Ombatisimu Yeeta Oviwa!

Sesusi wapopile okuti aveho vahanda okukala ovanthu va Huku vena okumbatisalwa. (Tanga Mateusi 28:19, 20.) Mahi muene umwe, oityi tyitiwa ombatisimu? Oityi tuna okulinga tumbatisalwe?

1. Omunthu umbatisalwa ñgeni?

Ondaka oyo itiwa “ombatisimu”, yatunda melaka lyo Ngeleku, ipunguhuna okuti “okunyingiyua onthuitwi.” Otyo umwe Sesusi alingilwe ngotyo. Etyi ati pokwambatisalwa Mondongi yo Solondau, olutu lwae aluho alupakwa momeva. Ombimbiliya ipopia okuti etyi pahe ambatisalwa, “ayaulwa momeva.” (Maluku 1:9, 10) Na hono, ovanthu va Huku tyina vambatisalwa, olutu lwavo aluho lupakwa momeva.

2. Oityi omunthu apopila vakuavo tyina ambatisalwa?

Omunthu tyina ambatisalwa ngotyo uli nokupopila vakuavo okuti welipakula-le ku Siovaa Huku. Mahi tyitiwa okulipakula, oityi? Omunthu tyina ehenembatisalwe, tete una okulikuambela ku Siovaa, emupopila okuti memulingila apeho. Tupu upopila Siovaa okuti oe vala mafende, apeho malingi etyi atuma. Tyina elipakula ngotyo, ‘kakala-ko vali palae muene, utualako okulandula’ Sesusi. Ulikuatehila umwe alinge etyi Sesusi apopile netyi alingile. (Mateusi 16:24) Tyina tulipakula ku Siovaa, pahe atumbatisalwa, ngotyo tukala vali omapanga omanene a Siovaa, nomapanga omanene a vakuetu tufenda navo.

3. Oityi omunthu ena okulinga opo ambatisalwe?

Opo uhike kokumbatisalwa, una okunoñgonoka nawa Siovaa, omuyumbu onthumbi. (Tanga Ova Hebeleu 11:6.) Tyina wamanoñgonoka umwe nawa Siovaa, omuyumbu onthumbi, tupu momuhumbu vali unene. Otyikwavo una okulinga, okulinga etyi Ombimbiliya ipopia, otyilongesa vakwenyi. (2 Timotiu 4:2; 1 Suau 5:3) Tyina pahe wamatale umwe okuti uli ‘nokueendela omu Siovaa ahandela na umuhambukiswe nawa-nawa’ opo upondola okulipakula kwe, ombatisalwa. — Ova Kolosu 1:9, 10.a

KUHANDE OKUNOÑGONOKA VALI?

4. Ombatisimu ya Sesusi ina etyi itulongesa

Tangei Mateusi 3:13-17 mutale etyi tyaendele-po etyi Sesusi ambatisalwa. Pahe amutomphola omapulo aa:

• Okuti etyi Sesusi ambatisalwa, ankho olukembe?

• Wambatisalelwe ñgeni? Okuti vemutilile vala omaande pombalanganga kwapwa?

Sesusi wahimbika umwe vala okulinga ovilinga Huku emutumine, monthiki ambatisalwa. Tangei Luka 3:21-23 na Suau 6:38, amutomphola epulo eli:

• Okutuka apa Sesusi ambatisalwa, otyilinga patyi alingile vali?

5. No ove upondola okumbatisalwa

Hamwe tyina usoka ñgaa okulipakula ku Siovaa, ombatisalwa, utila owoma. Mahi katutu-katutu, tyina ulilongesa, no ove motyihande umwe tyokumbatisalwa. Talei OVIDIU, mutale ovanthu vamwe navo valingile ngotyo.

OVIDIU: Oityi Una Okulinga Ukale Noupanga Omuwa na Siovaa? (1:11)

Tangei Suau 17:3 na Tiaku 1:5, amutomphola epulo eli:

• Oityi omunthu ena okulinga ehike kokumbatisalwa?

1. Okulipakula, okulikuambela ku Siovaa atumupopila okuti matumulingila apeho

2. Tyina pahe tumbatisalwa, tupopila vakuetu okuti tuelipakula-le ku Siovaa

6. Omunthu tyina ambatisalwa ukala mombunga ya Huku

Okutuka umwe onthiki tumbatisalwa, tulikuata-po na vakuetu tufenda navo, atukala ombunga. Ombunga imwe onene-ale, ili mouye auho! Aveho Onombangi mba Siovaa mouye auho, valongeswa vala otyipuka tyike, vetavela ovitumino vya Siovaa. Kumavasi hamwe Onombangi mba Siovaa votyilongo tyimwe valongesa tyimwe tyelikalela na vakuavo votyilongo otyikuavo. Tangei Salmo 25:14 na 1 Petulu 2:17, amutomphola omapulo aa:

• Omunthu tyina ambatisalwa:(a) Oñgeni oupanga wae na Siovaa ukala? (b) Oñgeni oupanga wae na vakuavo vafenda Siovaa ukala?

ETYI WELILONGESA

Welilongesa onondaka Sesusi apopile, etyi ati aveho vahanda okukala ovanthu va Huku vena okumbatisalwa. Wamona okuti opo omunthu ambatisalwe, (1) una okuyumba onthumbi mu Siovaa, (2) una okulinga atyiho Siovaa apopia Mondaka yae Ombimbiliya, (3) una okulipakula kwe.

Okupitulula

• Ombatisimu oityi? Oityi omunthu ambatisalelwa?

• Oityi omunthu apopila vakuavo tyina ambatisalwa?

• Oityi omunthu ena okulinga tyina ehenelipakule ku Siovaa, na tyina ehenembatisalwe?

KUHANDE OKUOVOLA VALI?

Tanga onthele ei utale oityi tyitiwa ombatisimu. Tupu motale ovipuka vimwe ovanthu vapopia viayemba kombatisimu, mahi vilipona netyi tyipopia Ombimbiliya.

“Oityi Tyitiwa Ombatisimu?” (Mo jw.org)

Tala ovipuka vimwe omunthu ena okulinga opo ambatisalwe.

“Okuhumba Siovaa Nokumupandula, Tyitulunda Okumbatisalwa” (Omutala Womulavi wa Março yo 2020)

Onthele ei ipopia omukuendye umwe, wasoka umwe nawa tete, pahe elipakula ku Siovaa ambatisalwa.

“Ankho Vahanda Ndyilitaleleko Etyi Ombimbiliya Tyilityili Ilongesa” (Omutala Womulavi 1 ya Fevereiro yo 2013)

Oityi tyihandela okusoka okumbatisalwa? Oityi una okulinga umbatisalwe?

“Okuti Mandyimbatisalwa?” (Omapulo Ovakuendye Novahikuena Velilinga – Nomakumbululo Ekahi Nawa, Omukanda 2, okapitulu 37)