Ankho Vakevelela Mesiya

“Ekevelelo liovanthu ankho litualako okuliyawisa, iya ankho vasoka okuti tyafuile João oe Mesiya.”—LUCAS 3:15, NOVA TRADUÇÃO NA LINGUAGEM DE HOJE.

 1. Onondaka patyi onongwa mbehambu oandyu yapopila ovanthita?

ANKHO o kounthiki, iya ovanthita vamwe vekahi mohika, vayunga onongi mbavo. Liwa-liwa oandyu ya Jeova aitalama ponthele yavo, iya otyimimi tyomunkhima wa Huku atyiliaimina apa vekahi! Vatila owoma, mahi avatehelela onondaka onongwa mbehambu oandyu ivepopila okuti: “Muhakalei nowoma, tyetyi ame ndyimupopila onondaka onongwa mbehambu limwe enene ovanthu aveho mavakala nalio. Mokonda hono muatyitilwa Omuyovoli, Kristu Tatekulu.” Oandyu ankho ipopia olukembe luna malukakala Kristu, ine o Mesiya. Oandyu yapopila ovanthita okuti mavavasi olukembe olo lualangekwa momutemba popepi nepundaumbo. Iya liwa-liwa akumoneka onoandyu ononyingi, ambuhivilika Jeova, okuti: “Ehilivikwa olia Huku komikulamo vieulu, iya kombanda yoohi kukale ombembwa pokati kovanthu oe apanda.”—Lucas 2:8-14.

 2. Ondaka “Mesiya” ihangununa tyi? Oñgeni ovanthu ankho mavaimbuka olie tyili Mesiya?

² Ovanthita ovo ova Judeu, ankho vetyii okuti Mesiya ine “Kristu” Omulembulwa wa Huku. (Êxodo 29:5-7) Anthi, oñgeni ovanthita ovo novanthu vakuavo ankho vapondola okunoñgonoka vali nokuiwa okuti Jeova waholovona olukembe olo opo lukale Mesiya? Tete, ankho vesukisa okulilongesa omaulo konthele ya Mesiya Movihonekwa, iya avatale inkha omaulo oo maafuisuapo mononthiki mbomuenyo womona oo.

Ovanthu Ankho Vakevela Mesiya Mokonda Yatyi?

3, 4. Oñgeni eulo livasiwa mu Daniel 9:24, 25 liafuisuapo?

³ Etyi palamba omanima omanyingi, João Batista ahimbika ovilinga viae viokuivisa. Mokonda yovipuka ankho alinga nevi apopia, ovanthu vamwe avahimbika okusoka okuti tyafuile oe o Mesiya. (Tanga Lucas 3:15.) Mahi Mombimbiliya, muna eulo lipopia konthele yo nosimano 70, liakuatesako ovanthu okunoñgonoka onalupi Mesiya mamoneka. Eulo olio liati: “Ovanthu vove, vatokolelwa onosimano omakwi epandu-vali . . . Tunde pokuawa kuotyitumino tyokupindulapo nokutunga vali o Jelusalei, alo pokuya kwa Mesiya Omutumini, mapalambe onosimano epandu-vali, tupu, no nosimano omakwi epandu no nosimano onombali.” (Daniel 9:24, 25) Ovanongo konthele Yombimbiliya vetavela okuti ombo ha nosimano mbo nonthiki epandu-vali, mahi onosimano mbomanima. Ngotyo, kese imwe po nosimano ombo, ina omanima epandu-vali. Ombimbiliya Revised Standard Version yapopia konthele ya Daniel 9:24 okuti: “Onosimano omakwi epandu-vali mbomanima mbapopiwa.”

⁴ Hono, ovanthu va Jeova vetyii okuti onosimano 69 mu Daniel 9:25 mbutuuka omanima 483, nokuti ahimbika menima 455 etyi Kristu eheneye. Menima olio, opo Ohamba yo Persia Artaxerxe apopila Neemia akapindulepo nokutunga vali o Jelusalei. (Neemias 2:1-8) Omanima oo 483 apwa menima 29 etyi Jesus ambatisalwa. Pomuwo opo, Jeova walembula Jesus nospilitu sandu iya akala Mesiya.—Mateus 3:13-17.a—Tala okatoi.

 5. Matulilongesa konthele yomaulo patyi?

⁵ Mombimbiliya, muna omaulo omakuavo omanyingi apopia konthele ya Mesiya. Matukelilongesa amwe monthele ino. Omaulo oo, apopia konthele yokutyitwa kwae, no yomuenyo wae puetyi omona, netyi ekula, novilinga viae viokuivisa. Matukelilongesa oñgeni omaulo elifwilapo mokueenda kuomuenyo wa Jesus. Otyo matyipameka ekolelo lietu Mombimbiliya, nokulekesa okuti Jesus o Mesiya una ovanthu ankho vakevela.

Omaulo Konthele Yomanima Otete Omuenyo Wae

 6. Oñgeni eulo lia Gênesis 49:10 liafuisuapo?

⁶ Mesiya ankho matundu momuhoko wa Judaa mo Isilayeli. Etyi nkhele Jako ehenenkhie, wakanenene nawa ovana vae, iya Judaa emuti: “Onkhunye kamaihondovoka ku Judaa, nomphangoti yokutumina kamaikala kokule no nomphai mbae, alo Siloo eya, iya omalongo aeho maakatavela kwe.” (Gênesis 49:10) Ovalongesi ova Judeu apeho ankho vatavela okuti onondaka Jako apopila Judaa, ankho mbupopia konthele ya Mesiya. Mahi onondaka mba Jako mbuhangununa tyi? Onthwe twii okuti upopia konthele yohamba mokonda onkhunye nomphangoti yomutumini, ankho oviti vityindwa nohamba, pala okulekesa okuti oe una evililo liokutumina nokuava ovitumino. Ngotyo, eulo olio lilekesa okuti momuhoko wa Judaa mamutundu ohamba, una wokuna evililo liokutumina. Ohamba yotete yatunda mu Judaa, o David, iya yahulililako o Zedekia. Mahi, eulo lia Jako liapopia konthele yohamba onkhuavo konyima ya Zedekia. Ohamba oyo, maikakala ohamba yaapeho. Oe wiihanua okuti o Siloo, tyilekesa okuti oe ‘watokala outumini.’ Huku watolela Zedekia okuti ohamba oyo, oe una wapeua evililo liokutumina. (Ezequiel 21:26, 27) Etyi Jesus ehenetyitwe, oandyu Gabrieli yapopila Maliya okuti: “Jeova Huku memuavela otyipundi tyoutumini tya David tate yae. Oe makala ohamba mondyuo ya Jako apeho, iya ouhamba wae kamaukakala nonthyulilo.” (Lucas 1:32, 33) Jesus watundile momuhoko wa Judaa, no mombunga ya David. Konyima ya Zedekia, Jesus ankho oe vala mombunga ya David, Jeova alaa okuavela ouhamba. Moluotyo, Siloo o Jesus Kristu vala.—Mateus 1:1-3, 6; Lucas 3:23, 31-34.

 7. Oñgeni eulo konthele yokutyitwa kwa Mesiya liafuisuapo?

⁷ Mesiya ankho matyitilwa mo Mbelei. Omuuli Mikeia wahoneka okuti: “Ove Mbelei Efrata, upundaumbo etutu unene pala okukala pokati komapundaumbo omanyingi o Judaa, muove mamunthundila una makala omutumini mo Isilayeli, una wonthuko yatunda komivo viokohale, tunde kononthiki mbomivo vihapu.” (Miquéias 5:2) Eulo olio litutolela okuti Mesiya ankho matyitilwa mo Mbelei. O Mbelei ankho epundaumbo lio Judaa ankho litiwa Efrata. Mahi, Maliya ina ya Jesus, nomulume wae Jose, ankho vakala mo Nazare. Etyi tyati popepi nokutyitwa kwa Jesus, omutumini wo Roma atumu ovanthu aveho kovilongo vatyitilwa vekelihonekese. Maliya na Jose avaende ko Mbelei kuna Maliya akutulila Jesus. (Mateus 2:1, 5, 6) Ngotyo, okutyitwa kwa Jesus kuaenda umwe ngetyi eulo liapopia.

8, 9. Oityi eulo liapopia konthele yokutyitwa kwa Mesiya? Oityi tyaendelepo etyi Mesiya atyitwa?

⁸ Mesiya ankho makutulwa nomufikuena omumphembela. (Tanga Isaías 7:14.) Oversikulu oyo ipopia okuti otyitumphua matyikutula omona. Ondaka omumphembela, mo Hebreu itiwa bethulah. Oversikulu oyo yaundapesa almah, ondaka ihangununa okuti “otyitumphua.” Mahi, onthue tutyii okuti almah tupu ihangununa okuti “omumphembela,” mokonda Ombimbiliya iihana Rebeka okuti otyitumphua (almah) puetyi ehenenepwe. (Gênesis 24:16, 43) Ononkhono mba Huku mbakuatesako Mateusi okuhoneka okuti Isaías 7:14, yafuiswapo etyi Jesus atyitwa. Moversikulu oyo, oe kaundapesila ondaka yo Gregu ipitiyua “otyitumphua.” Waundapesa ondaka parthenos ilekesa okuti “omumphembela.” O Evandyeliu ya Mateusi na Luka, yati Maliya ankho omumphembela, iya akala omulemi kononkhono mba Huku.—Mateus 1:18-25; Lucas 1:26-35.

⁹ Tyina Mesiya amatyitwa, makuipawa ovana. Otyo tyilifwa netyi tyaendeleko kohale etyi Mesiya ehenetyitwe. Farao yo Egitu watumine ovanthu vayumbe Mondongi Nilu kese lukembe omulume omu Hebreu. (Êxodo 1:22) Eulo lia Jeremias 31:15, 16, lipopia konthele ya “Rakele ulila ovana vae,” mokonda onondyale mbaya navo. Ovanthu veiva etyi oe eliyavela kokule ko Ramaa, mo Benjamim, kokulio kwo Jelusalei. Mateusi ututolela okuti eulo olio liafuisuapo etyi Ohamba Herode atuma okuipaa ovana aveho ovakuendye mo Mbelei. (Tanga Mateus 2:16-18.) Soka omuihamo ovanthu vali nao!

10. Oñgeni eulo lia Oséias 11:1 liafuisuapo?

¹⁰ Mesiya makaihanwa ko Egitu. (Oséias 11:1) Opo Jesus ahaipawe no Hamba Herode, oandyu yatolela Jose na Maliya vatuale Jesus ko Egitu. Avakalako alo Herode ankhia. Etyi Herode ankhia, Jose akondoka na Jesus ko Isilayeli. Etyi Jeova apopile Oseia tyelifuilapo, oe wati: “Omona wange ko Egitu nemuihana ko.” (Mateus 2:13-15) Tyotyili, Jesus ankho kapondola okuliyunga kovipuka viamoneka pokutyitwa kwae momanima otete omuenyo wae.

Mesiya Uhimbika Ovilinga Viae!

11. Olie wapendyela Mesiya ondyila?

¹¹ Omutumwa mapendye ondyila pala Mesiya. Malakia wapopia okuti makuya umwe mapendye ondyila pala Mesiya. Oe ankho mavatela ovanthu okukala tyelipongiya opo vatavele Mesiya tyina ameya. Malakia wemuihana okuti omuuli Eliya. (Tanga Malaquias 4:5, 6.) Jesus wapopia okuti João Batista ankho ukahi nga Eliya. (Mateus 11:12-14) Marku wati João wapendya ondyila. Otyo, otyo Isaia aulile. (Isaías 40:3; Marcos 1:1-4) Jesus katumine João opo emupendyele ondyila. Huku wahandele ovanthu vaimbuke olie Mesiya. Otyo Huku aholovonena João opo alinge ovilinga vielifwa no via Eliya, nokukuatesako ovanthu opo vayakule Mesiya.

12. Otyilinga patyi tyakolela Huku apele Mesiya?

¹² Huku ankho mape Mesiya otyilinga tyakolela. Onthiki imwe Jesus ankho ukahi mondyuo yokufendela mo Nazare. Iya aikula ombuingwa atange onondaka mba Isaia, mbati: “Ononkhono mba Jeova mbukahi kuame, mokonda oe wanaka ame opo ndyiivise onondaka onongwa kovahepi. Wanthuma opo ndyiivise eyovo ko nonkhuatwa, nokupatula omaiho ovamphoki, nokuyovola vokuamona ononkhumbi. Opo ndyiivise enima liaviuka nawa lia Jeova.” Iya Jesus ati eulo olio, oe lipopia. Tyotyili ankho oe Mesiya. Otyo Jesus apopila okuti: “Hono ovihonekwa evi muamana okutehelela viafuiswapo.”—Lucas 4:16-21.

13. Oityi Isaia apopia konthele yovilinga via Jesus viokuivisa mo Galileia?

¹³ Eulo limwe litupopila konthele yovilinga via Mesiya mo Galileia. Isaia waula konthele ya “Zebulau” no “Naftali” no “Galileia yomalongo.” Oe wahoneka okuti: “Ovanthu ankho vaenda menthiki, vamona otyimimi otyinene. Iya vana vakala mofika yenthiki enene, otyimimi tyeveliaimina.” (Isaías 9:1, 2) Jesus wahimbikila ovilinga viae mo Galileia, mepundaumbo litiwa Kafarnau. Tupu walongesa movilongo vio Zebulau no Naftali. Jesus wakuatesako ovanthu movilongo ovio okuvelongesa otyili tyaliaima ngotyimimi otyinene. (Mateus 4:12-16) Omo Galileia Jesus alingila Elongomona liae lio Komphunda, nehuviso liae liotete, nokuholovona ono apostolu mbae. Tupu omo Galileia Jesus amonekela ovalongwa valamba po 500 etyi atutila. (Mateus 5:1–7:27; 28:16-20; Marcos 3:13, 14; João 2:8-11; 1 Coríntios 15:6) Ngotyo eulu lia Isaia liafuisuapo etyi Jesus aivisa “motyilongo tyo Zebulau no Naftali.” Tupu Jesus waivisa onondaka onongwa konthele Youhamba wa Huku kovilongo ovikuavo mo Isilayeli.

Omaulo omakuavo konthele ya Mesiya

14. Oñgeni o Salmos 78:2 yafuiswapo?

¹⁴ Mesiya ankho malongesa nomahipululo no nongeleka. Asafe omuhoneki umwe wo salmu waimba, okuti: “Ame mandyiikula omulungu wange no nonthengele-popia.” (Salmo 78:2) Mateusi utupopila oñgeni eulo olio liafuisuapo. Jesus apeho ankho tyina alongesa upopia ononthengele-popia, ine onongeleka. Mateusi wahoneka konthele yomuvo Jesus apopia ongeleka yombuto yo mostarda no yonkhiso pala okulongesa ovanthu konthele Youhamba wa Huku. Oe wahoneka okuti: “Kevepopilile natyike tyihaundapesa onongeleka. Otyo ankho tyifuisapo etyi tyapopia omuuli wati: ‘Mandyiikula omulungu wange no nongeleka, mandyikaivalesa ovipuka viaholekwa tunde konthyimbi.’” (Mateus 13:31-35) Omahipululo nongeleka Jesus apopia, viakuatesako ovanthu ovanyingi okunoñgonoka otyili konthele ya Jeova.

15. Oñgeni eulu lia Isaías 53:4 liafuisuapo?

¹⁵ Mesiya ankho meya okuvelula ovanthu. Isaia waula okuti: “Tyotyili, oe watyindapo omauvela etu, iya omuihamo wetu waya nao.” (Isaías 53:4) Etyi ina ivi ya Petulu akuatwa nelema, Jesus emuvelula. Okutuka opo, ovanthu ovakuavo ovanyingi aveya kondyuo ya Petulu, iya Jesus tupu evevelula. Mateusi wati otyo tyafuisapo etyi tyapopia omuuli Isaia, okuti: “Oe welituika omauvela etu, iya watyindapo okuvela kuetu.” (Mateus 8:14-17) Mahi, hapoko vala opo Jesus avelula ovanthu. Ombimbiliya ipopia konthele yovikando ovikuavo ovinyingi Jesus akalesa nawa ovanthu.

16. Oityi apostolu João ahoneka tyilekesa okuti Isaías 53:1, yapopia konthele ya Jesus?

¹⁶ Ovanthu ovanyingi ankho kamavetavela okuti Jesus o Mesiya namphila alinga ovipuka oviwa. (Tanga Isaías 53:1.) Apostolu João wati eulo olio liafuisuapo. Oe wahoneka okuti: “Namphila alinga omanyingilikilo omanyingi kolupala luavo, kavakalele nekolelo mwe. Ngotyo, ondaka yomuuli Isaia yafuiswapo, yati: ‘Jeova olie wakala nekolelo muetyi onthue tueiva? Iya okuwoko kwa Jeova, olie kukahi nokuholololelwa?’” (João 12:37, 38) Netyi apostolu Paulu aivisa onondaka onongwa konyima, ovanthu ovanyingi kavetavelele okuti Jesus ankho o Mesiya.—Romanos 10:16, 17.

17. Oñgeni eulo likahi mo Salmo 69:4 liafuisuapo?

¹⁷ Ovanthu ankho mavayale Mesiya tyihena ehunga. (Salmo 69:4) Jesus wati: “Inkha halingile pokati kavo ovipuka vihuvisa, vihenelingwe vali nomunthu nawike, ñgeno kavakalele nonkhali. Anthi pahe vevimona iya vayala ame na Tate yange. Anthi, opo ondaka yahonekwa Movitumino viavo ifuiswepo, yati: Vandyala tyihena ehunga.’” (João 15:24, 25) “Ovitumino” vipopiwa apa, ankho ovio Ovihonekwa aviho vikahiko pomuvo opo. (João 10:34; 12:34) Etyi tutanga mo no Evandyeliu tyilekesa okuti ovanthu ovanyingi vayalele Jesus, haunene ononkhalamutwe mbonongeleya mbo va Judeu. Tupu Jesus wati: “Ouye utupu ehunga liokuyala onwe, mahi uyele ame, mokonda ndyiava oumbangi konthele yao wokuti ovilinga viao ovivi.”—João 7:7.

18. Oityi matulilongesa monthele mailandulako?

¹⁸ Ovalongwa votete, ankho vena onthumbi yokuti Jesus o Mesiya. Ankho vetyii okuti Jesus wafuisapo omaulo aeho Movihonekwa vio Hebreu konthele ya Mesiya. (Mateus 16:16) Monthele ino tuanoñgonoka okuti omaulo konthele yomanima otete omuenyo wa Jesus novilinga viae, afuiswapo. Anthi, mo Mbimbiliya muna vali omaulo omanyingi, alekesa olie Mesiya. Matulilongesa omaulo oo monthele mailandulako. Inkha tusoka nawa komaulo oo, kamatupatana nalumwe okuti Jesus oe Jeova aholovona opo akale Mesiya.

[Onondaka Poutoi]

Oñgeni Mokumbulula?

• Omaulo patyi amwe apopia konthele yokutyitwa kwa Jesus?

• Olie wapendya ondyila ya Mesiya?

• Oñgeni omaulo okapitulu 53 ka Isaia afuiswapo?