“Uhakale Notyiho, Mokonda Ame Huku Yove”

1-2. (a) Oñgeni onondaka mbuvasiwa mu Isaías 41:10 mbakuatesileko omphange Yoshiko? (b) Olie upondola okupola ouwa konondaka mbuvasiwa mu Isaías 41:10?

NTHIKI imwe, omphange umwe utiwa o Yoshiko, wapopililwe otyipuka tyimwe tyemusoyesile. Ondotolo yemupopila okuti kuakambela vala onohanyi mbehehi mankhi. Oityi Yoshiko alingile? Ahinangela otestu ehole unene, Isaías 41:10. (Tanga.) Konyima yotyo, apopila ondotolo okuti ankho kasukalalele mokonda Siovaa ukahi nokumukuatesako.b Onondaka mbo versikulu oyo mbakuatesileko omphange Yoshiko okutualako okuyumba onthumbi mu Siovaa nomutima auho. Tupu, oversikulu oyo ipondola okutukuatesako okuhasukalala tyina tuvasiwa novitateka. Opo tunoñgonoke nawa oñgeni oversikulu oyo ipondola okutukuatesako, tutalei omokonda yatyi Huku apopila onondaka ombo.

² Siovaa watumine omuuli Isaiya ahoneke onondaka ombo opo mbupameke ova Sundeu ankho mavatualwa koukonde ko Mbambilonia. Siovaa wapaka nawa onondaka ombo, opo mbahakuateseko vala ova Sundeu, mahi tupu opo mbukuateseko ovaumbili vae hono. (Isa. 40:8; Loma 15:4) Onthue hono tuesukisa unene onondaka mbukahi momukanda wa Isaiya mokonda tukahi “momuvo upuiya okukala.” — 2 Tim. 3:1.

 3. (a) Omilao patyi tuvasa mu Isaías 41:10? (b) Omokonda yatyi tuesukisila omilao ovio?

³ Monthele ei, matulilongesa omilao vitatu vya Siovaa vipameka ekolelo lietu, tuvasa mu Isaías 41:10: (1) Siovaa ukahi nonthue, (2) Siovaa o Huku yetu, iya (3) Siovaa metukuatesako. Ngomphange Yoshiko, nonthue tuesukisa omilaoc ovio mokonda tulambela movitateka ovinyingi. Tupu tuihamenwa mokonda yovipuka ovivi vikahi nokumoneka mouye uno. Alo umwe vamwe puonthue vailikwa novatumini. Pahe matulilongesa omilao ovio.

 4. (a) Omulao wo tete matulilongesa oupi? (Tupu tala onondaka pokatoi.) (b) Oñgeni Siovaa alekesa okuti ukahi nonthue? (c) Oñgeni onondaka mba Siovaa mbukukalesa?

⁴ Tete, Siovaa utupameka etyi ati: “Uhakale nowoma, mokonda ame ndyikahi no ove.”d Onkhalelo Siovaa esuka nonthue, nonkhalelo etuungumanesa ilekesa nawa okuti ukahi nonthue. Tala oñgeni onondaka ombu mbulekesa ohole ena nonthue. Siovaa wati: “Ove wakolela unene komaiho ange. Ove wahumbua unene iya ame ndyikuhole.” (Isa. 43:4) Petupu natyike matyilingisa Siovaa okuyekapo ohole ena novaumbili vae. Hinangela okuti ohole yae itualako apeho. (Isa. 54:10) Ohole ya Siovaa itukuatesako okukola omutima. Siovaa metuyakulila ngetyi ayakulile epanga liae Ambalaiau. Siovaa wemupopilile okuti: “Uhakale nowoma Ambalaiau. Ame ndyakulilo yove.” — Gên. 15:1.

5-6. (a) Oityi tyilekesa okuti Siovaa uhanda okutukuatesako tyina tuna ovitateka? (b) Oityi ongeleka ya Yoshiko itulongesa?

⁵ Tuna onthumbi yokuti Siovaa uhanda okutukuatesako tyina tulambela movitateka mokonda wetulaa okuti: “Ame ndyina ove tyina uyauka ondongi iya omaande kamaekutuala. Tyina ukahi mekundungala lyo tupia kumovauka iya otupia kamatukuyoko.” (Isa. 43:2) Oityi onondaka ombo mbuhangununa?

⁶ Siovaa ketupopila okuti metupolo ovitateka vitumonekela, mahi tupondola okukala nonthumbi yokuti kamayeke “ondongi” ine ovitateka, “notupia” ine oluihamo, vitulingisise okuyekapo okumuumbila. Siovaa walaa okuti metukuatesako ‘okuyauka’ ovitateka ovio. Mahi oñgeni metyilingi? Metukuatesako okutula omutima opo tukoleleye alo umwe tyina tuhungi kononkhia. (Isa. 41:13) Omphange Yoshiko wapopiwa konthyimbi, waimbuka okuti tyotyili Siovaa ukuatesako ovanthu vae. Omona wae wati: “Onkhalelo me akalele yetuhuvisile unene. Tuaimbukile nawa okuti Siovaa wemukuatesileko okutula omutima. Me watuaileko okuava oumbangi ko nofulumelu novanthu ovakuavo vavela, alo monthiki anyima.” Oityi ongeleka yomphange Yoshiko itulongesa? Itulongesa okuti inkha tuyumba onthumbi momulao wa Huku wokuati “ame ndyikahi no ove,” nonthue matukoleleya movitateka nomutima wakola.

7-8. (a) Omulao wa vali matulilongesa oupi, iya oityi uhangununa? (b) Omokonda yatyi Siovaa apopilile ova Sundeu vatuailwe koukonde okuti: “Uhakale notyiho”? (c) Onondaka patyi tuvasa mu Isaías 46:3, 4, mbakuatesileko ovanthu va Huku okuhakala nowoma?

⁷ Tala omulao wa vali Siovaa atuma Isaiya ahoneke: “Uhakale notyiho, mokonda ame Huku yove.” Oityi onondaka ombo mbuhangununa? Melaka lyo Hebeleu, onondaka “okukala notyiho” mbuhangununa okuleuka-leuka konyima mokonda yokuatila owoma wokuti hamwe kupondola okuya otyipuka tyimulinga omapita.

⁸ Omokonda yatyi Siovaa apopilile ova Sundeu ankho mavatualwa koukonde opo “vahakale notyiho”? Omokonda utyii okuti ankho makuya omuvo umwe ova Mbambilonia mavatili owoma. Oityi ankho matyivetilisa owoma? Tyina ova Sundeu vamakala omanima 70 koukonde, ova Mbambilonia ankho mavautukilwa nova Medo-Persia. Siovaa ankho maundapesa ova Medo-Persia opo ayovole ova Sundeu ankho veli koukonde mo Mbambilonia. (Isa. 41:2-4) Etyi ova Mbambilonia novanthu vovilongo ovikuavo veiva okuti ova Medo-Persia vekahi nokuya, avahimbika okulipameka poyavo okuti: “Tuhatilei owoma.” Tupu avalingi vali ovilolo, nonthumbi yokuti mavivekuatesako. (Isa. 41:5-7) Mahi Siovaa apameka ovaumbili vae etyi ati: “Ove Isilayeli, ove umuumbili wange . . . Uhakale notyiho, mokonda ame Huku yove.” (Isa. 41:8-10) Tala etyi Siovaa apopia okuti “ame Huku yove.” Nonondaka ombo, Siovaa walekesa kovaumbili vae okuti kevelimbuilwe. Siovaa ankho nkhele o Huku yavo iya ova Isilayeli ankho nkhele ovanthu vae. Tupu, wevepopilile okuti: “Ame mandyimutyindi . . . iya andyimuyovola.” Onondaka ombo, mbapamekele unene ova Sundeu vatuailwe koukonde. — Tanga Isaías 46:3, 4.

9-10. Katuesukisile okutila owoma mokonda yatyi? Popia ongeleka.

⁹ Hono, ovanthu vasukalala unene mokonda ovipuka ovivi vikahi nokuvilapo. Iya nonthue tuihamenwa novitateka ovio. Mahi katuesukisile okutila owoma. Siovaa utupopila okuti: “Ame Huku yove.” Mahi oñgeni onondaka ombo mambutukuatesako okutula omutima?

¹⁰ Soka kongeleka ei: Ñgeno Suau na Mingu vekahi nokulinga oungendi no aviau, iya o aviau aihimbika okutenga-tenga mokonda yomphepo. Liwa-liwa omutahi evepopila okuti: “Kuatesei, mokonda kualinga omphepo.” Suau asukalala unene. Mahi omutahi evepopila vali okuti: “Muhakalei notyiho, matuhiki nawa.” Mokonda Suau kayumbile onthumbi monondaka mbomutahi, apuku komutwe iya ati: “Pahe ngotyo watiwi?” Etyi Suau aimbuka okuti Mingu katilile owoma, emupulu okuti: “Omokonda yatyi ove uhatililile owoma?” Mingu elimemetela okuyola iya emupopila okuti: “Omokonda ame omutahi ndyimwii nawa. O tate!” Tupu ati: “Kevela ndyikupopile oñgeni tate ataha opo nove utule omutima.”

11. Oityi tulilongesila kongeleka ya Suau na Mingu?

¹¹ Oityi tulilongesila kongeleka oyo? Nga Mingu, nonthue tuatula omutima mokonda twii nawa Tate yetu wo keulu, Siovaa. Onthue tuna onthumbi yokuti metukuatesako okulambela movitateka tukala navio mononthiki mbuno mbonthyulilo. (Isa. 35:4) Namphila ovanthu ovanyingi vomouye vasukalala, mahi onthue tuatula omutima mokonda tuyumba onthumbi mu Siovaa. (Isa. 30:15) Tupu, tuhetekela Mingu tyina tupopila vakuetu omahunga vena opo vayumbe onthumbi mu Huku. Inkha tulinga ngotyo, navo mavakala nonthumbi yokuti katyesukisile ovitateka patyi mavakala navio, Siovaa mevekuatesako.

12. (a) Omulao wa tatu matulilongesa oupi? (b) Ondaka ‘okuvoko’ kwa Siovaa ituhinangelesa-tyi?

¹² Tala omulao wa tatu Siovaa atuma Isaiya ahoneke. Wati: “Mandyikupameka iya mandyikukuatesako.” Isaiya wapopile-ale oñgeni Siovaa ankho mapameka ovaumbili vae etyi ati: “Siovaa meya nepondolo, iya makatumina nokuvoko kwae.” (Isa. 40:10) Ovikando ovinyingi, Ombimbiliya yuundapesa ondaka ‘okuvoko’ opo ipopie epondolo. Ngotyo, onondaka “makatumina nokuvoko kwae” mbutuhinangelesa okuti Siovaa Ohamba ina epondolo enene. Siovaa waundapesile epondolo liae opo akuateseko, nokuyakulila ovaumbili vae kohale, iya no hono utualako okupameka nokuyakulila vana vemuyumba onthumbi. — Deu. 1:30, 31; Isa. 43:10, okatoi.

13. (a) Haunene onalupi Siovaa etupameka? (b) Omulao patyi utupameka?

¹³ Haunene tyina tumoneswa ononkhumbi, Siovaa ufuisapo omulao wae wati: “Mandyikupameka.” Movilongo vimwe onondyale mbetu mbukahi nokulinga atyiho opo vailike ovilinga vietu. Mahi no ngotyo, onthue katutili owoma. Siovaa walaa otyipuka tyitupameka unene. Wati: “Oviti aviho mokatulilwa opo vikuluise, kamavikulingi natyike.” (Isa. 54:17) Onondaka ombo mbutuhinangelesa ovipuka vitatu viakolela unene.

14. Omokonda yatyi katupondola okuhuva tyina onondyale mba Huku vetumonesa ononkhumbi?

¹⁴ Tete, mokonda tuvalanduli va Sesusi Kilisitu, tukevelela okuti matuyalwa. (Mat. 10:22) Sesusi waulile okuti mononthiki mbonthyulilo, ovalanduli vae mavamoneswa ononkhumbi. (Mat. 24:9; Suau 15:20) Vali, Isaiya wapopia okuti onondyale mbetu kamavetuyale vala, mahi tupu mavaundapesa oviti ovinyingi opo vetuluise. Oviti ovio viakutikinya omatutu konthele Yonombangi mba Siovaa, nokumoneswa ononkhumbi. (Mat. 5:11) Tutyii okuti Siovaa kamatalameka onondyale mbetu opo vehetuluise. (Efe. 6:12; Ehol. 12:17) Mahi katuesukisile okukala nowoma. Omokonda yatyi?

15-16. (a) Otyipuka tya tatu tuna okuhinangela otyipi iya oñgeni Isaías 25:4, 5 ityilekesa nawa? (b) Oñgeni Isaías 41:11, 12 ipopia etyi matyikamonekela onondyale mbetu?

¹⁵ Tala otyipuka tya tatu tuna okuhinangela. Siovaa wapopia okuti “oviti aviho” onondyale mbetu mbuundapesa opo vetuluise ‘kamavitulingi natyike.’ Ngetyi ondyuo ituyakulila kombila yongandavila, Siovaa nae utuyakulila kovanthu vahanda okutulinga omapita. (Tanga Isaías 25:4, 5.) Onondyale mbetu nalumwe mavalingi otyipuka tyipondola okutulingisa okuyekapo okuumbila Siovaa. — Isa. 65:17.

¹⁶ Tupu Siovaa utupameka mokutupopila nawa etyi matyikamonekela vana “vetunumanena.” (Tanga Isaías 41:11, 12.) Onondyale mbetu mbupondola okutulwisa, mahi onthue tuna onthumbi yokuti onondyale mbovanthu va Huku apa katutu “mambukanyimuako.”

17-18. (a) Oñgeni okutanga Ombimbiliya tyiyawisa onthumbi yetu mu Huku? Popia ongeleka. (b) Oñgeni okusokolola kotestu yenima lino matyitukuatesako?

¹⁷ Tuyumba vali onthumbi mu Siovaa tyina tumunoñgonoka nawa. Iya onkhalelo ikahi nawa yokunoñgonoka Huku, okutanga Ombimbiliya nokusokolola ku etyi tuatanga. Ombimbiliya itupopila oñgeni Siovaa ayakulilile ovaumbili vae kohale. Omahipululo oo etukalesa nonthumbi yokuti hono Siovaa metukuatesako.

¹⁸ Tala onondaka Isaiya apopia opo alekese onkhalelo Siovaa etuyakulila. Waeleka Siovaa nomunthita iya ovaumbili vae eveeleka nonongi. Tala etyi Isaiya apopia konthele ya Siovaa, wati: “Nokuvoko kwae maongiya onongi iya embutyindi ponkhondo.” (Isa. 40:11) Tyina Siovaa etukuatesako, tulitehelela okuti ukahi nokutuyakulila, iya otyo tyitukuatesako okutula omutima. Opo tutule omutima tyina tuvasiwa novitateka, omupika wekolelo nokualunguka waholovona Isaías 41:10 opo ikale otestu yenima lyo 2019. Yati: “Uhakale notyiho, mokonda ame Huku yove.” Sokolola konondaka ombo. Otestu ei maiketupameka unene movitateka mavikamoneka komutwe wandyila.