Okuti Ankho Utyiyale?
Okuti etyi Jesus apopia onthengele-popia “yoviwena” ankho uhanda okuleva?
Omona una otyimbuneka, woko Grecia ine o woko Roma (potyita tyotete P.K.E alo potyita tya vali P.K.
Nthiki imwe Jesus ankho uli kondye yotyilongo tyo Isilayeli pondimbu yo Roma no Siria. Omukai umwe omu Gregu afuene pu Jesus emuiti emukuateseko. Jesus emukumbulula nonthengele-popia aeleka vana veheva Judeu “noviwena.” Movitumino viapelwe Moisesi, ovimbwa ankho vitalwa okuti viasila. (Levíticos 11:27) Mahi, okuti Jesus ankho uhanda okuleva omukai una omu Gregu na vana vehe va Judeu?
Au. Ngetyi Jesus ahangununina ovalongwa vae, otyipuka ankho ena okulinga tete, okukuatesako ova Judeu. Ngotyo apopila omukai omu Gregu onthengele-popia yati: “Katyaviukile okupola ombolo yovana oiyumbu koviwena.” (Mateus 15:21-26; Marcos 7:26) Ova Gregu nova Roma, vehole unene ovimbwa, alo umwe vikala mokati komaumbo, vinyana novana. Etyi omukai una eiva onondaka mbati “oviwena” kasokele okuti waleua nonthengele-popia oyo. Ngotyo omukai una wanoñgonoka etyi Jesus ankho ahanda okupopia, emukumbulula okuti: “Enga, Tatekulu, mahi tyotyili oviwena vilia ovinyanya vitoka komesa ya vahekulu.” Jesus emuhilivika mokonda yekolelo liae, ahakula omona wae womukainthu.—Mateus 15:27, 28.
Okuti apostolu Paulu wapengesa etyi ati nkhele ankho kavapondola okuyauka elunga?
Ombapolo yokutyinda ovityuma, yehena natyike (yotyita tyotete P.K.)
Ombapolo ankho itula Paulu noko Italia ankho ikahi nokutyilikwa nomphepo. Puetyi ankho vekahi nokupululukuapo apostolu Paulu apopila ovatahi opo vahalinge oungendi. (Atos 27:9-12) Omokonda yatyi evepakailila-mo ngotyo?
Ovatahi vokohale navo ankho vetyii umwe nawa okuti, okuyauka elunga Mediterraneo poutalala ankho tyipondola okuvepaka motyiponga. Pokati kohanyi ya Kuhuhu na Tyitalale, ankho elunga litalwa ngatyina liaikwa. Oungendi Paulu ankho ekahi nokupopia maulingwa mohanyi ya Tungonkhe ine Kulindi. Omuhoneki umwe wo Roma utiwa Vegetius, (wotyita tya kuana P. K.) wahoneka omukanda wati, Epitome of Military Science, wahangununa okuti: “Onohanyi mbumwe mbukahi nawa, ononkhuavo mbunguanguanesa, ononkhuavo kambuyumbwa onthumbi.” Vegetius wapopia okuti tyitavela okulinga oungendi ukahi nawa monthiki 27 ya Kapepo aloo 14 Tungonkhe, mahi papondola okumoneka oviponga inkha valinga oungendi okuhimbikila monthiki 15 ya Tungonkhe aloo 11 ya Kuhuhu, no monthiki 11 ya Tyitalale aloo 26 ya Kapepo. Paulu ankho wii nawa ovipuka ovio. Omutahi, nomuhongoli wombapolo ovipuka ovio navo ankho vevii nawa, mahi avahalingi etyi Paulu evetolela. Avaende konkhango, ombapolo ainyanyauka.—Atos 27:13-44.