“Ondaka ya Huku Yetu, Ikalako Apeho”

1, 2. (a) Oñgeni ovanthu ñgeno vakala ankho kakuakalele Ombimbiliya? (b) Oityi tyitukuatesako okupola ouwa Mondaka ya Huku?

OKUTI wasokelea-le oñgeni omuenyo wove ñgeno wakala tyihena Ombimbiliya? Ove ñgeno kuanoñgonokele onkhalelo ikahi nawa yokutetulula ovitateka via kese nthiki. Ñgeno kuanoñgonekele olie Huku, olipi esilivilo lio muenyo, netyi matyikamoneka komutwe wandyila. Iya tupu ñgeno kuanoñgonokele oityi Jeova alingilile ovaumbili vae vokohale.

² Otyo ñgeno tyakala otyitateka tyimwe otyinene. Mahi tupandula Jeova wetuavela Ondaka yae Ombimbiliya iya walaa okuti Ondaka yae itualako pala apeho. Apostolu Petulu wapopia onondaka mbuli mu Isaías 40:8. Namphila oversikulu ei kaipopi Ombimbiliya, mahi ipopia etyi Ombimbiliya ipopia. (Tanga 1 Pedro 1:24, 25.) Onthue tupondola okupola ouwa ko Mbimbiliya tyina tuitanga melaka tunoñgonoka nawa. Vana vehole Ondaka ya Huku vetyii okuti otyo otyili. Momanima omanyingi, ovanthu vaundapele unene opo vapitiye Ombimbiliya nokuiava namphila ankho tyiveetela oundyale novitateka ovinene. Jeova uhanda ovanthu aveho “vayovolwe iya avakala nenoñgonoko liafuapo konthele yotyili.”​—1 Timóteo 2:3, 4.

 3. Oityi matulilongesa monthele ei? (Tala olutalatu pefo pahimbikila onthele.)

³ Monthele ei, matulilongesa oñgeni Ondaka ya Huku yatualako etyi (1) omalaka apiluluka, (2) omautumini ovanthu apilulula elaka lipopiwa novanthu ovanyingi iya (3) otyilinga tyokupitiya Ombimbiliya tyayalwa. Onthele ei maitukuatesako okupanda vali Ondaka ya Huku, tupu maiyawisa ohole tuna na Hekulu Yombimbiliya, utulongesa pala ouwa wetu.​—Miquéias 4:2; Romanos 15:4.

 4. (a) Oñgeni omalaka apiluluka mokueenda kuomuvo? (b) Oñgeni tutyii okuti Huku utupu elaka ahanda vali? Oñgeni otyo tyikukalesa?

⁴ Tyina omuvo ulamba, nomalaka apiluluka. Onondaka mbumwe nonkhalelo yokupopia vipondola okupiluluka. Hamwe ove upondola okusoka kongeleka yelaka ove upopia. Otyo tupu tyamonekele nomalaka okohale. Elaka lio Hebreu no Gregu ovanthu vapopia hono yelikalela no Hebreu no Gregu ankho yahonekwa Mombimbiliya. Ovanthu ovanyingi kavanoñgonoka nawa omalaka okohale ahonekwa Mombimbiliya iya yesukisa okupitiya momalaka vanoñgonoka. Vamwe vasoka okuti inkha vanoñgonokele o Hebraiku no Gregu yo kohale, ñgeno ankho vanoñgonoka vali nawa Ombimbiliya. Mahi otyo katyivekuatesako ngetyi vasoka.a (Tala okatoi.) Onthue tupandula unene Ombimbiliya ine ononthele mbumwe mbapitiyua momalaka ehungi po 3.000. Otyo, otyo Jeova ahandela ovanthu “vomalongo aeho nomihoko, nomalaka” vapole ouwa Kondaka yae. (Tanga Apocalipse 14:6, okatoi.) Tyotyili, otyo tyitufuenaika vali ku Huku yetu woluembia iya uhena okapungulula.​—Atos 10:34.

 5. Ombimbiliya Rei Jaime yakolela mokonda yatyi?

⁵ Tyotyili momalaka Ombimbiliya yapitiyua navo apiluluka. Onkhalelo ankho tete yapitiyua ankho yapepuka okuitanga nokuayandyuluka nawa, mahi mokueenda kuomuvo aihayandyuluka vali nawa. Tuna ongeleka Yombimbiliya Versão Rei Jaime, yapitiyua mo Ingilesi, aiawa mo 1611 otyikando tyo tete. Oyo ainoñgonokwa unene mo Ingelesi. Onondaka mbaundapeswa mo Mombimbiliya Rei Jaime ankho mbakolela unene melaka lio Ingelesi.b (Tala okatoi.) Mahi, Ombimbiliya oyo yaundapesa vala enyina Jeova ovikando vimwe. Ponomphangu ononyingi ankho enyina lia Huku livasiwa Movihonekwa vio Hebreu, liapolwa-po avapingiyapo “TATEKULU” no noletela ononene. Konyima tupu avaundapesa ondaka “TATEKULU” no noletela ononene Movihonekwa vio Gregu. Monkhalelo oyo, Ombimbiliya Rei Jaime aimbuka okuti enyina lia Huku lilinga onthele yo Testamendu Omphe.

 6. Omokonda yatyi tupandulila Ombimbiliya Tradução do Novo Mundo?

⁶ Namphila Ombimbiliya Rei Jaime yaundapeswa unene mahi hono onondaka ononyingi kambuiwe vali. Tupu otyo tyamoneka nomalaka omakuavo mo Mbimbiliya yapitiyua tete. Moluotyo, tuna elao enene liokukala no Tradução do Novo Mundo das Escrituras Sagradas, tuundapesa hono melaka tunoñgonoka. Ombimbiliya oyo yapitiyua aiho ine ononthele mbumwe, momalaka alamba po 150. Otyo tyilekesa okuti ovanthu ovanyingi mouye hono vapondola okutanga Ombimbiliya melaka liavo. Mombimbiliya omo muna onondaka mbayandyuluka nawa opo Ondaka ya Huku ihike komitima vietu. (Salmo 119:97) Ombimbiliya Tradução do Novo Mundo yakolela unene mokonda yuundapesa enyina lia Huku po nomphangu pana ankho livasiwa kohale.

7, 8. (a) Omokonda yatyi ova Judeu ovanyingi vakaleleko momanima 300 etyi Jesus ehenetyitwe ankho kavanoñgonoka elaka lio Hebraiku? (b) O Septuaginta Grega oityi?

⁷ Omautumini mouye nao pamwe apilulula elaka ovanthu vapopia. Mahi oityi Jeova alinga opo otyo tyihatyilike ovanthu okutanga Ombimbiliya melaka vapondola okunoñgonoka? Mongeleka, omikanda 39 viotete vio Mbimbiliya viahonekwa no va Judeu ine ova Isilayeli. Ankho ovo tete “vapewa otyilinga tyokuivisa onondaka mba Huku.” (Romanos 3:1, 2) Vahonekele omikanda ovio mo Hebraiku ine Aramaiku. Mahi momanima 300 Puetyi Kristu Eheneye ova Judeu ovanyingi ankho kavanoñgonoka vali o Hebraiku. Omokonda yatyi? Omokonda Omutumini Alexandre, ankho watambula ononthele mbumwe mbotyilongo iya Outumini wo Gresia auliyandyana. Iya tunde opo, elaka lio Gregu alihimbika okupopiwa vali novanthu ovanyingi okukutikinya-mo ova Judeu ankho vakala po nomphangu mbelikalela, Moutumini wo Gresia. (Daniel 8:5-7, 20, 21) Muakutikinya ova Judeu ovanyingi iya otyo atyivepuilisa unene okunoñgonoka Ombimbiliya mo Hebraiku. Oityi ankho tyina okulingwa?

⁸ Momanima 250 etyi Jesus ehenetyitwe, omikanda vitano vio tete vio Mbimbiliya ankho viapitiyua okupola mo Hebraiku avipakwa mo Gregu. Konyima, Ovihonekwa aviho vio Hebraiku navio avipitiyua mo Gregu. Ovihonekwa ovio aviihanwa okuti o Septuaginta Grega. Ovio ankho Ovihonekwa vio tete viapitiyua okupola mo Hebraiku avipakwa mo Gregu.

 9. (a) Oñgeni o Septuaginta no Nombimbiliya mbapitiyua momalaka omakuavo mbakuatesako ovanthu ankho vatanga Ondaka ya Huku? (b) Ombupi onotestu ove uhole vali unene Movihonekwa vio Hebreu?

⁹ O Septuaginta yakuatesileko ova Judeu novanthu ovakuavo ankho vapopia o Gregu okutanga Ovihonekwa vio Hebraiku mo Gregu. Soka oñgeni vahambukilwe tyina ankho vatanga nokuiva Ondaka ya Huku melaka liavo muene! Konyima, ononthele ononkuavo Mbombimbiliya ambupitiyua momalaka ankho ovanthu ovakuavo vapopia, ngo Siríaku, no Gótiku no Latim. Moluotyo ovanthu ovanyingi ankho vapondola okutanga Ombimbiliya melaka vanoñgonoka. Iya ankho vena onotestu vehole vali unene ngonthue hono. (Tanga Salmo 119:162-165.) Tyihambukiswa unene okutala okuti namphila ovitumino viovatumini ankho viapilauluka nomalaka apilauluka, mahi Ondaka ya Huku yatualako.

10. Pomuvo wa John Wycliffe, omokonda yatyi ovanthu ovanyingi ankho vahatangela Ombimbiliya?

¹⁰ Omanima amwe, ononkhalamutwe mbo nongeleya mbailikile ovanthu okutanga Ombimbiliya. Mahi ovanthu ankho vehole Huku kavatalamene okupitiya Ombimbiliya aiho mokonda youndyale wovanthu. Umwe puvo o John Wycliffe, wakalele ko Inglaterra momanima 1300. Ankho utavela okuti ovanthu aveho vena okutanga Ombimbiliya. Momuvo opo ovanthu mo Inglaterra nalumwe veivile Ondaka ya Huku melaka liavo. Omokonda yatyi? Omokonda Ombimbiliya ankho ilanda onombongo ononyingi iya ankho ihonekwa komankhanya. Tupu, ovanthu ankho vena Ombimbiliya kavehi. Ovanthu ovanyingi pomuvo opo ankho kavetyivili okutanga. Ovanthu ankho vaya kokapela vatehelela tyina Ombimbiliya itangwa melaka lio Latim, mahi ankho kavanoñgonoka mokonda ankho kavapopi elaka olio. Oityi ankho tyesukisa okulingwa opo ovanthu aveho alo umwe vana vehena onombongo vakale Nombimbiliya melaka liavo?​—Provérbios 2:1-5.

11. Oñgeni Ombimbiliya ya Wycliffe yakuatesako ovanthu?

¹¹ Mo 1382 John Wycliffe na vakuavo, vapitiyile Ombimbiliya mo Ingelesi. Aiihanwa okuti Ombimbiliya ya Wycliffe, ankho yuundapeswa unene notyikundyi tyitiwa Lolardos. Iya ovanthu ovo ankho vehole unene Ombimbiliya. Ankho vaenda konomphai momapunda-umbo aeho mo Inglaterra. Otyikundyi tyo Lolardos ankho vatangela ovanthu Ombimbiliya nokuveavela onokopia mbumwe mbahonekwa komankhanya. Ovilinga viavo viakuatesako ovanthu okusuka Nombimbiliya.

12. Oityi tyilekesa okuti ononkhalamutwe mbonongeleya ankho mbuyele Wycliffe notyikundyi tyo lolardos?

¹² Oñgeni ononkhalamutwe mbo nongeleya mbakalele pomuvo opo? Tete vamonesile ononkhumbi otyikundyi tyo Lolardos. Tupu, avaovola Onombimbiliya ambuho mba Wycliffe na vembuyoke. Kavalingile natyike Wycliffe, mokonda pomuvo opo ankho wankhia-le. Mahi no ngotyo wali ondyale yo nonkhalamutwe mbo Nongeleya. Mokonda ononkhalamutwe mbo nongeleya ankho mbanumana unene, ambukaheya-po omankhipa a Wycliffe ambueyoko iya omphile yatyo aveiyumbu mondongi. Namphila valambela movitateka ovio, mahi Onongeleya kambetyivilile okupola Ondaka ya Huku momitima via vana ankho veitanga. Omanima okualandulako, ovanthu ovanyingi ko Europa nokovilongo ovikuavo avahimbika okupitiya Ombimbiliya momalaka ovanthu ankho vapondola okunoñgonoka.

13. Etyi tuelilongesa konthele yokupitiya Ombimbiliya, tyituavela onthumbi patyi?

¹³ Ombimbiliya yatumwa okuhonekwa na Huku. Otyo katyilekesa okuti ovihonekwa vio Septuaginta no Rei Jaime, Nombimbiliya ya Wycliffe, novihonekwa ovikuavo viatumwa okuhonekwa na Huku. Mahi, tyina tutanga ovipuka viaenda-po opo Ombimbiliya ipitiyue, tuimbuka okuti omulao wa Jeova wokuti Ondaka yae itualako, o wotyotyili. Otyo tyitukalesa nonthumbi yokuti ovipuka aviho Jeova alaa mekevifuisapo.​—Josué 23:14.

14. Oñgeni okulilongesa Ombimbiliya tyikalesa ohole tuna na Huku?

¹⁴ Tyina tulilongesa oñgeni Jeova ayakulila Ondaka yae, tyipameka ekolelo lietu nohole yetu.c (Tala okatoi.) Omokonda yatyi Jeova etuavelela tete Ombimbiliya iya konyima eiyakulila? Omokonda ngwe utuhole iya uhanda okutulongesa pala ouwa wetu. (Tanga Isaías 48:17, 18.) Otyo tyitulunda okukala nohole nae, nokumutavela.​—1 João 4:19; 5:3.

15. Omapulo patyi matulilongesa monthele mailandulako?

¹⁵ Onthue tuhole unene Ondaka ya Huku. Mahi oñgeni matupolako ouwa tyina tutanga Ombimbiliya? Oñgeni tupondola okukuatesako vana tuvasa movilinga viokuivisa okupanda Ombimbiliya? Oñgeni vana valongesa mewaneno vapondola okukala nonthumbi yokuti etyi valongesa tyili umwe Mombimbiliya? Matulilongesa omapulo oo monthele mailandulako.