Onongeleka Onombali Konthele Yomapia Omivinyu

Mondyuo ya Huku, Sesusi wanguanguanesa ovanene-nakwa novakulu, ankho vemupula olie wemutuma okulinga ovipuka ankho alinga. Ekumbululo lya Sesusi alivekalesa tyihena etyi mavapopi. Konyima, apopi ongeleka yalekesa nawa oñgeni ovanthu ovo ankho vekahi.

Sesusi ati: “Omulume umwe ankho una ovana vevali. Apopila omona wo tete okuti, ‘Mona wange, hono enda kaundape kepia liomivinyu.’ Omona emukumbulula okuti, ‘Ame himaende,’ mahi konyima elivele, aende. Iya apopila omona wa vali otyipuka tyike. Omona akumbulula he okuti, ‘Ame mandyiende,’ mahi ahaende. Olie povana ovo walinga etyi he atuma?” (Mateusi 21:28-31) Ekumbululo limoneka nawa — omona wo tete, konyima walinga etyi he ahanda.

Ngotyo, Sesusi apopila onondyale mbae, ati: “Ame ndyimupopila otyili okuti, ovatanthi velilimu nomakunga mavatetekela ku onwe okunyingila Mouhamba wa Huku.” Ovatanthi velilimu nomakunga po tete ankho kavaumbila Huku. Mahi, ngomona wo tete, konyima avelivele, pahe ankho vekahi nokuumbila Huku. Tyelikalela navo, ononkhalamutwe mbonongeleya ankho vekahi ngomona wa vali, mokonda vapopia okuti vaumbila Huku mahi tyotyili kavemuumbila. Sesusi ati: “Suau Batisita weile ku onwe okulongesa ondyila youviuki, mahi onwe kamuetavelele. Mahi ovatanthi velilimu nomakunga avemutavela, no ngotyo namphila muetyimona, kamuelivelele iya amumutavela.” — Mateusi 21:31, 32.

Sesusi apopi vali ongeleka onkhuavo. Otyikando etyi Sesusi walekesa okuti, etyi ononkhalamutwe mbonongeleya vapengesa hakuhesukile vala nokuumbila Huku. Tupu ankho onondingavivi. Sesusi apopi okuti: “Omulume umwe watuika omiti viomivinyu mepia liae, elihondyo, alingi-mo omphangu yokuhinina onouva, tupu atungu-mo omutala; konyima apake-mo ovaundapi, ngwe alingi oungendi. Etyi ovinyango viapia, atumu omupika wae kovaundapi ovo, opo akapole ovinyango. Mahi, avemukuate avemuvete iya avemutaata tyihemupele natyike. Atumu-ko vali omupika omukuavo, avemuvete momutwe avemupenye. Atumu-ko vali omukuavo iya oo avemuipaa. Atumu-ko vali ovakuavo ovanyingi, vamwe avevevete, ovakuavo aveveipaa.” — Maluku 12:1-5.

Okuti vana ankho vatehelela Sesusi mavanoñgonoka ongeleka oyo? Tyafuile vahinangela onondaka Isaiya evepopile, etyi ati: “Omuvinyu wa Siovaa womambamba ovita, eumbo lyo Isilayeli; ovanthu vo Sundaa, epia ankho ehole. Watualako okukevelela ouviuki, mahi ankho valinga etyi tyihaviukile.” (Isaías 5:7) Ongeleka ya Sesusi ankho yelifwa no oyo. Hekulu yepia o Siovaa iya epia liomivinyu elongo lyo Isilayeli, ongandyo ankho iliyakulila, Ovitumino vya Huku. Siovaa ankho utuma ovauli opo valongese ovanthu vae nokuvekuatesako na vaave ovinyango oviwa.

Mahi, “ovaundapi” avalingi onya ‘ovapika’ ankho evetumikisa, aveveipaa. Sesusi ahangununa okuti: “Ankho [hekulu yepia] una vali umwe, omona wae ehole. Okuhulilila-ko ngae atuma-ko, mokonda ankho wasoka okuti: ‘Mavakala nonthilo nomona wange.’ Mahi, ovaundapi ovo, avelipopila poyavo okuti: ‘Omphinga yatyo oyou. Endyuei, tumuipaei, opo epingo liae likale lietu.’ Ngotyo avemukuate avemuipaa.” — Maluku 12:6-8.

Pahe Sesusi apulu okuti: “Tyina hekulu yepia ameya, malingi ñgeni ovaundapi ovo?” (Maluku 12:9) Ononkhalamutwe mbonongeleya avakumbulula okuti: “Mokonda youngangala wavo, tyina eya meveipaa, mepia apake-mo ovalimi ovakuavo, mavemuavela ovinyango tyina viamapi.” — Mateusi 21:41.

Ngotyo, tyihetyii vapopia ekoyeso liavo muene mokonda ankho navo vekahi ‘povaundapi vepia’ lya Siovaa, elongo lyo Isilayeli. Ovinyango Siovaa ankho akevelela kovaundapi ovo, pakutikinya okukala nekolelo Momona wae, Mesiya. Sesusi atale kononkhalamutwe mbonongeleya, ati: “Onwe nalumwe muatangele Movihonekwa evi, okuti: ‘Emanya ovatungi vaanya, olio emanya liavilapo liopevindi. Emanya olio lituka ku Siovaa, lihuvisa komaiho etu?’” (Maluku 12:10, 11) Konyima Sesusi ahangununa etyi apopia, ati: “Otyo ndyimupopilila okuti, Ouhamba wa Huku mamuupolwa aupewa elongo maliave ovinyango.” — Mateusi 21:43.

Ovahoneki vovitumino novanene-nakwa vaimbukile okuti Sesusi “ovo ekahi nokupopia monthengele-popia oyo.” (Luka 20:19) Avahande vali okuipaa Sesusi, “omphinga” yatyo. Mahi mokonda ankho vena owoma novanthu, ankho vasoka okuti Sesusi omuuli, avahaovola okumuipaa pomuvo opo.