Ono Apositolu Vahanda Ñgoo Okulipaka Kounene

Sesusi novalongwa vae ankho vekahi koutundilo wo Peleya vehungi kokuhika ko Selusalei, avayauka Ondongi yo Solondau popepi no Selikoo. Ankho vekahi nokueenda novanthu ovakuavo, vaya ko Pasikwa yenima 33 P.K.

Sesusi ankho ukahi komutwe wovalongwa vae, mokonda ankho uhanda okuhika liwa mepunda-umbo valinge Opasikwa. Mahi ovalongwa ankho vatila owoma. Pu etyi Lasalu ankho anyima iya Sesusi ankho uhungi kokutunda mo Peleya okuenda ko Sundeya, Tomee wapopilile vakuavo okuti: “No onthue tuendei, tukankhie nae.” (Suau 11:16, 47-53) Ngotyo okuenda ko Selusalei ankho otyiponga, otyo ovalongwa vatilila owoma.

Opo Sesusi evepongiye mokonda yetyi ankho matyimoneka komutwe, eveihana pokamphengi, evepopila okuti: “Tukahi nokuenda ko Selusalei, Omona womulume makapakulwa pomavoko ovanene-nakwa, novahoneki vovitumino. Iya mavakapopia okuti una okuipawa. Iya avemupakula kovanthu veheva-Sundeu opo alingwe omukuele nokuvetwa iya avemuipaela momuti; mahi monthiki ya tatu mapindulwa-po.” — Mateusi 20:18, 19.

Otyo ankho otyikando tya tatu Sesusi apopila ovalongwa vae konthele yononkhia mbae netutilo lyae. (Mateusi 16:21; 17:22, 23) Mahi otyikando etyi pahe evepopila okuti maipaelwa momuti. Etyi apopia avetyiivi umwe, mahi avehetyinoñgonoka. Tyafuile ngwe ankho vakevela ouhamba wo Isilayeli upindulwe-po pano pohi, mokonda ankho vahanda okunkhimanekwa, nokuhilivikwa mouhamba oo kumwe na Kilisitu.

Me yono apositolu onombali, Tiaku na Suau, tyafuile ankho o Salomee, nae ankho ukahi nokueenda navo. Sesusi ankho waluka ovo vevali okuti, “Ovana Vomutitimo” mokonda ankho vetyihole tyokulinga ovipuka tyihasete. (Maluku 3:17; Luka 9:54) Palamba-le omuvo tunde etyi vahimbika okuovola okukala nomunkhima Mouhamba wa Kilisitu. Iya me yavo ankho utyii nawa. Pahe afuene pu Sesusi opo evepopile-ko, aikila konongolo, eveitila-ko. Sesusi emupulu okuti: “Oityi uhanda?” Ati: “Mbambavo yeka ovana vange vevali vakapumphame no ove Mouhamba wove, wike kokulio kuove, omukuavo okokumbili kuove.” — Mateusi 20:20, 21.

Otyo aita, ankho vetyihanda ovo Tiaku na Suau. Ankho Sesusi opo amana okupopia konthele yovipuka vikundisa nonya makalingwa, pahe evepopila okuti: “Onwe etyi mukahi nokuita kamutyii. Mupondola okunwa kokopo ame mandyinu?” Ngwe avati: “Enga tupondola.” (Mateusi 20:22) Mahi no ngotyo, tyafuile ankho kavanoñgonokele etyi ahanda okupopia.

Mahi Sesusi evepopila okuti: “Tyotyili onwe mamunu kokopo yange, mahi okupumphama kokulio kuange no kokumbili kuange, hameko ndyimuavela-tyo, mahi tyipewa vana Tate aholovona.” — Mateusi 20:23.

Etyi ovalongwa ovakuavo vanoñgonoka etyi Tiaku na Suau vaita, avanumana. Etyi ankho ono apositolu veliyayesa konthele yolie omunene vali, okuti Tiaku na Suau ankho ovo vekahi nokuyaya unene? (Luka 9:46-48) Katutyii, mahi otyipuka vaita tyalekesa okuti ono apositolu 12 ankho kavekahi nokuendela muetyi valongeswa na Sesusi konthele yokulipaka koututu. Ehando liavo liokukala nomunkhima ankho litualako.

Sesusi atokola okutetulula otyitateka otyo, noluihamo ankho tyikahi nokueta. Aihana ono apositolu ambuho, evelondola noluembia ati: “Onwe mutyii okuti vana vatiwa onohamba mbomalongo, vatumina ovanthu iya ovanene vatyo vankhinkhilinya vana vekahi mombuelo yavo. Mahi ha ngotyo-ko tyina okulingwa pokati kenyi; una uhanda okukala omunene pu onwe una okukala omuundapi wenyi, iya una uhanda okukala omutete pu onwe una okukala omupika wa aveho.” — Maluku 10:42-44.

Sesusi evelekesa okuti ankho vena okuhetekela ongeleka yae. Evehangununina okuti: “Ngetyi Omona womulume eheile okuundapelwa, mahi weila okuundapela vakuavo nokuava omuenyo wae opo ayovole ovanthu ovanyingi.” (Mateusi 20:28) Mokueenda kuomanima etatu, Sesusi ankho ukahi nokuundapela vakuavo. Iya ankho metyilingi vali unene, mokuyeka omuenyo wae matyietela ouwa ovanthu aveho! Ovalongwa ankho vesukisa okuhetekela otyituwa otyo tya Kilisitu tyokuhanda okuundapela vakuavo tyipona okuundapelwa, nokulipaka koututu avahaovola omunkhima.