos 8:28, 32-35.

Ovipuka Ankho Mavipiti Pononkhia mba Mesiya. Eulo lia Isaia liatualako okufuiswapo pononkhia mba Jesus okuenda no komutue. Isaia waulile okuti: “Oe makalinga elangalo liae kumue no nondingavivi novahona, pononkhia mbae. Namphila ahalingile oungangala naumue no momulungu wae ankho mutupu omatutu.” (Isaías 53:9) Oñgeni eulo olio ankho malifuiswapo? Etyi Jesus ankhia, wapapelelue momuti pokati kovimphulu vivali. (Mateus 27:38) Mahi konyima, omuhona Jose omu Alimateia, alangeka olutu lua Jesus melangalo liae muene eepe ankho apongiya. (Mateus 27:57-60) Okuhulililako, ononkhia mba Jesus mbafuisapo ononthele ononyingi mbakolela mbeulo lia Isaia. Okupopia konthele ya Mesiya, Isaia wati: “Omuviuki, omuumbili wange, makaeta ovanthu ovanyingi monkhalelo youviuki. Iya oe muene matyindipo ononkhali mbavo.” Tyotyili, ononkhia mba Jesus mbaava ofeto yeyovo. Moluotyo, ovanthu aveho vekolelo vapondola okupolwa omulemo wononkhali.—Isaías 53:8, 11; Romanos 4:25.

Okufuiswapo Kuomaulo Amue

Opo vanoñgonokese Mesiya ngetyi Ovihonekwa vilekesa, ono apostolu na Jesus, vapopile unene omukanda wa Isaia, tyipona omukanda omukuavo wo Mbimbiliya. Anthi, omukanda wa Isaia haoko vala wapopia etyi matyiya komutue. Ovihonekwa ovikuavo ovinyingi vio Hebreu, tupu vipopia konthele ya Jesus, Nouhamba wae, novipuka oviwa Ouhamba oo maukalinga komutue.a (Atos 28:23; Revelação 19:10) Oñgeni omaulo oo ankho maafuiswapo? Jesus wapopilile ovateheleli vae ova Judeu ati: “Muhasokei okuti ame neya okuhanyauna Ovitumino ine Ovauli [ine Ovihonekwa vio va Hebreu]. Ame heile, okuhanyauna, anthi neya okuvifuisapo. Mokonda ame tyotyili ndyimupopila okuti, eulu noohi vipondola okupwa, mahi na kamue okandaka okatutu vala ko Vitumino makalambeswa, avihafuiswapo aviho.”—Mateus 5:17, 18.

Jesus tupu wapopile omaulo Ombimbiliya afuiswapo movipuka apita navio, nevi mavikeya. (Daniel 9:27; Mateus 15:​7-9; 24:15) Tupu, Jesus novalongwa vae vapopile ovipuka ankho mavikamoneka konyima yononthiki mbavo, nevi vikahi nokumoneka hono. Onthele mailandulako, maikapopia omaulo oo Ombimbiliya nomakuavo vali, maakafuiswapo komutue.

[Onondaka Poutoi]

[Olutalatu pefo 4]

‘Omufikuena omumphembela . . . makutula omona omukuendye’

[Olutalatu pefo 5]

“Haholekele otyipala tyange kovipuka vikundisa”