Tyesukisa Okuevela

Petulu weivile elondolo lya Sesusi konthele yo ñgeni ovakuatate vena okutetulula ovitateka pokati kavo, mokuovola okupopia na mukuavo. Mahi, tyimoneka okuti nkhele Petulu ankho uhanda okuvalula ovikando omunthu ena okutyilinga.

Petulu apulu okuti: “Tatekulu, ovikando viñgapi mandyievela omukuatate wange tyina amandingi otyivi? Okuti ovikando 7?” Ononkhalamutwe mbumwe mbonongeleya ankho valongesa okuti omunthu una okuevela vala mukuavo ovikando vitatu. Ngotyo, Petulu tyafuile wasokele okuti inkha wevela omukuatate wae “ovikando 7” ankho malekesa okuti una vali okankhenda. — Mateusi 18:21.

Mahi, okuvalula ovikando omunthu apengesa hatyo-ko Sesusi ankho ahanda okulongesa. Ngotyo, aviyula Petulu, ati: “Ame ndyikupopila okuti, havikando 7, mahi ovikando 77.” (Mateusi 18:22) Monondaka ononkhuavo, okuevela katyivalulwa. Petulu ankho kapondola okuvalula ovikando aevela omukuatate wae.

Konyima, Sesusi apopila Petulu na vakuavo ongeleka ivekuatesako okunoñgonoka okuti vena okuevela. Ankho ongeleka yomupika uhahetekelele omuhona wae wokuna okankhenda. Ohamba ankho ihanda ovapika vae vafete onongele mbae. Avemuetela omupika umwe ankho wemulevala onombongo ononyingi, onotalendu 10.000 [mbutuuka onondenaliu 60.000.000]. Omupika oo ankho utupu etyi mafete. Moluotyo, ohamba aitumu omulume oo, nomukai wae, novana vae valandeswe opo vemufete ongele yae. Omupika oo aikila konongolo, aiti kohamba okuti: “Mbambavo nkhevelele-vo, mandyikufete ongele yove.” — Mateusi 18:26.

Ohamba aikala nokankhenda nomupika oo, aimupopila okuti tyikale vala, uheifete vali. Etyi ohamba yalinga ngotyo, omupika aende, akavasa omupika mukuavo ankho wemulevala onondenaliu 100. Akuate omupika mukuavo ahimbika okumukama, ati: “Feta ongele yange aiho.” Mahi omupika mukuavo aikila konongolo komupika oo ankho alevala onombongo, emuiti okuti: “Mbambavo nkhevelele-vo mandyikufete ongele yove.” (Mateusi 18:28, 29) Mahi, omupika wokuaevelwa nohamba ahahetekela omuhona wae. Akuate omupika mukuavo, wemulevala vala onombongo mbehehi, emupake mokaleya alo afeta.

Konyima, Sesusi apopi okuti ovapika vakuavo etyi vamona omupika oo uhalingile mukuavo okankhenda avakapopila ohamba iya nokuanumana ohamba aihana omupika oo, aimupopila okuti: “Mupika ondingavivi, ongele yove aiho natile ikale, mokonda wandyita. No ove ñgeno kukala-vo nonkhenda nomupika mukuenyi, ngetyi ame nakala nonkhenda no ove?” Ohamba nokuanumana aitumu vapake omupika oo mokaleya alo afeta ongele yae aiho. Sesusi ati: “Tate yange keulu, ongotyo malingi kese wike pu onwe uhaevela omukuatate wae nomutima auho.” — Mateusi 18:32-35.

Ongeleka oyo itulongesa okuevela! Huku wetuevela ongele onene tuna yononkhali mbetu. Ovipuka viapenga omukuatate apondola okutulinga, kavihi okuvieleka nevi tulinga Huku. Iya Siovaa ketuevela vala otyikando tyike, mahi ovikando ovinyingi. Okuti katupondola okuevela omukuatate wetu ovikando ovinyingi, namphila pamwe tuna ehunga liokunumana? Ngetyi Sesusi alongesile Melongomona lyo Komphunda, Huku ‘metuevela vala ononkhali mbetu, inkha no onthue tuevela vakuetu.’ — Mateusi 6:12.