Kilisitu Wapakulwa, Akuatwa

Pahe ankho okombimba. Ovanakwa ankho velipakela-mo okufeta Sunda onombongo 30 mbopalata opo evepakulile Sesusi. Moluotyo, akuya ovanakwa ovanyingi nova Faliseu, Sunda evehongolela avakaovola Sesusi. Ankho veya nomafualali omanyingi ova Loma nonkhalamutwe yao.

Pu etyi ankho valia Opasikwa, Sesusi watumine Sunda aye. Mokutala, Sunda waviukile vala kovanene-nakwa. (Suau 13:27) Ovanene-nakwa aveliongiya novayungi notyikundyi tyimwe tyomafualali. Tyafuile Sunda tete wevetuaile kondyuo Sesusi alingila Opasikwa nono apositolu mbae. Mahi pahe avatauluka Evota lyo Kindoloo, avaende komphangu itiwa Getesemani. Ankho vahanda okuvasa Sesusi, vatyinda oviti, novihihi, novitenyo.

Sunda ankho ukahi nokuhongolela ovanthu ovo Komphunda Yomindyambi, mokonda ankho wii nawa oku mavasi Sesusi. Mokueenda kuosimanu ankho yokualamba, etyi Sesusi nono apositolu valinga omaungendi okutunda ko Betania okuenda ko Selusalei, ovikando ovinyingi ankho vatalama mo Getesemani. Mahi pahe ankho okounthiki iya Sesusi tyafuile ankho ukahi mombuelo yomiti viomindyambi momphangu oyo. Ngotyo, oñgeni omafualali ehenemone Sesusi, ankho maemuimbuka? Opo Sunda evekuateseko, eveavela enyingilikilo. Ati: “Una namape ombesinyu, oe yatyo, mukuatei, amuende nae amuhemuyeke.” — Maluku 14:44.

Etyi ovanthu ovo vehika momphangu oyo, Sunda amono Sesusi nono apositolu mbae, aviuku vala ku Sesusi. Sunda emukukunya okuti: “Oñgeni Mulongesi!” Iya emupe ombesinyu. Sesusi emupulu okuti: “Panga liange, oityi tyekueta pano?” (Mateusi 26:49, 50) Sesusi akumbulula epulo liae nepulo, ati: “Sunda upakula Omona womulume nombesu?” (Luka 22:48) Ehemupopila vali natyike.

Pahe Sesusi afuene kotyimimi tyovihihi novitenyo, apulu okuti: “Olie muovola?” Ovanthu ovo avati: “Tuovola Sesusi omu Nasalee.” Nomutima wakola, Sesusi ati: “Ame uno.” (Suau 18:4, 5) Mokonda ankho hatyo-ko vakevela, avatokela pohi.

Namphila ankho vatokela pohi iya kuanthikovela, Sesusi kakahatekele, wevepulile vali olie vaovola. Etyi vapopia vali okuti: “Tuovola Sesusi omu Nasalee,” Sesusi evepopila okuti: “Ame nemupopila okuti ame uno. Inkha ame mukahi nokuovola, yekei ovalume ava vaye.” Alo umwe momuvo oo wepuiya, Sesusi wahinangelele etyi apopile-ale okuti nawike povalongwa vae ankho mavombo-po. (Suau 6:39; 17:12) Sesusi ankho waamena ono apositolu mbae ovakuatyili iya nawike puvo wavomba-po, “pavomba vala omona wehanyauno,” Sunda. (Suau 18:7-9) Moluotyo, aiti opo vayeke ovalanduli vae ovakuatyili vaye.

Etyi omafualali akatuka, aeya no pu Sesusi, iya ono apositolu avanoñgonoka okuti Sesusi makuatwa. Avapulu okuti: “Tatekulu, tupondola okuvelwisa nomutunga?” (Luka 22:49) Tyina Sesusi nkhele ehenekumbulule, Petulu akuate umwe pomitunga vivali ankho vatyinda. Autukila Maluku, omupika womunene-nakwa wavilapo, emutete okutwi kwo kokulio.

Sesusi avelula otyipute tya Maluku, okutwi kwae akukala nawa. Konyima, evelongesa otyipuka tyimwe tyesukisa unene, etyi apopila Petulu okuti: “Kondola omutunga pomphangu yao, mokonda aveho vakuatela vakuavo omutunga navo mavakaipawa nomutunga.” Sesusi ankho weliava-le, mokonda wapopia okuti: “Oñgeni etyi Ovihonekwa viapopia okuti tyina okulingwa ngotyo, matyifuiswapo?” (Mateusi 26:52, 54) Ayawisako okuti: “Ame hipondola okunwa okopo napewa na Tate?” (Suau 18:11) Sesusi ankho wetavela alo umwe okunkhia opo alinge etyi Huku ahanda.

Sesusi apulu ovanthu okuti: “Onwe mueya nomitunga novimuti ngoti mueya okukuata otyimphulu? Ononthiki ambuho ame ankho ndyikala mondyuo ya Huku nokulongesa, mahi amuhankhuate. Mahi ovipuka ovio aviho vialingwa opo ovihonekwa viovauli vifuiswepo.” — Mateusi 26:55, 56.

Otyikundyi tyomafualali, nonkhalamutwe yao, novayungi vova Sundeu avakuate Sesusi, avemukutu. Etyi ono apositolu vamona otyipuka otyo, avakahateka. Mahi, “omukuendye umwe” — mokutala omulongwa Maluku — esala pokati kovanthu otyo alandula Sesusi. (Maluku 14:51) Ovanthu avaimbuka omukuendye oo, avahande okumukuata, akahateka asipo ovikutu viae.