Walinga Onombolo Mbukale Ononyingi, Alondola Konthele Yonkhiso

Ovanthu ovanyingi, veile ku Sesusi motyilongo tyo Dekapoli, koutundilo Welunga lyo Ngalileya. Ankho veya kwe opo vemutehelele nokuhakulwa, avaeta onosesu ononene mbovikulia.

Konyima, Sesusi apopila ovalongwa vae okuti: “Ame nalinga okankhenda novanthu ava, mokonda nakala navo ononthiki ononthatu, mahi vetupu natyike tyokulia. Inkha ndyiveyeka vaye nondyala komaumbo avo mavakatokela ombangela mondyila, otyo vamwe vatunda kokule.” Ovalongwa avapulu okuti: “Mohika muno, opi matukapola onombolo mbutuuka ovanthu ava?” — Maluku 8:2-4.

Sesusi apulu okuti: “Muna onombolo onoñgapi?” Ovalongwa avati: “Tuna onombolo epandu-vali noumbisi uhehi.” (Mateusi 15:34) Konyima, Sesusi atumu ovanthu vapumphame pohi. Apolo onombolo nombisi, elikuambela ku Huku, embuavela ovalongwa opo vembuavele ovanthu. Kehuviso, aveho avali avekuta. Avayulisa onosesu epandu-vali ononene novimbembu viahupa-po, ngwe ovalume valile ankho vena 4.000 tyihavalulile ovakai novana!

Konyima, Sesusi alekela ovanthu, ngwe novalongwa vae avalondo mowato, avaende ko Magadaa, koutakelo Welunga lyo Ngalileya. Etyi vehika, avavasi ova Faliseu nova Sanduseu ankho vahanda okulola Sesusi alinge etyi tyapenga, avemuiti alinge enyingilikilo liatunda keulu.

Sesusi anoñgonoka etyi ankho vahanda, evekumbulula okuti: “Kongulohi, mupopia okuti, ‘Kamailoko mokonda kutupu omakaka,’ iya komuhuka muti, ‘Hono makutende tupu mailoko, mokonda kuna omakaka.’ Mutyivila okuhangununa etyi eulu likahi, mahi kamutyivili okunoñgonoka omanyingilikilo omuvo wanakua.” (Mateusi 16:2, 3) Konyima, Sesusi apopila ova Faliseu nova Sanduseu okuti kamavapewa enyingilikilo nalike, ankho mavapewa vala enyingilikilo lya Sona.

Sesusi novalongwa vae avalondo mowato okuenda ko Betesata, kokulio kuelunga. Mondyila, ovalongwa avanoñgonoka okuti valimbwa-ko okutyinda onombolo mbutuuka. Ankho vatyinda vala ombolo ike. Sesusi ahinangela etyi apopile nova Faliseu nova Sanduseu ankho vakuatesako Helode, alondola ovalongwa vae okuti: “Kalei tyipahi, amulunguka konkhiso yova Faliseu nonkhiso ya Helode.” Ovalongwa avasoko okuti Sesusi wapopia onkhiso, mokonda yetyi valimbwa-ko okutyinda onombolo. Sesusi amono okuti kavanoñgonokele etyi apopia, ati: “Oityi muyayela mokonda yokuhena onombolo?” — Maluku 8:15-17.

Sesusi ankho waavela onombolo ovanthu ovanyingi-nyingi. Ngotyo, ovalongwa ankho vena okunoñgonoka okuti kekahi nokupopia onombolo valimbwa. Sesusi evepulu okuti: “Kamuhinangela etyi navembaula onombolo ononthano pala ovalume 5.000, onosesu onoñgapi mbovimbembu muaongiyile?” Avakumbulula okuti: “Ekwi no nombali.” Sesusi ati: “Etyi navembaula onombolo epandu-vali pala ovalume 4.000, muaongiyile onosesu onoñgapi mbovimbembu?” Avakumbulula okuti: “Epandu-vali.” — Maluku 8:18-20.

Sesusi evepulu okuti: “Oñgeni muahanoñgonokele okuti hikahi nokupopia onombolo?” Ayawisako okuti: “Lungukei konkhiso yova Faliseu nova Sanduseu.” — Mateusi 16:11.

Pahe, ovalongwa avanoñgonoka etyi apopia. Onkhiso yundapeswa opo ikulise enthapi, alitutumuka. Sesusi waundapesa ondaka onkhiso ngotyilekeso tyonkhali. Ankho ukahi nokulondola ovalongwa velityilike ‘ondongeso yova Faliseu no yova Sanduseu.’ — Mateusi 16:12.