Sesusi Walinga Ehuviso Liokuavela okulia Ovanthu Ovanyingi

Ono apositolu 12 ankho vahambukwa unene mokonda yovilinga viokuivisa valinga mo Ngalileya, avapopila Sesusi “ovipuka aviho valinga nevi valongesa.” Mahi, ankho vaponwa. Ankho vetupu omuvo wokulia mokonda ovanthu ovanyingi, veya otyo vaya. Moluotyo, Sesusi evepopila okuti: “Tuendei pomphangu pehena ovanthu opo mukapululukwe-po katutu.” — Maluku 6:30, 31.

Avalondo mowato, tyafuile popepi no Kafalanau, avaende kokule koutundilo Wondongi Solondau, popepi no Betesata. Mahi, ovanthu ovanyingi avevemono tyina vaya, ovakuavo avetyiivi. Aveho ovo avaende nokuhateka okutyama nelunga, tyina owato ihika ngwe vehika-ale.

Etyi Sesusi atunda mowato, amono ovanthu ovanyingi, akala nokankhenda navo mokonda ankho vekahi ngonongi mbuhena omunthita. Moluotyo, ahimbika “okuvelongesa ovipuka ovinyingi.” (Maluku 6:34) Tupu avelula vana “ankho vavela.” (Luka 9:11) Konyima, ovalongwa avemupopila okuti: “Pano petupu omaumbo, ngwe ekumbi lietaka, popila ovanthu opo vaye komaumbo vakalande okulia.” — Mateusi 14:15.

Sesusi evekumbulula okuti: “Kavesukisa okuenda, veavelei onwe etyi mavali.” (Mateusi 14:16) Namphila Sesusi ankho ei etyi malingi, apulu Filipe okuti: “Opi matukalandela ovanthu ava onombolo opo valie?” Wapula Filipe mokonda ankho oe ukala popepi, po Betesata. No ngotyo, okulanda ombolo ankho kamatyitetulula otyitateka. Ankho pena ovalume 5.000. Iya okuvalula novakai, novana tyafuile ankho valamba po 10.000! Filipe akumbulula okuti: “Alo umwe onombolo mbonondenaliu [ondenaliu ankho onombongo mbufetwa omunthu waundapa onthiki ike] ovityita vivali kambutuuka opo kese umwe alie-po vala katutu.” —Suau 6:5-7.

Tyafuile opo alekese okuti kamatyitavela okuavela okulia ovanthu aveho, Andelee apopi okuti: “Apa pena omukuendye una onombolo ononthano mbosevata nonombisi onombali. Mahi, tyituuka-tyi pala ovanthu nga ava aveho?” — Suau 6:9.

Ankho omuvo wondyovo, tyina nkhele Opasikwa menima 32 P.K., ihenehike-po iya eholi ankho liamena unene. Sesusi atumu ovalongwa vae vapopile ovanthu opo vapumphame peholi tyeliyapaula ovikundyi viovanthu 50 no viovanthu 100. Apolo onombolo ononthano nonombisi onombali, elikuambela ku Huku. Konyima, avembaula onombolo, nombisi. Embuavela ovalongwa opo vembuavele ovanthu. Kehuviso, ovanthu aveho avali, avekuta!

Konyima, Sesusi apopila ovalongwa vae okuti: “Ongiyei ovimbembu viahupa-po, opo vihapeseke.” (Suau 6:12) Avakongolola ovimbembu viahupa-po aviyula monosesu 12!