4. Yekapo ovipuka viasila

Okuti upwena? Tutyii okuti katyapepukile okutyiyekapo. Mahi otyipuka matyikupe umwe ononkhono utyiyekepo, okusoka nawa oñgeni okupwena (okusipa) tyikukalesa ove muene na vakwenyi muhimama navo. Tangei Mateusi 22:37-39, amutomphola omapulo aa:

• Omunthu wokupwena, tyitavela alinge epanga lya Siovaa Huku?

• Ine omunthu upwena, vomeumbo liavo na ava ehimama navo, vakala ñgeni?

Soka etyi upondola okulinga utyiyeke-po tyokupwena.a Talei OVIDIU.

OVIDIU: Likondola Omutima (2:47)

Tangei Ova Filipu 4:13, amutomphola epulo eli:

• Oñgeni okulikuambela apeho, nokutanga Ombimbiliya, nokuenda komaliongiyo tyipa omunthu ononkhono etyivile okuyekapo okulinga otyipuka tyimwe Siovaa ahahande?

5. Tutumba umwe wahasoke kovipuka viasila, tupu wehevilinge

Tangei Ova Kolosu 3:5, amutomphola omapulo aa:

• Ovipuka vimwe viakaka unene ovievi: okulikwata-kwata komapita, okutala nokutanga evi vihindila ovanthu okulinga ovipengi, okulituma onomesasi mbupopia umwe vala ovipuka viasila. Mahi pahe okusoka ko tesitu tuatanga, Siovaa ovipuka ovio uvitala-vo ñgeni?

• Okuti ñgaa tyitavela umwe tukale ovanthu vasukuka, atuahalingi ovipuka evi Siovaa apopia okuti viasila? Oityi wapopila ngotyo?

Tala oñgeni motyivili okuyekapo ovipuka Huku ati viasila. Talei OVIDIU.

OVIDIU: Weheliyekele Ovipuka Viasila (1:51)

Nthiki imwe, Sesusi wapopile onondaka mbumwe, okumbusoka nawa, ankho uhanda vala okupopia okuti tuna okututumba tukale ovanthu vasukuka ku Huku. Tangei Mateusi 5:29, 30, amutomphola epulo eli:

• Sesusi ankho keli-ko nokupopia okuti tuna okulityoka-tyoka. Ankho uli vala nokupopia okuti tuna okulipola ovipuka aviho vipondola okutulingisisa onkhali ku Huku. Ku ove, ovipuka patyi omunthu ena okulinga ahasoke kovipuka viasila vipondola okumulingisisa okulinga onkhali?b

Ine uli nokulikuatehila wahasoke kovipuka viasila, Siovaa Huku upandula unene ononkhono uli nokulinga. Tangei Salmo 103:13, 14, amutomphola epulo eli:

• Ine una nokulikuatehila uyekepo okulinga ovipuka viasila, oñgeni okuhinangela onondaka mbo tesitu ei matyikukuatesako?

Wahaponwe!

Pamwe tulikuatehila umwe tuyekepo okulinga otyipuka tyimwe tyinumanesa Siovaa, mahi tukati vala ñgaa, tuetyipaleka vali. Otyipuka otyo tyipondola okutuponeswa, atusoyo umwe! Otyo tyikahi vala ngovanthu vokuhateka opo vafetwe. Pamwe pokuhateka, umwe upondola okulifondoka atoko. Okuti nga apindukapo, una vali okukahimbikila oku vatundilila-le? Okuti pahe ngotyo kesilivila umwe vali? Au! Tyina uhanda okuyekapo otyipuka tyimwe, ukati ñgaa wetyilinga vali, hakuti ngotyo kusilivila vali. Omunthu ongotyo umwe! Vimwe tuetyiliya-le viapenga, kavipuiya-le okuviyekapo, mahi vimwe tuna okututumba ehimbwe. Tyihanda vala okupindukapo, atutualako ngovanthu vokuhateka! Siovaa mekukuatesako, otyivili umwe okuyekapo ovipuka ovio ovivi, viasila.

6. Oityi omunthu wokunwa unene apondola okulinga etyiyekepo?

OVIDIU: ‘Ankho Hesukile Vali Nomuenyo Wange’ (6:32)

• Ngetyi tuamona movidiu, oñgeni Dmitry ankho akala nga anwa?

• Okuti monthiki ati ‘okutuka hono himanwa-anwa vali,’ wetyivilile okutyiyekapo?

• Oityi tyemukuatesako etyivili okuyekapo okunwa unene?

Tangei 1 Ova Kolindu 6:10, 11, amutomphola omapulo aa:

• Okuti okunwa unene onkhali onene ku Huku?

• Oityi tutila omunthu onkholwa upondola okutyiyekapo, akala umwe nawa?

Tangei Mateusi 5:30, amutomphola epulo eli:

• Etyi Sesusi ati tuna okutyoka-ko okuvoko kwetu, ankho uhanda vala okupopia okuti opo tuhambukiswe Siovaa, pamwe tuna okulikuatehila tuyekepo okulinga ovipuka vimwe, naapa umwe tyahapepukile. Ine kutyivili okuliteta, unwa unene, mahi kwetyihandele vali, oityi upondola okulinga utyiyekepo?a

Tangei 1 Ova Kolindu 15:33, amutomphola epulo eli:

• Oityi wesukisila okutala nawa omapanga ove?