Omamonekelo Konthele Yovipuka Vikahi Keulu

“Keulu ankho kuna otyipundi tyoutumini iya ankho kuna umwe wapumphama kotyipundi. Iya wapumphama kotyipundi otyo, ankho welifua nemanya litiwa jaspe, tupu ankho welifua nemanya enkhuhu iya kononthele mbo tyipundi ankho kuna omphumba yeliseta notyipundi yelifwa nemanya litiwa esmeralda.”—Revelação 4:2, 3.

“Ankho mokati muna otyitei tyikahi ngo mphumba mokati kekaka likahi nokuliaima. Tupu ankho muna otyipuka tyikahi nokuliaima. Ankho tyikahi nge nkhimano lia Jeova.”—Ezequiel 1:27, 28.

Omamonekelo oo alekeswa apostolu João nomuuli Ezekiele, alekesa enkhimano lio Mukulami Jeova, novipuka onthue tupondola okumona, ngetyi omamanya aliaima, nomphumba, nenkhimano lio tyipundi. Etulongesa okuti Jeova ukahi nawa, una okankhenda tupu una ombembwa.

Ovipuka ovio konthele ya Jeova vielikuata no nondaka mbo muhoneki wono salmu wapopia okuti: “Jeova omunene iya watokala okuhilivikwa. Omunene kono huku ononkhuavo. Ono huku mbovanthu, ono huku mbehena esilivilo, mahi Jeova oe walinga eulu. Enkhimano liae enene iya ewa, kotyipundi tyae kuna epondolo enene.”—Salmo 96:4-6.

Namphila Jeova Omukulami, mahi no ngotyo utukonga opo tufuene kwe tyina tulikuambela iya tupu utupopila okuti metutehelela. (Salmo 65:2) Huku utuhole iya wesuka nonthue, otyo apostolu João apopia nonthumbi okuti: “Huku oluembia.”—1 João 4:8.

“[Omulongwa Estevau] nokueyula ospilitu sandu, watala keulu iya amono omunkhima wa Huku, na Jesus utai kokulio kwa Huku iya apopi okuti: ‘Tala! Namona eulu liaikuka Nomona wa Huku utai kokulio kwa Huku.’”—Atos 7:55, 56.

Etyi Estevau ehenemone emonekelo olio, Jesus wakuatelue aipawa na vana Estevau akapopia navo ononkhalamutwe mbo va Judeu. Emonekelo olio lilekesa okuti Jesus ankho una omuenyo iya ankho watutiliswa tupu wankhimanekua. Konthele yotyo apositolu Paulu ahoneka okuti: “[Jeova] wemupindula-po [Jesus] pokati kaava vokuankhia emupumphika kokulio kwae ponomphangu mbo keulu, omunene vali tyipona omautumini aeho iya nomanyina aeho omunkhima, tyilinge mouye uno nou mauya.”—Efésios 1:20, 21.

Pala okupopia vali nawa konthele yonkhalelo oyo, Ovihonekwa vilekesa okuti Jesus na Jeova vena esuko novanthu. Mokueenda kuovilinga viae pano pohi, Jesus wahakulile ovavei iya atutilisa wokuankhia. Ononkhia mba Jesus mbulekeKokulio kwa Huku, Jesus makaundapesa outumini wae iya akaetela ononkhano onongwa ovanthu vetavela Huku youye auho.

“Ame [omuuli Daniele] ankho ndyikahi nokutala alo kuaetwa otyipundi otyinene tyohamba iya Omukulu wo Nonthiki [Jeova] apumphama. . . . Omakwi nomakwi vemuumbila iya ovityita novityita viomakwi vakala lutai kolupala lwae.”—Daniel 7:9, 10.

Memonekelo olio, Daniele kamuene vala oandyu ike, mahi wamuene onoandyu ononyingi. Emonekelo olio lihuvisa unene! Onoandyu ovanthu vahamonwa vankhimana, ovanongo iya vena epondolo. Tyati mbumwe ono serafim iya ononkhuavo ono kerubin. Ombimbiliya ipopia onoandyu ovikando vilamba po 250.

Onoandyu havanthu vokohale ankho vakalele pano pohi. Huku walinga onoandyu kohale etyi nkhele ehenelinge ovanthu. Etyi ohi yapwa okutungwa, onoandyu mbamona okuti ohi yehiwa iya ambuhakela tyahambukwa.—Jó 38:4-7.

Onkhalelo imwe onoandyu mbuundapela Huku o mokulipaka movilinga viakolela vali vikahi nokulingwa hono, ovilinga viokuivisa onondaka onongwa Mbouhamba wa Huku. (Mateus 24:14) Onkhalelo mbulipaka movilinga ovio yapopiwa memonekelo lia apostolu João wahoneka okuti: “Ame namona oandyu onkhuavo inthanana meulu, ina onondaka onongwa mba apeho pala okuivisa, no nondaka onongwa pala vana vakala kombanda yoohi, momalongo aeho momihoko aviho, no momalaka aeho iya novanthu aveho.” (Revelação 14:6) Namphila onoandyu mbahapopi novanthu hono ngetyi ankho mbulinga kohale, mahi mbukuatesako vana vekahi movilinga viokuivisa onondaka onongwa kuvana vena omutima weliola.

“Kuakatuka ovilwa ovinene keulu: Mingeli [Jesus Kristu] no noandyu mbae avalwisa enyoka iya enyoka no noandyu mbalio, nambo otyo mbulwa, mahi oe katuaileko, avahakala vali nomphangu keulu. Ngotyo, ongandu onene yatahelwa pombuelo, onyoka yokonthuko, iihanwa okuti Eliapu tupu Satanasi, likahi nokuyondya ovanthu aveho, liatahelwa pombuelo, pohi, no noandyu mbalio mbatahelwa kumwe nalio pombuelo.”—Revelação 12:7-9.

Keulu ankho hapeho kuna ombembwa. Mokueenda kuomanima omanyingi, oandyu imwe yakala nehando liokufendwa, aityitukilapo Jeova, aikala Satanasi, tyihangununa okuti “Ondyale.” Onoandyu ononkhuavo nambo ambulipake moumphuki wae iya ambukala ovilulu. Katutu-katutu eliapu, liahindila ovanthu opo velipake moumphuki wae wokuyala Jeova nokuanya ehongolelo liaviuka lia Jeova.

Satansi novilulu viae valinga ovivi iya ovakalavi. Onondyale mbovanthu aveho iya ovo vaeta ononkhumbi pano pohi. Mongeleka, Satanasi waipaele ovipako novaundapi va Job omulume ankho una ekolelo. Konyima, aipaa ovana aveho ekwi va Job “notyipepe tyimwe otyinene” etyi vatokelwa nondyuo. Okuhulililako, Satanasi avelesa Job “novinthimba ovivi, okupolelela konomphai alo pokati komutwe.”—Jó 1:7-19; 2:7.

Apa katutu, Satanasi makahanyuako. Tunde apa atahelwa pano pohi, Satanasi utyii okuti “omuwo wae kauhi.” (Revelação 12:12) Satanasi makahanyuako iya otyo tyituhambukiswa!

“Ove [Jesus] walanda ovanthu pala Huku, momihoko aviho, no momalaka aeho, no momalongo aeho iya wevelinga opo vakale onohamba novanakwa pala Huku yetu, opo vakatumine ngo nohamba kombanda yohi.”—Revelação 5:9, 10.

Ngetyi Jesus atutiliswa opo akakale nomuenyo keulu, navakuavo tupu otyo mavakalingwa. Jesus wapopilile ono apostolu mbae vekolelo okuti: “Ame ndyienda opo ndyikemupongiyile omphangu, . . Tupu, mandyiya vali okumupola amukakala naame, opo nonwe mukale apa ame ndyikahi.”—João 14:2, 3.

Vana mavaende keulu vena etyi mavakalinga. Nga Jesus, navo mavakatumina Mouhamba wo keulu maukatumina ovanthu aveho iya katutu-katutu maukaetela ovanthu aveho onokhano onongwa. Oo, Ouhamba Jesus apopilile ovalongwa vae opo velikuambele okuti: “Tate yetu keulu, enyina liove lisukukiswe. Ouhamba wove uye. Ehando liove lilingwe pano pohi, ngetyi lilingwa keulu.”—Mateus 6:9, 10.

“Ame [apositolu João] neiva ondaka imwe yakaluluka potyipundi tyoutumini, yati: ‘Tala! Ekaka lia Huku likahi pokati kovanthu iya oe makakala navo, ovo mavakakala ovanthu vae. Iya Huku muene makakala navo. Huku makasekuna ononkhuka momaiho avo, ononkhia, okulila, no nongembia kamavikakalako vali. Mokonda ovipuka ovio aviho mavikalamba.’”—Revelação 21:3, 4.

Emonekelo olio lilekesa nawa omuvo Ouhamba wa Huku, omu muakutikinya Jesus novanthu mavakatutiliswa avaende keulo, maukamanako outumini wa Satanasi iya ohi aikala omphangu yombembwa. Ovipuka vihole okutuetela omaluihamo nonongembia iya nevi vihole okuihamesa vali unene ovanthu alo umwe ononkhia, kamavikakala-ko vali.

Okuti otyinyingi tyo vanthu vankhia, mavakatutiliswa opo vakakale keulu? Komutwe wandyila mavakapewa omuenyo opo vakale nekevelelo liokukala-ko apeho Momphangu yombembwa pano pohi.—Lucas 23:43.