Jesus Opi Atundile

“[Pilatu] wanyingila vali mombala yomutumini iya apulu Jesus okuti: ‘Ove watunda pi?’ Mahi Jesus ehemukumbulula.”—JOÃO 19:9.

POSIU Pilatu Omutumini wo Roma walinga Jesus epulo olio, etyi ankho ekahi nokukoyeswa. Pilatu ankho wii okonthele patyi yo Isilayeli Jesus atunda. (Lucas 23:6, 7) Tupu ankho utyii okuti Jesus hamunthu vala nga vakuavo. Okuti Pilatu ankho uhanda okunoñgonoka inkha Jesus walikoale? Okuti ankho omutumini oo uhafende Huku ankho uhanda okutavela otyili nokuendelamo? Jesus kakumbululile. Iya otyo atyilekesa nawa okuti Pilatu, ankho wasuka vali novilinga viae tyipona otyili nouviuki.—Mateus 27:11-26.

Vana vahanda tyotyili okunoñgonoka opi Jesus atundile vapondola okutyinoñgonoka tyihasete. Ombimbiliya ihololola nawa onthuko ya Jesus Kristu. Tala onongeleka mbulandulako.

▪ Opi atyitililwe Vamwe hono vasoka okuti Jesus watyitua konthyimbi yenima pahe liihanwa okuti enima 2 P.K.E, mo Mbelei ko Judaa. Maliya ina ya Jesus etyi “omulemi,” nomulume wae Jose, valinga oungendi okuenda ko Mbelei otyilongo tyombunga ya Jose, opo vekelihonekese ngetyi Sesale Augustu atumine. Mokonda kavavasile apa valala potyilongo, avakalala motyunda, muna Jesus akutulilwa avemulangeka momutemba.—Lucas 2:1-7.

Omanima omanyingi kohale, eulo limwe lio Mbimbiliya liapopia apa Jesus matyitilwa okuti: “Ove Mbelei Efrata, upundaumbo etutu unene pala okukala pokati komapundaumbo omanyingi o Judaa, muove mamunthundila una makala omutumini mo Isilayeli.”a (Miquéias 5:2) Ombelei ankho okalongo okatutu okukeeleka nomapundaumbo omukuavo motyilongo tyo Judaa. No ngotyo, okalongo oko, ankho makakala nomunkhima omunene. Mesiya, ine Kristu, wokualaelwe ankho makatunda mo Mbelei.—Mateus 2:3-6; João 7:40-42.

▪ Opi ekulila Etyi vakala katutu mo Egitu, ombunga ya Jesus avaende ko Nazare epundaumbo limwe motyilongo tyo Galileia, likala onokilometu 96 kokulio kuo Jelusalei. Pomuvo opo Jesus ankho kenetuukise omanima etatu. Jesus wekulila motyilongo otyo otyiwa ankho tyokuna ovanthita, novalimi, no vokufwa onohi, valinga kese umwe otyilinga tyae. Ombunga yae ankho onene, tupu ankho kayamonene.—Mateus 13:55, 56.

Omanima omanyingi kohale, Ombimbiliya yapopile okuti Mesiya makakala “omu Nazare.” O Evandyeliu yahonekwa na Mateusi yati ombunga ya Jesus yakala mo “Nazare, pala okufuisapo etyi tyapopilwe novauli okuti: ‘Oe maihanwa okuti omu Nazare.’” (Mateus 2:19-23) Tyimoneka nawa okuti Mateusi ankho ukahi nokupopia eulo lia Isaia liihana Mesiya okuti “ondyovo” ya Jese, tyilekesa okuti ankho Mesiya makatunda mombunga ya Jese, he Yohamba David. (Isaías 11:1) Tyotyili, Jesus watuka mombunga ya David omona wa Jese.—Mateus 1:6, 16; Lucas 3:23, 31, 32.

▪ Tete-tete opi atuka Ombimbiliya ilongesa okuti omuenyo wa Jesus wahimbikale kohale, etyi nkhele ehenekutulilwe motyunda ko Mbelei. Omuuli Mikeia, omanima omanyingi kohale, wapopile okuti ‘onthuko Yae yatunda komivo viokohale, tunde kononthiki mbomivo vihapu.’ (Miquéias 5:2) Mokonda Omona wongunga wa Huku, Jesus ankho oandyu keulu etyi nkhele ehenetyitwe pano pohi. Muene Jesus wati: “Ame natunda keulu.” (João 6:38; 8:23) Otyo tyaenda ñgeni?

Kononkhono mbae ospilitu sandu, Jeova Huku kehuviso wapola omuenyo Womona wae keulu, eupake meimo lia Maliya omumphembela omu Judeu, opo atyitwe omunthu uhena nkhali pano pohi.b Kepondolo lia Huku Omukulami, ehuviso olio liapepuka. Oandyu yahangununina Maliya okuti “Huku na tyimwe tyimupona.”—Lucas 1:30-35, 37.

Ombimbiliya kaitupopila vala opi Jesus atundile. Ono Evandyeliu ononkhuana—Mateusi, na Marku, na Luka, na João—mbutupopila alo umwe oñgeni atyindile omuenyo wae.

[Onondaka Poutoi]