Ouhamba wa Huku Oityi?

Otyipuka Ombimbiliya yapopia vali, Ouhamba wa Huku. Ouhamba oo, maukamanako ovivi, ovipuka pano pohi avikala umwe ngetyi Huku ankho evihandela ponthyimbi, etyi atunga ovanthu. Ouhamba wa Huku oityi? Okuti pahe uli-ale nokutumina? Oityi walinga-le? Oityi maukalinga komutwe wandyila? Elongeso eli, nomalongeso evali maalandulako, maakumbulula omapulo oo.

1. Ouhamba wa Huku oityi? Olie Ohamba yatyo?

Siovaa Huku una omunthu akoya atumine. Omunthu watyo oo Huku akoya, una ava matumina navo. Otyo Huku alinga otyo, otyo tyitiwa Ouhamba wa Huku. Omunthu watyo Huku akoya atumine, o Sesusi Kilisitu. Ombala yatyo omu atuminina, ikahi keulu. (Mateusi 4:17; Suau 18:36) Ombimbiliya yapopia okuti Sesusi ‘makakala Ohamba apeho.’ (Luka 1:32, 33) Ohamba Sesusi makatumina ovanthu vatyo aveho pano pohi.

2. Ovalie Sesusi makatumina navo?

Sesusi kamakatumina aike. Ombimbiliya yati: ‘Ovanthu vomihoko aviho, no vomalaka aeho novanthu vovilongo aviho, mavakakala onohamba avatumina kombanda yohi.’ (Eholololo 5:9, 10) Mahi veñgapi mavakatumina na Sesusi? Okutuka apa Sesusi eile pano pohi atee hono, ovanyingi vetavela okukala ovalongwa vae, pahe omapanga a Huku. Mahi mavaende keulu, vakatumine na Sesusi, vena vala 144.000. (Tanga Eholololo 14:1-4.) Ovaunyingi vatyo, mavakakala umwe vala pano pohi, avakatumininwa umwe vala pano pohi na Sesusi. — Salmo 37:29.

3. Oityi tutila Ouhamba Huku ukahi vali nawa tyipona ovatumini va pano pohi?

Ovatumini vamwe vahanda umwe ñgeno vaviukisa-vo ovipuka, mahi pamwe kavetyivili. Pamwe omutumini wokuna omutima omuwa, ukati vala ñgaa, wapingwa-ko na mukuavo wehesukile-ale novanthu. Mahi Sesusi, Omutumini Huku akoya, kamakapingwa nomunthu. Ombimbiliya yati Huku ‘wapakako Ouhamba wahamakahanyua-ko vali.’ (Daniel 2:44) Sesusi makatumina ovanthu vatyo aveho pano pohi. Mahi mekevetumina umwe nawa, tyahalingi okapungulula. Sesusi omunthu umwe ukahi nawa, una okankhenda, uhole ovanthu. Makalongesa onondunge ovanthu aveho opo navo velitekule nawa. — Tanga Isaías 11:9.

4. Omutumini umwe makatumina ouye auho

Ovatumini vati umwe ou utumina oku, ou utumina oku. Iya Sesusi utumina otyilongo patyi? Tangei Mateusi 28:18, amutomphola epulo eli:

• Okuti hamwe Sesusi makatumina vala otyilongo tyike ngetyi tyilinga ovanthu?

Ovatumini vouye uno, velipinga-pinga-ko vala, mahi ngwe kavatumina-le ouye auho. Okuti na Sesusi otyo makalinga ngotyo? Tangei Daniel 7:14, amutomphola omapulo aa:

• Tyina utala ñgaa, okuti otyiwa etyi Ombimbiliya yapopia okuti Ouhamba wa Huku kamaukahanyua-ko? Oityi wakumbululila ngotyo?

• Ku ove, okuti otyiwa etyi Sesusi makatumina ouye auho? Oityi wakumbululila ngotyo?

5. Ovanthu vokutumina vena okupolwa-ko

Oityi ovanthu vokutumina vena okupolelwa-ko, akusala vala Ouhamba wa Huku? Talei OVIDIU, amutomphola epulo eli:

OVIDIU: Ouhamba wa Huku Oityi? — Otyinthimbu (1:41)

• Oityi ovatumini vehole okulinga vakuavo?

Tangei Eclesiastes 8:9, amutomphola omapulo aa:

• Tyina usoka ñgaa, okuti vokutumina Mouhamba wa Huku vena umwe okupola-ko ovatumini vouye ou? Oityi usokela ngotyo?

6. Sesusi na ava makatumina navo, vei nawa ovitateka vietu

Ohamba yetu Sesusi, wii nawa ovitateka vietu mokonda nae wali omunthu ngo onthwe. Ombimbiliya yapopia Sesusi yati “unoñgonoka oukuankhali wetu.” (Ova Hebeleu 4:15) Ovanthu vokuna 144.000, ava mavakatumina na Sesusi, Huku wevepola ‘momihoko aviho, no momalaka aeho no movanthu vovilongo aviho.’ — Eholololo 5:9.

• Tyilinge Sesusi, tyilinge ava makatumina navo, vali-ale ovanthu ngo onthwe. Okuti otyipuka otyo katyihambukiswa? Oityi wapopila ngotyo?

7. Ovitumino vya Huku vili vali nawa tyipona evi viahindwa novanthu

Ovatumini vapaka-ko ovitumino viaamena ovanthu. Na Huku nae wapaka-ko ovitumino. Uhanda ñgeno aveho vahanda okutuminwa nomona wae Sesusi, vevitavela. Tangei 1 Ova Kolindu 6:9-11, amutomphola omapulo aa:

• Tyina utala ñgaa, ouye maukakala ñgeni tyina ovanthu aveho vametavela etyi Huku apopia?a

• Ku ove, okuti etyi Siovaa apopia okuti ovanthu vahanda okutuminwa Nomona wae vena okumutavela, tyaviuka? Oityi wakumbululila ngotyo?

• Okuti ovanthu vokuehetavela etyi Huku apopia, nthiki imwe vapondola avapiluluka? — Tala vali povelesikulu 11.

ETYI WELILONGESA

Welilongesa okuti Huku una outumini. Outumini oo uli keulu, iya maukatumina ouye auho.

Okupitulula

• Ovalie Huku akoya vatumine Mouhamba wae?

• Oityi tutila Ouhamba wa Huku ukahi vali nawa kovatumini vouye uno?

• Siovaa uhanda ovanthu mavakatuminwa Nomona wae valinge-tyi?

KUHANDE OKUOVOLA VALI?

Sesusi wapopilile ovanthu okuti makatuminina keulu. Tanga onthele ei utyinoñgonoke nawa.

“Okuti Ouhamba wa Huku Otyipuka Tyili Vala Momutima Wetu?”(Mo jw.org)

Onombangi mba Siovaa kavetavela okukoya ovatumini, mokonda vahula umwe vala ku Huku, no Kohamba akoya Sesusi.

Onthue Tuahula ku Huku (1:43)

Ombimbiliya ipopia okuti Huku waholovona ovanthu vakatuuka 144.000 opo vende keulu vakatumine na Sesusi.

“Ovalie Mavaende Keulu?” (Mo jw.org)

Omukai ou, puetyi ankho eli mokaleya, wetyimona umwe nawa okuti o Huku vala utyivila okumanako ovitateka viouye.

“Ankho Nahanda Ñgeno Ouye Ukala Vala Nawa” (Pahukei!, Novembro yo 2011)