Olie Omona Womulume?

Sesusi novalongwa vae vehika ko Betesata. Ovanthu avemuetela omulume umwe omumphoki, avaiti Sesusi emukuate, opo emuhakule.

Sesusi akuate omulume oo mokuvoko, aende nae kondye yepunda-umbo. Sesusi emunthili omate komaiho, emupulu okuti: “Una etyi weete?” Omulume akumbulula okuti: “Ndyiete ovanthu, mahi vekahi ngatyina omiti vienda-enda.” (Maluku 8:23, 24) Sesusi akuate komaiho omulume oo iya omulume amono-po nawa. Atumu omulume oo, pahe ankho weete-po nawa aye keumbo iya emupopila opo ahanyingile mepunda-umbo.

Konyima, Sesusi novalongwa vae avaende no kokulio kuekumbi, kotyilongo tyo Sesaleia ya Filipe. Ankho pena otyilondeka tyeendwa onokilometulu 40. Epunda-umbo olio, ankho likala komphunda. Kokulio ankho kumoneka Omphunda Helemoo yaya peulu yahikwa nomakoko omaande ekahi ngo ongandyi. Tyafuile ankho paendwa ononthiki onombali.

Moungendi oo, Sesusi aende pomphangu imwe aike opo ekelikuambele. Ankho kuakamba vala onohanyi etyive ine ekwi opo aipawe iya ankho wasukalala novalongwa vae. Vamwe ankho vayeka-po okumulandula, vakuavo tyafuile ankho vangwangwana ine vasoya. Tyafuile ankho velipula omokonda yatyi Sesusi aanyena ovanthu vemulinge ohamba, ine oityi ahalingilile enyingilikilo opo ovanthu vemunoñgonoke vali nawa.

Etyi ovalongwa vehika apa ankho ekahi nokulikuambela, Sesusi evepulu okuti: “Ovanthu vati Omona womulume olie?” Avakumbulula okuti: “Vamwe vati o Suau Batisita, ovakuavo vati o Eliya, iya vamwe vati o Selemiya ine o umwe povauli.” Ovanthu ankho vasoka okuti Sesusi o umwe povalume ovo, pahe watutiliswa. Opo anoñgonoke etyi ovalongwa vae vasoka, Sesusi evepulu okuti: “Iya ku onwe ame-lie?” Liwa-liwa, Petulu akumbulula okuti: “Ove, ove Kilisitu Omona wa Huku una omuenyo.” — Mateusi 16:13-16.

Sesusi apopila Petulu okuti hambukwa mokonda Huku wekuholololela otyipuka otyo, ayawisako okuti: “Nkhupopila okuti: Ove, ove Petulu. Konkhanda ei ame mandyitungu-ko ewaneno liange iya onombundi mbo Pomaendo kambutyivili okuliteya-po.” Sesusi ankho ukahi nokupopia okuti oe muene matungu ewaneno liae, iya vana vatualako noukuatyili kamavatualako Momaendo. Alae Petulu okuti: “Mankhuavela onosapi Mbouhamba wo keulu.” — Mateusi 16:18, 19.

Sesusi ankho kekahi nokupopia okuti Petulu omunene vali kono apositolu ononkhuavo, tupu ankho kekahi nokupopia okuti Petulu makala onkhanda oku matungu ewaneno. Sesusi muene oe Onkhanda oku ewaneno ankho malitungwa. (1 Ova Kolindu 3:11; Ova Efesu 2:20) Mahi, Petulu ankho matambula onosapi ononthatu. Ankho makala nelao liokuavela ovanthu velikalaila omphitilo yokukanyingila Mouhamba wo keulu.

Petulu ankho maundapesa osapi yo tete po Pendekoste yenima 33 P.K., mokulekesa ova Sundeu velivela novanthu vokuetavela efendelo liotyotyili, etyi vena okulinga opo vayovolwe. Osapi ya vali ankho meyundapesa opo aavele ova Samaliya ovataveli, omphitilo yokukanyingila Mouhamba wa Huku. Menima 36 P.K., Petulu ankho maundapesa osapi ya tatu opo aavele omphitilo oyo ovanthu veheva Sundeu vahapitile ekuendye, Koloneliu novanthu ovakuavo. — Ovilinga 2:37, 38; 8:14-17; 10:44-48.

Metompho olio, ono apositolu mba Sesusi ankho vasukalala netyi Sesusi aula okuti mamoneswa ononkhumbi, aipaelwa ko Selusalei. Mokonda Petulu ankho ketyii okuti Sesusi matutiliswa opo akakale keulu, emuihanena ponthele, emulondola ati: “Lilingila okankhenda Tatekulu, kumamono-ale ononkhumbi ngo ombo ambuho.” Mahi Sesusi emutyindamena emupopila okuti: “Kala konyima yange Satanasi! Ove umanya limphundukisa, mokonda kusoko nga Huku, mahi una vala omalusoke ovanthu.” — Mateusi 16:22, 23.

Sesusi aihana ovanthu, evepopila okuti kamatyipepuka okukala omulanduli wae. Wati: “Inkha umwe pu onwe uhanda okundandula, kapondola okukalako pala-e muene, una okulityindila omuti wae wemone iya atualako okundandula. Mokonda una uhanda okuhupisa omuenyo wae, meupesela. Mahi, una wamapeseka komuenyo wae mokonda yange, mekeuyovola.” — Maluku 8:34, 35.

Opo vapandwe na Sesusi, ovalanduli vae vena okukola omutima, avakala tyafuapo pala okupeseka kotyavo. Sesusi wati: “Omunthu una ohonyi yokukala omulongwa wange nokutavela onondaka mbange pokati kovanthu ava onondingavivi vomuvo uno vayeka-po Huku, Omona womulume nae mekemunkhia ohonyi tyina ameya momunkhima wa Tate yae kumwe no noandyu ononthyukuki.” (Maluku 8:38) Tyina Sesusi ameya, ‘makaavela kese umwe ondyambi yata mu etyi alinga.’ — Mateusi 16:27.