Pakula Otyiho Tyove ku Jeova

1, 2. (a) Omokonda yatyi tukalela notyiho? (Tala olutalatu pefo pahimbikila onthele.) (b) Oityi matulilongesa monthele ei?

HONO, Satanasi “ukahi nokuenda-enda ngo nkheyama ikoma yovola ou maili.” (1 Pedro 5:8; Revelação 12:17) Mokonda yotyo, tuna ovitateka notyiho namphila tuumbila Huku. Ovaumbili va Huku vokohale navo vali notyiho. Mongeleka, Ombimbiliya ipopia okuti Ohamba David ovikando vimwe wakalele notyiho. (Salmo 13:2) Apostolu Paulu wakalele “notyiho nomawaneno.” (2 Coríntios 11:28) Oityi tuna okulinga tyina tuna otyiho?

² Tate yetu keulu wakuatesileko ovaumbili vae vokohale okutepulula otyiho, tupu otyo ahanda okulinga nonthue hono. Ombimbiliya itupopila okuti: “Pakulei omasukalalo enyi aeho ku Huku, mokonda wasuka noonwe.” (1 Pedro 5:7) Oñgeni ove molingi? Matulilongesa ononkhalelo ononkhuana. Ove upondola (1) okulikuambela, (2) okutanga nokusokolola Kondaka ya Huku, (3) yeka ospilitu sandu ya Jeova ikukuateseko, (4) okupopia nomunthu umwe uyumba onthumbi konthele yoñgeni ulitehelela. Tyina ulilongesa ononkhalelo ombu ononkhuana, imbuka ononkhalelo wesukisa okulinga vali nawa.

 3. Oñgeni upondola “okupakula omulemo wove ku Jeova”?

³ Onkhalelo yotete tupakula otyiho tyetu ku Jeova oputyina tulikuambela nomutima wetu auho. Tyina una otyiho, Tate yove woluembia uhanda umupopile tyo. Omuhoneki wo no salmu David waita ku Jeova okuti: “Huku yange, tehelela elikuambelo liange.” Mo salmu onkhuavo David tupu wapopia okuti: “Pakula omulemo wove ku Jeova, iya mekuvatela.” (Salmo 55:1, 22) Tyina wamalingi atyiho uvila opo utetulule otyitateka, okulikuambela ku Jeova matyikukuatesako okuhakala notyiho. Mahi oñgeni molikuambela? Oityi tyipondola okutukuatesako okulityilika otyiho?​—Salmo 94:18, 19.

 4. Omokonda yatyi okulikuambela tyakolela, tyina tuna otyiho?

⁴ Tanga Filipenses 4:6, 7. Oñgeni Jeova akumbulula omalikuambelo tulinga nomutima wetu auho? Jeova upondola okutukuatesako okutula omutima nokulitehelela nawa nokulityilika omalusoke ahaviukile. Tyina tuna otyiho no woma, Huku utukuatesako okukala nombembwa momutima. Ovanyingi povakuatate vetu no nomphange ankho ongotyo velitehela. Noove upondola okulitehelela ngotyo. “Ombembwa ya Huku,” maikukuatesako okufinda otyiho namphila tyihapepukile! Upondola okuyumba onthumbi momulao wa Jeova wati: “Uhakale notyiho, mokonda ame, ame Huku yove. Mandyikupameka. Tyotyili mandyikuvatela.”​—Isaías 41:10.

 5. Oñgeni Ondaka ya Huku itukuatesako okuvasa ombembwa?

⁵ Onkhalelo yavali tupondola okuvasa ombembwa yokomutima, okutanga nokusokolola ko noversikulu Mbombimbiliya. Omokonda yatyi otyo tyakolela? Mokonda Ombimbiliya Ondaka ya Huku. Muna ounongo, nonondonga mbatunda Komutungi wetu. Katyesukisile otyiho patyi unatyo, soka komalongeso a Huku noñgeni onondonga mbae mbupondola okukupameka. Otyo tyipondola okukukuatesako okutepulula ine okulityilika otyiho. Jeova haunene uhanda tutange Ondaka yae opo “tukale tyapama nokuakola omutima” iya atuhakala “nowoma.”​—Josué 1:7-9.

 6. Oñgeni tupondola okupola ouwa konondaka mba Jesus?

⁶ Mondaka ya Huku, tutangamo oñgeni Jesus ankho apopia novanthu. Ankho vemutehelela nawa mokonda onondaka mbae ankho mbupameka nokulunda ovanthu, haunene vana vasoya. (Tanga Mateus 11:28-30.) Jesus ankho usuka unene noñgeni vakuavo velitehelela. (Marcos 6:30-32) Jesus walaele ono apostolu ankho vaenda nae okuti apeho mevekuatesako iya nonthue hono metukuatesako. Onthue katuesukisile okukala ponthele ya Jesus opo etukuateseko. Mokonda Ohamba yetu keulu, Jesus utualako okulekesa okuti utuhole. Tyina ukala notyiho, upondola okukala nonthumbi yokuti mekukuatesako momuwo watyo. Jesus utuavela ekevelelo nepameko, liokutukuatesako tyina tuna otyiho.​—Hebreus 2:17, 18; 4:16.

 7. Oñgeni ospilitu sandu ya Huku itukuatesako?

⁷ Jesus walaa okuti Tate yetu metuavela ospilitu sandu tyina tumuita. (Lucas 11:10-13) Oñgeni ononkhalelo ombo ononthatu mbutukuatesako okutepulula otyiho? Ospilitu sandu ya Huku itukuatesako okukala novituwa oviwa ngo via Huku. (Colossenses 3:10) Ombimbiliya, iihana ovituwa ovio okuti “ovinyango viospilitu.” (Tanga Gálatas 5:22, 23.) Tyina onthue tukala novituwa ovio oviwa, oupanga wetu navakuetu maupame iya matyitukuatesako okulityilika ovipuka vieta otyiho. Matutale oñgeni ovinyango viospilitu vitukuatesako mononkhalelo mbelikalela.

8-12. Oñgeni ovinyango viospilitu ya Huku vipondola okukukuatesako?

⁸ “Oluembia, ehambu, ombembwa.” Tyina una onthilo navakuenyi, matyikukuatesako okutepulula otyiho. Ñgeni ngotyo? Tyina una oluembia luo tyotyili, nohole, nonthilo novakuatate, otyo matyikukuatesako okulityilika omalusoke apenga nonyengo, no nonkhumbi. Ngotyo motualako okukala nombembwa navakuenyi.​—Romanos 12:10.

⁹ “Oumphua-lundo, ohole, oundalawa.” Ombimbiliya ipopia okuti: “Kalei nomitima omiwa kese umwe na mukuavo, okulilingila okankhenda, nokulievela pokati.” (Efésios 4:32) Tyina tulandula elondolo olio, matukala nombembwa navakuetu, nokulityilika ovitateka vipondola okutuetela otyiho. Tupu, otyo matyitukuatesako okutetulula kese tyitateka tuvasiwa natyo mokonda tuvakuankhali.

¹⁰ “Ekolelo.” Hono, ovikando ovinyingi tukala notyiho tyo nombongo novipuka ovikuavo. (Provérbios 18:11) Oñgeni onthue tupondola okutyilika otyiho otyo? Tuna okulandula elondolo lia apostolu Paulu “liokuhambukilwa ovipuka tuna pahetyino.” Ekolelo liapama mu Jeova litukuatesako okukala nonthumbi yokuti metuavela ovipuka tuesukisa. Huku walaa okuti: “Himekuyeke nalumwe, himekusipo nalumwe.” Otyo tupopila nga Paulu wati: “Jeova oe omuvateli wange, himakala nowoma. Oityi omunthu apondola okundinga?”​—Hebreus 13:5, 6.

¹¹ “Epoleyo, okulikondola omutima.” Soka oñgeni ovituwa ovio vipondola okukukuatesako momuenyo wove. Ovituwa ovio vikukuatesako okulityilika okulinga ine okupopia ovipuka vikuetela otyiho, iya atyikuetela ouwa wokulityilika “ovivi viungisa omutima, nokunumana, nonyengo onene, nonondyaya, no nondaka mbuleva.”—Efésios 4:31.

¹² Ove wesukisa okuliola omutima opo uyumbe onthumbi “mokuoko kuapama kwa Huku” “nokupakula omasukalalo ove aeho ku Huku.” (1 Pedro 5:6, 7) Inkha uliola omutima, Jeova mekukuatesako nokukutekula. Tyina wiimbuka etyi uvila okulinga netyi uhevili okulinga, otyo matyikukuatesako okuheliyumbu onthumbi. Kumakala notyiho otyinyingi mokonda uyumba onthumbi mu Huku.​—Miquéias 6:8.

13. Oityi ankho Jesus ahandele okupopia etyi ati: “Muhakalei notyiho”?

¹³ Mu Mateus 6:34 (tanga), tuvasamo elondolo lia Jesus liati: “Muhakalei notyiho.” Elondolo olio ngoti kaliapepukile. Mahi oityi Jesus ankho ahanda okupopia? Ankho kekahi nokupopia okuti ovaumbili va Huku kavapondola okukala notyiho. Mongeleka, David na Paulu navo vakalele notyiho. Ngotyo, Jesus uhanda ovalongwa vae vanoñgonoke okuti okusukalala unene, hatyo tyitetulula ovitateka. Namphila kese nthiki kuna ovitateka, mahi Ovakristau tuesukisa okuhasoko unene kovitateka viokualamba nevi maviya. Oñgeni elondolo lia Jesus likukuatesako okutetulula otyiho?

14. Nga David, oñgeni ove upondola okutepulula otyiho?

¹⁴ Pamwe ovanthu vamwe vena otyiho mokonda yovipuka ovivi ankho valingile kohale. Velivela onombei mokonda yotyipuka tyimwe valingile namphila palambale omanima omanyingi. Ohamba David welitehelele ngotyo mokonda yovivi alingile. Apopi okuti: “Omutima wange waihamenua.” (Salmo 38:3, 4, 8, 18) Motyitateka otyo David walingile ovipuka nounongo. David ankho una onthumbi yokuti Jeova una okankhenda tupu memuevela. David akala nehambu lio kunoñgonoka okuti Huku wemuevela.​—Tanga Salmo 32:1-3, 5.

15. (a) Oityi tulilongesila ku David? (b) Oityi tupondola okulinga opo tutepulula otyiho? (Tala okakasa kati “Ononkhalelo Mbumwe Mbokutepulula Otyiho.”)

¹⁵ Pamwe, upondola okukala notyiho novipuka vikahi nokumoneka. Mongeleka, etyi David ahoneka o Salmo 55, ankho watila owoma wokuti maipawa. (Salmo 55:2-5) No ngotyo, kayekele otyiho tyitepulule onthumbi yae mu Jeova. David waitile ku Jeova opo emukuateseko okutetulula ovitateka viae, mahi ankho utyii okuti wesukisa okulinga ononkhono. (2 Samuel 15:30-34) Upondola okulilongesila ku David. Uhayeke otyiho tyikusoyese, mahi linga atyiho uvila opo utetulule otyitateka, iya oyumbu onthumbi mu Jeova.

16. Omokonda yatyi okunoñgonoka etyi tyihangununa enyina lia Huku tyitukuatesako okuhakala notyiho?

¹⁶ Pamwe Ovakristau vakala notyiho netyi matyikamoneka komutwe wandyila. Mahi ove kuesukisile okusukalala novipuka vihenemoneke. Omokonda yatyi? Omokonda ovipuka pamwe kaviende ngetyi tukevelela. Tupu, tuna okuhinangela okuti petupu otyipuka Huku ehevili okutetulula. Iya enyina liae lihangununa okuti “mandyikala etyi nahanda okukala.” (Êxodo 3:14) Onthue katupondola okusukalala netyi matyikamoneka komutwe, mokonda enyina lia Huku lilekesa okuti ovipuka aviho apopia mevifuisapo. Upondola okukala nonthumbi yokuti Huku mayambe ovanthu ovakuatyili kwe nokuvekuatesako okutepulula otyiho tyovipuka valingile kohale, novio pehepano, notyiho tyovipuka maviya komutwe wandyila.

17, 18. Oñgeni okutomphola nomunthu wayumba onthumbi tyipondola okukukuatesako okuhakala notyiho?

¹⁷ Onkhalelo yakuana maikukuatesako tyina una otyiho, okutomphola nomunthu uyumba onthumbi. Omunthu welinepa nae, ine epanga, ine omukulu wewaneno upondola okukuatesako okutetulula otyitateka. Ombimbiliya ipopia okuti: “Otyiho tyilema momutima womuthu, mahi onondaka onongwa mbuhambukiswa omutima.” (Provérbios 12:25) Ombimbiliya tupu ipopia okuti: “Pana pehena etompho, ovipuka aviho kaviende nawa. Mahi pana pena ovaviyuli ovanyingi, ovipuka vifuisuapo.”​—Provérbios 15:22.

¹⁸ Omaliongiyo etu tupu etukuatesako okutepulula otyiho. Tyina tuenda komaliongiyo tukala omuvo omunyingi novakuatate no nomphange, vesuka nonthue tupu vahanda okutupameka. (Hebreus 10:24, 25) Okukala navo matyitukuatesako okukala tyapama tupu matyipepuka okutepulula otyiho.​—Romanos 1:12.

19. Omokonda yatyi upondola okukala nonthumbi yokuti oupanga wapama na Huku maukukuatesako okuhakala notyiho?

¹⁹ Omukulu umwe wewaneno wo Canada waimbuka okuti tyakolela okupakula otyiho ku Jeova. Ovilinga viae ankho vimuponeswa unene, tupu ankho una ovitateka viekongoko, ovipuka ovio aviho ankho vimukalesa notyiho. Oityi tyemukuatesako okukala tyapama? Ankho ulinga atyiho evila opo apameke oupanga wae na Jeova. Omapanga ae apeho vemukuatesako pomuvo wovitateka, tupu apopila omukai wae oñgeni elitehelela. Ovakulu vewaneno nomutalelipo womauaneno avemukuatesako okutala ovitateka viae ngetyi Jeova evitala. Aende kondotolo opo anoñgonoka ovipuka esukisa okulityilika. Ayekepo okulinga ovipuka vimwe, ehimbika okulangalapo omutenya. Katutu-katutu, elilongesa okulityilika omahando ae notyiho. Tyina pena otyipuka tyimwe etyii okuti kemetyivili okutyilinga, ayumbu onthumbi mu Jeova.

20. (a) Oñgeni tupondola okupakula otyiho tyetu ku Huku? (b) Oityi matulilongesa monthele mailandulako?

²⁰ Monthele ei tuelilongesa omokonda yatyi tyakolela okupakula omulemo wetu ku Huku, tyina tulikuambela ku Jeova, nokutanga Ondaka yae, nokusokolola kuyo. Tupu tuelilongesa omokonda yatyi tyakolela okuyeka ospilitu sandu ya Jeova itukuateseko, nokupopia na umwe tuyumba onthumbi nokutehelela nawa momaliongiyo. Monthele mailandulako, matukelilongesa oñgeni Jeova etukuatesako tupu maipopi ovipuka tukevelela komutwe wandyila.​—Hebreus 11:6.