Vakueya Otiliku Motyasapalo

Sesusi novalongwa vae vaya no kokulio kuekumbi okuenda ko Ngalileya. Ankho omuvo wondyovo iya momapia muna otiliku yayela. Mokonda ovalongwa ankho valiwa nondyala, avakueye onoñgima mbumwe mbotiliku, otyo valia. Mahi ankho Otyasapalo iya ova Faliseu veete etyi vekahi nokulinga.

Hinangela okuti palamba vala ononthiki mbehehi ova Sundeu vamwe mo Selusalei vahandele okuipaa Sesusi, mokonda vasoka okuti ukahi nokulinga onkhali Motyasapalo. Pahe, ova Faliseu vemutendeleya mokonda yetyi ovalongwa vae vekahi nokulinga. Vati: “Tala! Ovalongwa vove vekahi nokulinga otyipuka tyihalingwa Motyasapalo.” — Mateusi 12:2.

Ova Faliseu ankho vapopia okuti okukueya otiliku nokuisengela peke opo valie, ongatyina vateya avatyopo. (Êxodo 34:21) Onkhalelo vahangununa ovipuka vihalingwa Motyasapalo ankho yalema unene, mokonda onthiki oyo ankho onthiki yehambu, no yokupameka oupanga na Huku. Sesusi ulekesa okuti onkhalelo yavo yokusoka yapenga, iya apopi onongeleka mbulekesa okuti Siovaa Huku nalumwe ahandele otyitumino Tyae konthele Yotyasapalo tyiundapeswe monkhalelo ngoyo.

Ongeleka imwe Sesusi aava oya Daviti novanthu vae. Etyi Daviti novanthu vae ankho valiwa nondyala, avaende pekaka liefendelo, avali onombolo mbotyaawa. Onombolo ombo, mbokuapolwa-le komaiho a Siovaa iya akupingiyua onomphe, ankho mbupakwa nawa opo mbuliwe novanakwa. Mahi mokonda yonkhalelo yavo, Daviti novanthu vae kavavelelwe onombei etyi valia onombolo ombo. — Levítico 24:5-9; 1 Samuel 21:1-6.

Mongeleka ya vali, Sesusi ati: “Kamuatangele Movitumino Viapelwe Moisesi okuti ovanakwa ankho vaundapa mondyuo ya Huku Motyasapalo mahi otyo vahavelwa onombei?” Ankho uhanda okupopia okuti alo umwe Motyasapalo, ovanakwa vaipaa ovinyama opo vaave ovilikutila, avalingi ovilinga ovikuavo mondyuo ya Huku. Iya Sesusi ati: “Mahi ame ndyimupopila okuti, otyipuka otyinene vali tyipona ondyuo ya Huku tyili pano.” — Mateusi 12:5, 6; Números 28:9.

Sesusi apopi vali Ovihonekwa, etyi ati: Inkha “muanoñgonokele etyi tyihangununa okuti, ‘Ame nahanda mukale nokankhenda, tyipona okulinga ovilikutila,’ ñgeno kamuvele onombei ovanthu vahapengesile.” Amanuhula nonondaka ombu: ‘Mokonda Omona womulume Utumina Otyasapalo.’ Sesusi ankho ukahi nokupopia etyi meya okutumina Mouhamba wombembwa wa Huku womanima 1000. — Mateusi 12:7, 8; Oséias 6:6.

Tunde kohale ovanthu aveho vekahi moupika wa Satanasi, vamona ononkhumbi noungangala, novilwa ovinyingi. Mahi ovipuka mavikelikalela mokueenda Kuotyasapalo otyinene tyoutumini wa Kilisitu, una maukaava omuvo wokupululukua-po tuesukisa tukevelela-le ehimbwe!