Hetekela Ouviuki Nokankhenda ka Jeova

1, 2. (a) Oñgeni Jesus ankho elitehelela konthele Yovitumino via Huku? (b) Oñgeni ovahoneki vovitumino nova Faliseu ankho vaundapesa Ovitumino monkhalelo yapenga?

JESUS ankho uhole Ovitumino Viapelwe Moisesi. Otyo katyituhuvisa mokonda Ovitumino ovio viatunda ku Tate yae Jeova, Omunthu wakolela vali unene momuenyo wae. Mo Salmo 40:8, Ombimbiliya yaulile konthele yohole Jesus ankho ena Novitumino via Huku etyi yati: “Huku yange, ame ndyihambukilwa okulinga ehando liove. Iya otyitumino tyove tyikahi mokati kange.” Movipuka Jesus alinga netyi apopia, walekesa okuti Ovitumino via Huku viaviuka, vietuetela ouwa iya tuna okuvifuisapo.—Mateus 5:17-19.

² Jesus wanumanene etyi atala ovahoneki vovitumino nova Faliseu ankho vaundapesa Ovitumino via Tate monkhalelo yapenga. Evepopila okuti: “Muava o luatalau no endru, no kominyu,” tyihangununa okuti ankho vahanda okuendela moupuka oututu Wovitumino. Otyitateka ankho otyipi? Jesus wahangununa okuti: “Onwe muatomba ovipuka viakolela vali vio Vitumino, ngetyi ouviuki, nokankhenda, noukuatyili.” (Mateus 23:23) Ova Faliseu ankho kavesukile netyi Ovitumino vilongesa. Ankho kavanoñgonokele nawa etyi Ovitumino vialingilwa iya ankho tupu vasoka okuti vakolela vali ku vakuavo. Mahi Jesus ankho wanoñgonoka etyi Ovitumino vialingilwa iya netyi kese tyitumino tyilongesa konthele ya Jeova.

 3. Oityi matulilongesa monthele ei?

³ Mokonda Tuvakristau, onthue pahe katukuluminyua okutavela Ovitumino Viapelwe Moisesi. (Romanos 7:6) Mahi, omokonda yatyi Jeova apakela Ovitumino ovio Mondaka yae, Ombimbiliya? Omokonda uhanda tunoñgonoke iya atuundapesa momuenyo wetu “ovipuka viakolela vali” vikahi Movitumino ovio. Mongeleka, oityi tupondola okulilongesila komapunda-umbo okuholama? Monthele yokualamba, tuelilongesa onondonga mbakolela kuetyi omunthu waipaa mukuavo motyiponyo ankho ena okulinga. Monthele ei, matulilongesa oityi omapunda-umbo okuholama etulongesa konthele ya Jeova iya oñgeni tupondola okumuhetekela. Matukumbulula omapulo aa etatu: Oñgeni omapunda-umbo alekesa okuti Jeova una okankhenda? Oityi omapunda-umbo oo etulongesa konthele yoñgeni Huku atala omuenyo? Oñgeni alekesa ouviuki wae? Mu kese kumbululo, ovola okunoñgonoka oñgeni mohetekela Tate yetu Jeova.—Tanga Efésios 5:1.

4, 5. (a) Omokonda yatyi komunthu waipaa mukuavo motyiponyo, ankho katyalemene okuvasa epunda-umbo liokuholama? (b) Otyo tyitulongesa-tyi konthele ya Jeova?

⁴ Jeova wapongiya omapunda-umbo okuholama monkhalelo ankho yapepuka okuevasa. Wapopilile ova Isilayeli opo vaholovone omapunda-umbo oo, okuti konthele onkhuavo yo ndongi Jordau kuna etatu iya konthele onkhuavo kuna etatu. Omokonda yatyi? Opo una waipaa mukuavo motyiponyo tyihemupuilise okuevasa liwa-liwa. (Números 35:11-14) Omatapalo atyo ankho aviukiswa nawa. (Deuteronômio 19:3) Ankho momatapalo muna omanyingilikilo alekesa oku kuna omapunda-umbo oo. Mokonda ankho kuna omapunda-umbo okuholama mo Isilayeli, omu Isilayeli waipaa mukuavo motyiponyo ankho kesukisile okukaholama kovilongo ovikuavo, mokonda ankho upondola okukafenda ono huku mbomatutu.

⁵ Soka kuetyi: Jeova wapopile okuti omunthu waipaa mukuavo ankho una okuipawa. Mahi tupu wapopia okuti omunthu vaipaa mukuavo motyiponyo, una okulekeswa okankhenda nokuyakulilwa. Omunongo umwe upopia konthele Yombimbiliya wati: “Ovipuka aviho ankho vialingwa monkhalelo yapepuka.” Jeova hamukoyesi omukalavi wovola vala okuhitisa ovanthu vae mokonda yovipuka ovivi valinga. Mahi “omuhona kokankhenda.”—Efésios 2:4.

 6. Okuti ova Faliseu ankho vahetekela okankhenda ka Jeova? Hangununa.

⁶ Ova Faliseu, ankho vetupu okankhenda na vakuavo. Mongeleka, ova Faliseu ankho vapopia okuti katyitavela okuevela omunthu walinga otyiponyo mukuavo ovikando vilamba pu vitatu. Opo alekese okuti otyituwa otyo tyapenga, Jesus waundapesa ongeleka yo mu Faliseu ankho ukahi nokulikuambela ponthele yomutanthi womalilimu. Omu Faliseu welikuambela okuti: “Huku yange, ndyikupandula mokonda hikahi nga vakuetu, vavaka, nokulinga evi vihaviukile, nomaumbalehi. Tupu hikahi ngomutanthi ou womalilimu.” Oityi Jesus ankho ahanda okupopia? Ova Faliseu ankho vasoka okuti “vakolela vali ku vakuavo” iya ankho vasoka okuti kavesukisile okukala nokankhenda na vakuavo.—Lucas 18:9-14.

7-8. (a) Oñgeni upondola okuhetekela okankhenda ka Jeova? (b) Omokonda yatyi tuna okuliola omutima opo tuevele vakuetu?

⁷ Hetekela Jeova, uhahetekele ova Faliseu. Kala nokankhenda, noluembia. (Tanga Colossenses 3:13.) Kala omunthu wapepuka omutima tyina vakuenyi veya okukuita otyiponyo. (Lucas 17:3, 4) Lipula okuti: ‘Ndyievela liwa-liwa vakuetu, alo umwe tyina vandinga oviponyo ovikando ovinyingi? Ndyiovola liwa ombembwa tyina vakuetu vandinga ovipuka vindumanesa?’

⁸ Opo tuevele vakuetu, tuna okuliola omutima. Ova Faliseu ankho vasoka okuti vakolela vali ku vakuavo, mokonda yotyo, ankho kavahande okuevela vakuavo. Mahi mokonda Tuvakristau, nomutima weliola “tutala vakuetu ngatyina ovanene vali kuonthue” iya otyo tyitukuatesako okuveevela nomutima auho. (Filipenses 2:3) Tuna okulipula okuti: ‘Okuti ndyikahi nokuhetekela Jeova nokuna omutima weliola?’ Inkha tueliola omutima, matyitupekila vakuetu okutuita otyiponyo iya matyitupepukila okuveevela. Lumbana okulekesa okankhenda ohanumana liwa-liwa.—Eclesiastes 7:8, 9.

 9. Oñgeni Jeova akuatesileko ova Isilayeli okuimbuka okuti omuenyo ukola?

⁹ Ehunga limwe liakolela opo Jeova alinge epongiyo lio mapunda-umbo okuholama, ankho o pala ova Isilayeli vahavelwe onombei mokonda yokunengula ohonde yomunthu wahalingile natyike. (Deuteronômio 19:10) Jeova uhole omuenyo iya uyele okuiipaa. (Provérbios 6:16, 17) Mokonda Huku omuviuki iya omusukuki, ankho kapondola okuhesuku nomunthu waipawa alo umwe inkha o motyiponyo. Tyotyili, omunthu wokuaipaa mukuavo motyiponyo, ankho una okulekeswa okankhenda, mahi tete ankho una okupopila ovakulu etyi tyaendapo. Inkha ovakulu vaimbuka okuti waipaa mukuavo motyiponyo, ankho vena okumuyeka akale mepunda-umbo liokuholama alo omunene-nakwa ankhia. Otyo pamwe tyilekesa okuti ankho una okukala mepunda-umbo olio omuenyo wae auho. Epongiyo olio lialongesile ova Isilayeli okuti omuenyo ukola. Opo vankhimaneke Una weveavela omuenyo, ankho vesukisa okulityilika okulinga ovipuka vipaka omuenyo wa vakuavo motyiponga.

10. Ngetyi tyapopia Jesus, oñgeni ovahoneki vovitumino no va Faliseu valekesile okuti kavesukile nomuenyo wa vakuavo?

¹⁰ Tyelikalela na Jeova, ovahoneki vovitumino no va Faliseu valekesile okuti vetupu onthilo nomuenyo wa vakuavo. Jesus evepopila okuti: “Onwe muahanda ñgeno onwe vala mukala nenoñgonoko. Onwe kamuhande okunyingila iya tupu mutyilika vana vahanda okunyingila!” (Lucas 11:52) Oityi Jesus ankho ahanda okupopia? Ovahoneki vovitumino no va Faliseu ankho vena otyilinga tyokuhangununina Ondaka ya Huku ovanthu opo vakakale nomuenyo wahapu. Mahi, ankho vatyilika ovanthu okulandula “Onkhalamutwe Yavilapo Yomuenyo,” Jesus. (Atos 3:15) Tyina valinga ngotyo, ankho vatuala ovanthu mehanyauno. Ovahoneki vovitumino no va Faliseu ankho velipakako nokuna elungavi iya ankho kavesukile nomuenyo wovanthu. Ankho ovakalavi nokuhena oluembia!

11. (a) Oñgeni apostolu Paulu alekesile okuti utala omuenyo ngetyi Jeova eutala? (b) Oityi matyitukuatesako okukala nombili movilinga viokuivisa nga Paulu?

¹¹ Oñgeni tupondola okuhetekela Jeova iya atulityilika okukala ngovahoneki vovitumino nova Faliseu? Tulinga ngotyo tyina tuna onthilo nokupanda omuenyo. Apostolu Paulu ankho utyilinga pokuivisa onondaka onongwa Mbouhamba kovanthu aveho ankho avasa. Otyo apopila okuti: “Ame nasukuka kohonde yovanthu aveho.” (Tanga Atos 20:26, 27.) Mahi, okuti Paulu ankho wivisa vala mokonda ankho kahande okuvelwa onombei ine omokonda Jeova wemutuma etyilinge? Au. Paulu ankho uhole ovanthu. Ankho ovanthu vakolela unene kwe iya ankho uhanda vakamone omuenyo wahapu. (1 Coríntios 9:19-23) Nonthue tuna okutala omuenyo ngetyi Jeova eutala. Jeova uhanda ovanthu aveho velivele opo vakamone omuenyo. (2 Pedro 3:9) Opo tuhetekele Jeova, tuna okukala nohole novanthu. Okankhenda ketulunda okuivisa nombili iya otyo tupu tyitukalesa nehambu.

12. Omokonda yatyi okuhapake omuenyo motyiponga tyakolela unene kovanthu va Huku?

¹² Opo tutale omuenyo ngetyi Jeova eutala, tuna okuhalingi ovipuka vipaka omuenyo motyiponga. Tuna okutaha nawa etuku-tuku, nokuundapa monkhalelo yapama. Alo umwe tyina tutunga onondyuo, nokuenda ponomphangu mbefendelo tuesukisa okuhapake omuenyo motyiponga. Ovanthu, nokuliyakulila, nekongoko ovipuka viakolela vali unene tyipona omuvo ine onombongo. Huku yetu apeho ulinga etyi tyaviuka iya uhanda tumuhetekele. Ovakulu vewaneno vesukisa okuhapake omuenyo wavo no wa vakuavo motyiponga. (Provérbios 22:3) Tyina omukulu wewaneno ekuavela onondonga konthele yotyo, mbambavo mutehelela. (Gálatas 6:1) Inkha utala omuenyo ngetyi Jeova eutala, ove “kumavelwa onombei mokonda yonkhali yohonde.”

13, 14. Oñgeni ovakulu vo Isilayeli ankho vena okuhetekela ouviuki wa Jeova?

¹³ Jeova wapopilile ovakulu vo Isilayeli okuti vena okuhetekela ouviuki wae. Tete, ovakulu ankho vena okutala oñgeni ovipuka viaenda. Pokutokola inkha mavemulekesa okankhenda, ankho vena okutala onkhalelo asoka, novituwa, novipuka alingile kohale. Ovakulu ankho vena okunoñgonoka inkha waipaa mukuavo motyiponyo ine ankho una onkhongo nae. (Tanga Números 35:20-24.) Inkha ankho pena onombangi etyi omunthu aipawa, ankho vena okutehelelwa tyina ovakulu nkhele vehenetokole etyi malingwa.—Números 35:30.

¹⁴ Tyina vamanoñgonoka atyiho tyaenda-po, ovakulu ankho vena okutala omunthu watyo, avahasoko vala kuetyi omunthu alinga. Ovakulu ankho vesukisa okukala ovanongo opo vanoñgonoke ovipuka aviho viaendapo nomahunga atyo. Ovakulu ankho vesukisa ospilitu sandu ya Jeova opo ivekuateseko okuhetekela ounongo wae nokankhenda, nouviuki.—Êxodo 34:6, 7.

15. Oñgeni onkhalelo Jesus ankho atala ovanthu vokulinga ononkhali yelikalela no yova Faliseu?

¹⁵ Ova Faliseu ankho kavakoyesa ovanthu nokankhenda. Ankho vatala vala onkhali omunthu alinga, avahasoko konthele yoñgeni omunthu ekahi. Etyi ova Faliseu vamona Jesus ukahi nokulia mondyuo ya Mateus, avapulu ovalongwa vae okuti: “Omokonda yatyi omulongesi wenyi alia novatanthi vomalilimu novo kulinga ononkhali?” Jesus evekumbulula okuti: “Ovanthu vokuna ekongoko kavesukisile ondotolo, mahi vokuavela ovo vesukisa. Endei, amukelilongesa etyi tyihangununa okuti: ‘Hihande ovilikutila, mahi nahanda okankhenda.’ Mokonda ame heile okuovola ovaviuki, mahi neya okuovola ovakuankhali.” (Mateus 9:9-13) Okuti Jesus ankho ukahi nokuamena vana valinga ononkhali? Au, hatyoko. Ankho uhanda velivele. Okulivela ankho tyilinga onthele yakolela monondaka Jesus ankho aivisa. (Mateus 4:17) Jesus waimbuka okuti vamwe “povatanthi vo malilimu no vokulinga ononkhali” ankho vahanda okupiluluka. Ankho kavaile vala keumbo lia Mateus pala okukalia. Mahi omokonda ankho vekahi nokulandula Jesus. (Marcos 2:15) Tyelikalela na Jesus, ova Faliseu ankho kavatale ovanthu ngetyi Jesus evetala. Ankho kavetavela okuti ovanthu valinga ononkhali vapondola okupiluluka. Otyo tyelikalela unene na Jeova, omuviuki iya una okankhenda!

16. Oityi ovakulu vewaneno vetatu vena okunoñgonoka tyina vakuatesako ou walinga onkhali?

¹⁶ Ovakulu vewaneno hono vena okuhetekela Jeova, una “uhole ouviuki.” (Salmos 37:28) Tete, vena “okutala nawa” inkha tyotyili onkhali yalingwa umwe. Inkha yalingwa, mavalandula onondonga mbo Mbimbiliya opo vatokole etyi mavalingi. (Deuteronômio 13:12-14) Ovakulu vetatu vokukuatesa-ko una walinga onkhali, vena okutala nawa-nawa inkha omunthu oo welivela umwe nomutima auho. Otyo katyapepukile okutyilinga. Okulivela nomutima auho tyakutikinya onkhalelo omunthu atala onkhali alinga netyi tyikahi momutima wae. (Apocalipse 3:3) Omunthu wokualinga onkhali una okulivela nomutima auho opo alekeswe okankhenda.a—Tala onondaka pokatoi.

17, 18. Oñgeni ovakulu vewaneno vapondola okunoñgonoka inkha omunthu walinga onkhali welivela umwe? (Tala olutalatu pefo pahimbikila onthele.)

¹⁷ Jeova na Jesus vetyii oityi omunthu asoka noñgeni elitehelela mokonda vetyivila okutala etyi tyikahi momitima. Mahi ovakulu vewaneno kavetyivili okutala etyi tyikahi momitima vio vanthu. Ngotyo, inkha umukulu wewaneno, oñgeni upondola okunoñgonoka inkha tyili-tyili omunthu elivela umwe? Tete, likuambela okuita ounongo. (1 Reis 3:9) Vali, undapesa Ondaka ya Huku nomikanda viomupika wekolelo opo utyivile okunoñgonoka inkha omunthu welivela umwe nomutima auho ine kelivelele. (2 Coríntios 7:10, 11) Tala oñgeni Ombimbiliya ipopia vana velivela na vana vehelivelele, otale onkhalelo ovanthu ovo ankho velitehelela, nonkhalelo ankho vasoka netyi valingile.

¹⁸ Tatu, soka komunthu, uhasoke vala konkhali omunthu alinga. Omokonda yatyi ekahile ñga? Omokonda yatyi alingila omatokolo amwe momuenyo? Ovitateka patyi enavio? Ovipuka patyi ehevili okulinga? Ombimbiliya yaulile okuti Jesus, onkhalamutwe yewaneno, “kamakoyesa okutatelela vala kuetyi amona komaiho netyi eiva. Makakoyesa omapongo nouviuki iya akaviyula nouviuki, pala ouwa wonondalaua kombanda yoohi.” (Isaías 11:3, 4) Vakulu vewaneno, Jesus wemuholovona opo muyunge ewaneno iya memukuatesako okukoyesa nouviuki nokankhenda. (Mateus 18:18-20) Tuhambukwa unene mokonda tuna ovakulu vewaneno vetukuatesako! Tupu vetukuatesako okulekesa ouviuki nokankhenda ku vakuetu.

19. Onondonga patyi welilongesila komapunda-umbo okuholama uhanda okuundapesa momuenyo wove?

¹⁹ Movitumino Viapelwe Moisesi muna “enoñgonoko liapama liotyili.” Ovitumino ovio vitulongesa unene konthele ya Jeova nonondonga mbae. (Romanos 2:20) Mongeleka, omapunda-umbo okuholama alongesa ovakulu vewaneno oñgeni vena “okukoyesa nouviuki” tupu etulongesa atuho okulekesa “ohole yotyotyili nokankhenda.” (Zacarias 7:9) Namphila katulandula vali Ovitumino Viapelwe Moisesi, mahi Jeova kapilulukile. Ouviuki nokankhenda nkhele na hono viakolela unene. Elao limwe enene okuumbila Jeova. Tuhetekelei ovituwa oviwa via Jeova iya atuvasi eameno mwe!