“Endei, Kalongesei Ovanthu Movilongo Aviho”

1, 2. Omapulo patyi ovanthu vapondola okulilinga mokonda yonondaka mba Jesus mbukahi mu Mateus 24:14?

JESUS waula okuti kononthiki mbahulililako oviwa ovipe viouhamba mavikaiviswa kovanthu vatyo aveho. (Mateus 24:14) Mokonda Tunombangi mba Jeova tuiwe mouye auho mokonda yovilinga vietu viokuivisa. Vamwe vehole onondaka tuivisa, ovakuavo vembuyele. Mahi namphila vamwe vahahande onondaka mbetu, nongotyo vena onthilo novilinga vietu. Tuna onthumbi yokuti tukahi nokulinga otyilinga Jesus aulile. Tuna umwe onthumbi yokuti tukahi nokutyilinga? Oñgeni tupondola okukala nonthumbi yokuti, ovilinga vietu viokuivisa ovio umwe Jesus aula?

² Ovikundyi ovinyingi vio nongeleya vipopia okuti vekahi nokuivisa onondaka mba Jesus. Mahi vaivisa vala nomalongomona mokapela, nomo televisau, ine mo internete, ine vapopila vala ovanthu oñgeni vapondola okulilongesa konthele ya Jesus. Ovakuavo vasoka okuti onkhalelo onkhuavo yokuivisa, okukuatesako ovanthu vesukisa, ngokukala ondotolo, ofulumelu ine omulongesi. Mahi okuti ovilinga ovio, ovio ovilinga Jesus apopia?

 3. Ngetyi tyipopia Mateus 28:19, ovipuka patyi vikuana Jesus atuma ovalanduli vae valinge?

³ Okuti Jesus ankho uhanda ovalongwa vae vakevele ovanthu veye kuvo? Au! Etyi atutiliswa, Jesus wapopilile ovalanduli vae ovanyingi okuti: “Endei, kalongesei ovanthu movilongo aviho opo vakale ovalongwa. Iya amuvembatisala. . . , Velongesei ovipuka aviho ame nemutuma.” (Mateus 28:19, 20) Ngo valanduli va Jesus, onthue tuesukisa okulinga ovipuka vikuana. Onthue tuesukisa okulinga ovalongwa, avambatisalwa, nokuvelongesa. Mahi tete, tuesukisa okuenda kovanthu. Omunongo umwe wapopia okuti: “Ondaka ‘endei’ yapopilwa kese mulongwa, tyilinge wenda popepi ine okokule okukaivisa vakuavo.”​—Mateus 10:7; Lucas 10:3.

 4. Oityi tyakutikinya okukala “ovafwi vovanthu”?

⁴ Oityi Jesus akevelela kovalongwa vae? Okuti Jesus uhanda vaivise aveke ine uhanda vakale otyikundyi tyaongana? Mokonda katyitavela omunthu wike aivise “kovanthu aveho” ovalongwa va Jesus vesukisa okukala otyikundyi tyaongana. Otyo Jesus ankho ahanda etyi akonga ovalongwa vae vakale “ovafwi vovanthu.” (Tanga Mateus 4:18-22.) Jesus ankho kekahi nokupopia etyi tyilinga omunthu ufwa nondyolo, upaka okulia kondyolo iya akevela ombisi inumateko. Mahi, okufwa Jesus apopia kuakutikinya okuundapesa owanda. Onkhalelo oyo yokufwa yesukisa okulinga ononkhono, nokuongana, nokuundapela kumwe.​—Lucas 5:1-11.

 5. Omapulo patyi ekuana tuesukisa okukumbulula iya omokonda yatyi?

⁵ Opo tunoñgonoke ovalie vekahi nokuivisa onondaka onongwa hono, tuesukisa okukumbulula omapulo aa ekuana:

• Onondaka patyi ovalanduli va Jesus ankho vaivisa?

• Oityi ankho tyivelunda?

• Onkhalelo patyi ankho vaundapesa pokuivisa?

• Ovilinga viavo vina okuiviswa alo pi, iya omuvo ulifuepi vina okulingwa?

Omakumbululo omapulo oo maetukuatesako okuimbuka ovalie vekahi nokulinga ovilinga ovio vituala komuenyo, tupu maapameka ehando lietu liokutualako okuivisa.—1 Timóteo 4:16.

 6. Omokonda yatyi ove una onthumbi yokuti Onombangi mba Jeova valongesa etyi tyaviuka?

⁶ Tanga Lucas 4:43. Jesus waivisile “onondaka onongwa Mbouhamba” iya tupu uhanda ovalongwa vae valinge ngotyo. Otyikundyi patyi tyovanthu vekahi nokuivisa onondaka onongwa kovanthu aveho? Onombangi mba Jeova vala! Namphila vamwe vehetutavela, mahi vetyiimbuka. Mongeleka, omisionaliu yongeleya imwe yakalele kovilongo ovinyingi, yatompholele no Nombangi mbumwe mba Jeova. Kovilongo aviho akala, ankho upula onombangi mba Jeova okuti, onondaka patyi muivisa. Omisionaliu yapopia okuti: “Aveho tyihena onondunge vakumbulula vala otyipuka tyike: ‘Onondaka onongwa Mbouhamba wa Huku.’” Onondaka mbo misionaliu mbalekesa nawa okuti onthue tuna onondunge tupu Tuvakristau votyotyili velikuata okapandi. (1 Coríntios 1:10) Ouhamba wa Huku osapi Yomutala Womulavi Wivisa Ouhamba wa Jeova. Omukanda oo ukahi nokulingwa momalaka 254, iya kese hanyi kulingwa omikanda 59.000.000 iya omukanda oo ukahi nokuawa mouye auho!

 7. Oñgeni tutyii okuti ononkhalamutwe Mbonongeleya, kambuivisa onondaka mbaviuka?

⁷ Ononkhalamutwe mbonongeleya mbo matutu kambuivisa Ouhamba wa Huku. Inkha valinga elongomona lipopia Ouhamba, ovanyingi puvo vapopia vala okuti Ouhamba ukahi momutima womunthu. (Lucas 17:21) Kavalongesa ovanthu okuti Ouhamba outumini ukahi keulu iya ohamba youhamba oo o Jesus. Mahi vapopia vala konthele ya Jesus Ponatale. Kavahangununa okuti Ouhamba oo vala mauya okumanako ovitateka viovanthu iya apa katutu maumaneko ovitateka aviho vio vanthu pano pohi. (Revelação 19:11-21) Tyimoneka nawa okuti ononkhalamutwe mbonongeleya kambutyii etyi Jesus makalinga Ngohamba Youhamba wa Huku. Mokonda kavanoñgonoka onondaka mba Jesus, tupu kavanoñgonoka omokonda yatyi vena okuivisa.

 8. Olusoke patyi luapenga ovanthu vamwe vena konthele yovilinga viokuivisa?

⁸ Ovalongwa va Jesus kavaivisa opo vafetwe ine opo vatunge onondyuo onongwa. Jesus wati: “Muetyipewa otyali, nonwe tyiavei otyali.” (Mateus 10:8) Ngotyo ovilinga viokuivisa haviokulinga onondando. (2 Coríntios 2:17) Ovalongwa va Jesus ankho kavaiti opo vafetwe mokonda yovilinga viokuivisa. (Tanga Atos 20:33-35.) Namphila Jesus aavele onondonga mbayandyuluka nawa, mahi onongeleya ononyingi mbuita onombongo opo vafete ononkhalamutwe mbavo novanthu vaundapa movikapela viavo. Mokonda yotyo, ononkhalamutwe Mbonongeleya mbukahi nokumonena-mo.​—Revelação 17:4, 5.

 9. Oñgeni Onombangi mba Jeova valekesa okuti ovilinga viokuivisa vevilinga nomalusoke aviuka?

⁹ Okuti Onombangi mba Jeova vakuluminya ovanthu okuava onombongo Monondyuo mbavo Mbomaliongiyo ine movionge? Au! Ovilinga viavo vikuatesuako nonombongo mbuawa novanthu votyali. (2 Coríntios 9:7) Menima liokualamba, Onombangi mba Jeova vaundapa onombiliau onombali mbo noola movilinga viokuivisa onondaka onongwa iya kese hanyi valongesa ovanthu Ombimbiliya valamba po nomiliau etyive. Kavaiti onombongo tyina vaivisa, mahi vahambukwa okuundapesa onombongo mbavo movilinga ovio. Omaovololo amwe apopia konthele yovilinga vio Nombangi mba Jeova okuti: “Etyi vahanda vala okuivisa nokulongesa.” Tupu vapopia okuti Onombangi mba Jeova vetupu ononkhalamutwe mbufetwa. Inkha katufetwa tyina tuivisa, oityi tyitulunda okuivisa? Onthue tulinga ovilinga ovio noumphua-lundo mokonda tuhole Jeova tupu tuhole ovanthu. Otyituwa otyo tyifuisapo eulo lia Salmo 110:3. (Tanga.)

10. Ononkhalelo patyi mbokuivisa Jesus novalongwa vae ankho vaundapesa?

¹⁰ Ononkhalelo patyi Jesus alingile iya ambuundapeswa novalongwa vae? Ankho venda oku vapondola okuvasa ovanthu. Mongeleka, ankho vaivisa momatapalo napana palingilwa ovitanda. Tupu ankho vakaovola ovanthu pomaumbo avo. (Mateus 10:11; Lucas 8:1; Atos 5:42; 20:20) Okuivisa umbo na umbo onkhalelo imwe ikahi nawa pala okuivisa ovanthu aveho.

11, 12. Oñgeni ononkhalamutwe Mbonongeleya vahanda okuhetekela ovanthu va Jeova konthele yokuivisa onondaka onongwa?

¹¹ Okuti ononkhalamutwe Mbonongeleya vaivisa onondaka onongwa ngetyi Jesus alingile? Ovikando ovinyingi, vafeta ononkhalamutwe tyina valingila elongomona ovanthu vo mongeleya yavo. Ononkhalamutwe mbonongeleya kavalingi ovalongwa ovape, mahi vatualako vala okulongesa ovanthu vekahi mongeleya. Pamwe, vaavela ondundo ovanthu vavo opo vaivise. Mongeleka, menima lio 2001, o Papa João Paulo II wahoneka omukanda umwe apopi okuti ovanthu vomongeleya vena okuivisa ono Evandyeliu nokukala nombili nga apostolu Paulu wapopia okuti: “Tatiei inkha hivisa o Evandyeliu.” O papa aipopi okuti ovilinga evi viokuivisa vina okulingwa novanthu aveho vomongeleya. Mahi, kavehi vekahi nokulandula elondolo olio.

¹² Iya Onombangi mba Jeova? Ovo vala vaivisa okuti Jesus ukahi nokutumina ngo Hamba tunde mo 1914. Vetavela ku Jesus iya vapaka tete momuenyo wavo ovilinga viokuivisa. (Marcos 13:10) Omukanda Pillars of Faith—American Congregations and Their Partners (Onomphandyi Mbekolelo—Ewaneno Liova Amelika Novanthu Vayo) wapopia okuti, Konombangi mba Jeova, ovilinga viokuivisa otyilinga tyimwe tyakolela unene. Tupu wapopia okuti tyina vavasa ovanthu vena ondyala, vehena ombunga, vavela, valinga atyiho opo vevekuateseko, mahi nalumwe valimbuako otyipuka tyakolela vali, okuivisa konthele yonthyulilo youye uno nokulongesa ovanthu konthele yeyovo. Onombangi mba Jeova vatualako okuivisa onondaka ombo, nokuhetekela ononkhalelo mba Jesus mbokuivisa no mbo valongwa vae.

13. Ovilinga viavo vina okuiviswa alo pi?

¹³ Jesus wapopia okuti ovalanduli vae vena okuivisa nokulongesa onondaka onongwa “kombanda yohi aiho.” Wevetuma valinge ovalongwa vovanthu “ovilongo aviho.” (Mateus 24:14; 28:19, 20) Otyo tyihangununa okuti tyesukisa okuiviswa onondaka onongwa mouye auho.

14, 15. Oityi tyilekesa okuti Onombangi mba Jeova vekahi nokufuisapo eulo lia Jesus konthele yokuyandyanesa ovilinga mouye auho? (Tala olutalatu apa pahimbikila onthele.)

¹⁴ Onombangi mba Jeova ovo vala vekahi nokufuisapo eulo lia Jesus liokuti onondaka onongwa mbouhamba mbuna okuiviswa mouye auho. Omokonda yatyi tupopila ngotyo? Ko Estados Unidos, kuna ononkhalamutwe mbo Nongeleya 600.000, mahi kuna Onombangi mba Jeova 1.200.000 vaivisa onondaka onongwa. Mouye auho, muna omalombe Okatolika ena 400.000, mahi onombangi mba Jeova valamba pono nomiliau 8 vaivisa onondaka onongwa mba Huku movilongo vina 240. Tyimoneka nawa okuti Onombangi mba Jeova vekahi nokuivisa onondaka onongwa mouye auho, opo vankhimaneke nokuhilivika Jeova!​—Salmo 34:1; 51:15.

¹⁵ Mokonda Tunombangi mba Jeova tuhanda okuivisa onondaka onongwa kovanthu ovanyingi putyina onthyulilo yeheneye. Opo tulinge otyilinga otyo, tuna okupitiya, nokulinga omikanda ovinyingi, ono tratadu, novionge iya nomikanda viokukonga ovanthu veye Pehinangelo lia Tatekulu, momalaka alamba po 700. Tuviavela ovanthu otyali. Menima liokualamba, tualinga omikanda viapolwa Mombimbiliya vina 4,5 yo nombiliau. Tupu tuava Onombimbiliya Tradução do Novo Mundo das Escrituras Sagradas mbulamba ponomiliau 200, momalaka 130. Mo site yetu muvahiwa omikanda momalaka alamba po 750. Onombangi mba Jeova ovo vala vekahi nokulinga otyilinga otyo tyihuvisa.

16. Oñgeni tutyii okuti Onombangi mba Jeova vakuatesuako no nonkhono mba Huku?

¹⁶ Alo pi ovilinga vio kuivisa mavitualako? Jesus wapopia okuti onondaka onongwa mambukaiviswa alo onthyulilo iya. Onthue Nombangi mba Jeova, tutualako okuivisa namphila tukahi kononthiki mbonthyulilo, mokonda tukuateswako nononkhono mba Jeova. (Atos 1:8; 1 Pedro 4:14) Ovanthu vamwe vonongeleya vapopia okuti: “Vena ospilitu sandu.” Mahi okuti vafuapo opo valinge ovilinga Onombangi mba Jeova vekahi nokulinga? Ovikundyi vimwe vihole okutuhetekela okuivisa, mahi kavetyivili. Ovakuavo vetyilinga, mahi mokamuvo kehehi. Nkhele vamwe vaivisa umbo na umbo, mahi kavaivisa onondaka onongwa Mbouhamba wa Huku. Tupu vamwe kavalingi ngetyi Jesus alingile.

17, 18. (a) Omokonda yatyi tutyii okuti Onombangi mba Jeova ovo vala vaivisa onondaka onongwa Mbouhamba hono? (b) Omokonda yatyi tutyivilila okutualako okulinga ovilinga ovio?

¹⁷ Hono ovalie vekahi nokuivisa onondaka onongwa Mbouhamba? Onombangi mba Jeova Vala! Oñgeni onthue tutyii? Mokonda onthue vala tuivisa onondaka onongwa mbouhamba. Tyina tukaovola ovanthu movilinga viokuivisa, tuundapesa ononkhalelo mbaviuka. Otyipuka tyitulunda okuivisa, ohole tuna na Jeova iya no vanthu. Ovilinga vietu viokuivisa vikahi nokuliyandyana mokonda tukahi nokulongesa ovanthu vomalongo, nomalaka. Iya matutualako okuivisa onondaka onongwa Mbouhamba alo onthyulilo iya!

¹⁸ Otyilinga tyokuivisa onondaka onongwa ovanthu va Jeova vekahi nokulinga mononthiki mbuno mbonthyulilo, tyihuvisa unene. Mahi okuti ovilinga ovio tuvilinga vala kononkhono mbetu muene? Apostolu Paulu wati: “Huku, ukahi nokuundapa mokati kenyi, opo mukale nehando liokutyilinga.” (Filipenses 2:13) Mahi Jeova utualako okutuavela ononkhono tuesukisa opo tulinge etyi tuvila movilinga viokuivisa onondaka onongwa!​—2 Timóteo 4:5.