OVE ANKHO UTYIALE?
Omokonda yatyi o Ninive yo kohale ankho iihanenwa okuti “epundaumbo liokunengula ohonde”?
Otyimato tyilekesa omafualali atyinda omitwe vionondyale mbakuatwa avembuongiya onthumbo
O Ninive ankho epundaumbo enene lio Asiria. Ankho epundaumbo limwe lina onondyuo mbankhimana, no nondyuo mbokufendela, nomatapalo omanene, novimato viapama nawa. Omuuli omu Hebreu Naum wapopile epundaumbo olio okuti “epundaumbo liokunengula ohonde.”—Naum 3:1.
Onondaka ombo ombotyotyili, mokonda ovimato mombala ya Senakelibe mo Ninive, vilekesa onya onene ova Asiria ankho valinga. Olutalatu lumwe, lulekesa omu Asiriu umwe ukahi nokunana elaka lionkhuatwa imwe yakutwa ailangekwapo. Omalutalatu alekesa okuti ononkhuatwa ankho mbupakwa otyivela komayulu ine okomulungu, avakutilako epanda otyo vanana. Omafualali akuatwa ankho avalekwa momunyino omitwe vio nohamba mbavo, atyikala ngatyina otyilanda.
Omulume umwe woko Asiria utiwa Archibald Henry Sayce wapopia onya ankho valinga tyina valwisa epundaumbo limwe avanyingilamo, wati: “Ankho vaongiya omitwe viovanthu mondyila omu vaenda, ovakuendye novahikuena ankho vayokwa nomuenyo ine valingwa ovipuka ovikuavo ovivi. Ovalume ankho vapapelwa momuti, vayuwa nomuenyo, nokutongolwa omaiho, ine okutetwa omaoko no nomphai, nomakutwi, nomayulu.”
Omokonda yatyi ankho ova Judeu vapakela vali otyimato tyiveti monthulo kombanda yonondyuo mbavo?
Huku wapopilile ova Judeu okuti: “Tyina utunga ondyuo yove omphe, kombanda una okutungako vali otyimato tyiti monthulo, opo una ukahiko ahatoke, okala nonkhali yohonde mokonda yondyuo yove.” (Deuteronômio 22:8) Okulinga ngotyo ankho tyakolela, mokonda kohale ova Judeu ankho vehole unene okukala kombanda yonondyuo mbavo kumwe no nombunga mbavo.
Kombanda yonondyuo mbova Isilayeli ovanyingi, ankho kuna oluhandya. Ankho omphangu ikahi nawa opo ovanthu vayotele, nokufila omphepo ine okulinga ovilinga viomeumbo. Pokuenye, ovanthu ankho oko valala. (1 Samuel 9:26) Vokulima, ankho oko vanyaneka ovilia tyina nkhele venekunkhe ine omakuyu.—Josué 2:6.
Tupu ankho oko vafendela, tyilinge efendelo liotyotyili ine olio matutu. (Neemias 8:16-18; Jeremias 19:13) Apostolu Petulu waile kombanda yondyuo komeliya opo elikuambele. (Atos 10:9-16) Ankho otyiwa unene okukalako tyina kuna omiti viokahi.
Omukanda The Land and the Book (Ohi Nomukanda) wati, ondyuo yomu Isilayeli ankho ina onosikata mbuenda nokombanda yondyuo, “kondye yondyuo, mahi mokati kepata.” Moluotyo, vomeumbo ankho vapondola okutunda kombanda yondyuo avahanyingila mondyuo. Tyafuile otyo Jesus alondolele konthele yokutunda liwa mepundaumbo ankho lihungi kokuhanyuako okuti: “Omunthu ukahi kombanda yondyuo, ahatuluke okuya okupola ovipuka mondyuo.”—Mateus 24:17.