Kala Nolusoke Ngo Lwa Kristu

“Kalei nolusoke ngo lwa Kristu Jesus pokati kenyi.”—ROMANOS 15:5.

 1. Omokonda yatyi tuesukisila okuovola okukala nolusoke ngo lwa Kristu?

JESUS KRISTU wati: “Endyuei kuame.” ‘Lilongesilei kuame, mokonda omutima wange wapoleya nokueliola, iya mamuvasi epameko pala omienyo vienyi.’ (Mateus 11:28, 29) Onkhalelo oyo yokukonga ovanthu, ilekesa nawa omutima wohole wa Jesus. Kutupu omunthu wopahitu upondola okuava vali ongeleka ongwa tulandule. Namphila oe ankho Omona wa Huku wo kuna epondolo, mahi Jesus ankho una okankhenda nohole, haunene na vana vamona emone.

 2. Ovituwa patyi via Jesus matulilongesa?

² Monthele ino no nombali mambulandulako, matulilongesa oñgeni tupondola okukala nolusoke ngo lwa Jesus, atutualako okulekesa “omutima wa Kristu” momuenyo wetu. (1 Coríntios 2:16) Tete matutale ovituwa vitano: Epoleyo nomutima weliola wa Jesus, nokankhenda kae, nokutavela kuae ku Huku, nomutima wae wakola, nohole yae yotyotyilil.

Lilongesila Komutima Wapoleya wa Kristu

 3. (a) Oñgeni Jesus alongesa ovalongwa vae okukala nomutima weliola? (b) Jesus walingile ñgeni etyi ovalongwa vae vehetyivilile okukala tyipahi?

³ Jesus Omona uhena nkhali wa Huku, wetavelele okuya pano pohi, okuumbila pokati kovanthu ovakuankhali. Namphila vamue konyima ankho mavemuipaa. No ngotyo, Jesus watuaileko apeho nehambu, nokulikondola omutima. (1 Pedro 2:21-23) ‘Okutala nawa’ ku Jesus matyitukuatesako okumuhetekela, okutualako nehambu, nokulikondola omutima, mokonda yoviponyo via vakuetu. (Hebreus 12:2) Jesus wakonga ovalongwa vae opo ‘velipake mokanga yae,’ nokulilongesila kwe. (Mateus 11:29, okatoi.) Oityi vapondola okulilongesilako? Jesus wali nomutima wapoleya, nokuapwa-elundo novalongwa vae, namphila ankho valinga oviponyo. Motyinthiki tyahulilila tyononkhia mbae, Jesus wakohele onomphai mbavo. Ngotyo wevelongesa opo vahalimbueko okukala “nomutima weliola.” (Tanga João 13:14-17.) Konyima, etyi Petulu na Tiagu, na João vahatuaiko “okukala tyipahi,” Jesus nokankhenda waimbuka enamo liavo. Oe wapula okuti: “Simau, ulele?” “Valume, kalei tyipahi nokulikuambela, opo muhayondyue. Ospilitu ihanda, mahi ohitu yanama.”—Marcos 14:32-38.

4, 5. Oityi ongeleka ya Jesus itulongesa konthele yoviponyo via vakuetu?

⁴ Oñgeni matulingi inkha omukuatate ine omphange ahanda okulilola nonthue, ine kasete kunumana, ine useta okutavela onondonga mbovakulu vewaneno no “mbomupika wekolelo nokualunguka”? (Mateus 24:45-47) Tyina ovanthu vomouye vetulinga ovipuka ovivi, pamue tuveevela. Mahi tyina ovakuatate vetulingila oviponyo, pamue tyipuiya okuveevela. Inkha katusete okunumana mokonda yoviponyo via vakuetu, tuesukisa okulipula onthue muene okuti, ‘Oñgeni mandyilekesa nawa okuti ndyina “omutima ngo wa Kristu”?’ Ovola okuhinangela okuti Jesus kanumanene novalongwa vae, na tyina ankho valinga oviponyo.

⁵ Soka kuetyi apostolu Petulu alingile. Etyi Jesus aihana Petulu atunde mowato opo ahonyene Nae okueenda kombanda yomeva, Petulu aendela ko umue. Mahi, konyima Petulu watala kepuku-puku liomphepo, iya ahimbika okunyigila moveva. Okuti Jesus wanumanene nae emupopi okuti: “Walinga wanyingilamo! Opo wehetyilinge-linge vali”? Au! Anthi, “Jesus watandaveka liwa-liwa okuoko emukuate iya emupopila okuti: Ove wekolelo lihehi, oityi wanguanguanena?’” (Mateus 14:28-31) Inkha tuimbuka okuti ekolelo liomukuatate umwe ngoti liatepuluka, okuti nonthue tupondola okumuvatela, opo apameke ekolelo liae? Etyi, otyo tulilongesila kuetyi Jesus avatela Petulu nomutima wapoleya.

 6. Oityi Jesus alongesa ono apostolu mbae konthele yokuovola enkhimano?

⁶ Petulu kumwe no no apostolu vatuaileko okutañguna konthele yolie omunene pokati kavo. Tiagu na João vahandele okupumphama umwe kokulio kua Jesus mukuavo kokumbili kuae Mouhamba wae. Etyi Petulu no no apostolu ononkhuavo vetyiiva, avanumana unene navo. Jesus aimbuka okuti aveho vapola otyituwa otyo, pokati kovanthu pana vekulila. Weveihanena ponthele yae, ati: “Mutyii okuti ovatumini vomouye vevetumina, iya ovalume ovanene veveundapesa kononkhono. Mahi, onwe hatyoko mulinga pokati kenyi. Una uhanda okukala omunene pokati kenyi, una okukala omuundapi wenyi.” Jesus apopi konthele yongeleka yae muene ati: “Ngotyo, Omona womunthu keile opo aumbilwe, anthi weya okuumbila, nokuava omuenyo wae ngofeto pala okuyovola ovanthu ovanyingi.”—Mateus 20:20-28.

 7. Oñgeni kese umwe puonthue mavatela opo mewaneno mukale ewaneko?

⁷ Okusokolola nawa komutima weliola wa Jesus, matyituvatela ‘okulipaka onthue muene koututu’ pokati kovakuatate vetu. (Lucas 9:46-48) Okulinga ngotyo, tyieta ewaneko. Jeova, he yombunga onene, uhanda ovana vae “vakale kumwe newaneko,” nombembwa. (Salmo 133:1) Jesus welikuambelele ku Tate yae, opo Ovakristau votyotyili aveho vakale tyeliwaneka, opo “ouye unoñgonoke okuti ove wanthuma, nokuti una oluembia navo ngetyi una oluembia naame.” (João 17:23) Ngotyo, ewaneko lietu likuatesako ovanthu okuimbuka okuti tuvalanduli va Kristu. Opo tukale newaneko olio, tuna okutala oviponyo via vakuetu, ngetyi Jesus alingile. Jesus wali omueveli. Ngotyo, walongesa okuti onthue matuevelwa vala, inkha tuevela vakuetu.—Tanga Mateus 6:14, 15.

 8. Oityi tulilongesila kongeleka ya vana vekahi nokuumbila Huku omanima omanyingi?

⁸ Tupu, tupondola okulilongesila unene mokuhetekela ekolelo liavana, vatualako okuhetekela Kristu omanima omanyingi. Ngetyi tyalingile Jesus, ovakuatate ovo, vaevela oviponyo via vakuavo. Vetyii okuti okukala nokankhenda nga Kristu, katyituvatela vala “okukoleleya oviponyo via vana vahapamene,” tupu tyieta ewaneko. Haunene, tyiavela ondundo aveho mewaneno okukala nolusoke ngo lwa Kristu. Vahanda ovakuatate vavo vakale novituwa vina apostolu Paulu ahandelele Ovakristau mo Roma. Oe wati: “Huku una waava ekoleleyo nepameko, emuvatele opo mukale nomutima ngo wa Kristu Jesus pokati kenyi. Opo amuho kumue, nomulungu wike vala, munkhimaneke Huku, Tate ya Tatekulu yetu Jesus Kristu.” (Romanos 15:1, 5, 6) Tyotyili, ewaneko lietu mefendelo, lietela Jeova omunkhima.

 9. Omokonda yatyi tuesukisila ononkhono mba Huku opo tuhetekele nawa Jesus?

⁹ Jesus waeleka “omutima weliola” nepoleyo, onthele yotyinyango tyononkhono mba Huku. Anthi, katusukisa vala okulilongesa ongeleka ya Jesus. Tupu tuesukisa ospiritu sandu ya Jeova, opo tutyivile okumuhetekela nawa. Tuesukisa okulikuambela okuita ospilitu sandu ya Huku, nokulinga ononkhono mbokukala notyinyango tyayo​—“ohole, nehambu, nombembwa, noumphua-lundo, nokankhenda, nouwa-tima, nekolelo, nepoleyo, nokulikondola omutima.” (Gálatas 5:22, 23) Ngotyo, okukala nomutima weliola nokuapoleya nga Jesus, matuhambukiswa Tate yetu keulu, Jeova.

Jesus Watekulile Vakuavo Nokankhenda

10. Oñgeni Jesus alekesile okuti una okankhenda?

¹⁰ Okankhenda tupu onthele yotyinyango tyospilitu sandu. Jesus wali nokankhenda na vakuavo. Aveho ankho tyotyili vaovola Jesus, vetyimuene okuti ‘oe ankho uvetambula nokankhenda.’ (Tanga Lucas 9:11.) Oityi tulilongesila kokankhenda ka Jesus? Omunthu wokankhenda, epanga, ondalawa, ondyandyi, nokuasuka na vakuavo. Jesus ankho otyo ekahi ngotyo. Ankho una okankhenda novanthu, “mokonda ankho vakunyauninwa vala kononthele ambuho, ngo nongi mbuhena omunthita.”—Mateus 9:35, 36.

11, 12. (a) Popiapo ongeleka imwe oñgeni Jesus alekesile okankhenda. (b) Oityi ulilongesila kongeleka oyo yapopiwa apa?

¹¹ Jesus kakalele vala nokankhenda novanthu, mahi tupu, wevevatelele. Tala ongeleka imwe. Omukai umwe wamona emone nouvela wokutunda ohonde omanima 12. Oe ankho utyii okuti Movitumino viapelwe Moisesi, ankho vipopia okuti monkhalelo ekahi oe wasila, kese una umuyama nae usila. (Levítico 15:25-27) No ngotyo, onkhalelo ankho atekula ovanthu, yapele omukai oo onthumbi yokuti oe upondola okumuvelula. Oe wapopia okuti: “Inkha ndyikuata vala kotyikutu tyae, mandyiveluka.” Nomutima wakola, waya akakuatamo, iya liwa-liwa elitehelela okuti waveluka.

¹² Jesus wetyiimbuka okuti pena omunthu wemuyama, iya aovola olie. Omukai oo, nowoma ankho ukevela okukandukilwa, mokonda waponya Motyitumino. Moluotyo, waikila konongolo ponomphai mbae nokuteketa, apopi etyi tyili alinga. Okuti Jesus wakandukilile omukai oo omuhepi wamona ononkhumbi? Au! Anthi, okumutulisa omutima, oe wati: “Mona wange ekolelo liove liekuvelukisa. Enda nombembwa.” (Marcos 5:25-34) Tyemukalesile nawa unene ngatyi okutehelela onondaka ombo!

13. (a) Oñgeni Jesus ali nomutima welikalela no va Faliseu? (b) Oñgeni Jesus ankho atekula ovana?

¹³ Tyelikalela no va Faliseu ankho vomutima watena, Kristu kaundapesile ounene wae, pala okuyawisa omulemo wa vakuavo. (Mateus 23:4) Anthi, ankho uvelongesa nokankhenda noupwa-ludo onondyila mba Jeova. Jesus ankho epanga ewa liovalanduli vae. Ankho una apeho oluembia nokankhenda, ankho epanga liotyotyili. (Provérbios 17:17; João 15:11-15) Novana ankho velitehelela nawa ponthele ya Jesus, iya nae ankho ulitehelela nawa pokati kavo. Namphila ankho ena ovilinga ovinyingi, ovikando vimue ankho utalamapo pala okupopia novana. Ovalongwa vae nkhele ankho vasoka okuti vankhimana, ngetyi ankho tyilinga ononkhalamutwe mbonongeleya. Onthiki imue, avahimbika okutyilika ovanthu ankho vaeta ovana vavo ku Jesus. Otyo, katyahambukisilwe Jesus. Evepopila okuti: “Yekei ovana veye kuame. Muhevetyilikei, mokonda ouhamba wa Huku owa vana vekahi ngovana.” Opo ovalongwa vae vanoñgonoke etyi tyakolela, oe wapaka omona pokati kavo ati: “Tyotyili, ame ndyimupopila okuti, Una uhatambula ouhamba wa Huku ngomona, kamakanyingilamo.”—Marcos 10:13-15.

14. Ouwa patyi ovana vapolako tyina valingwa nawa mewaneno?

¹⁴ Nkhele soka vala katutu, oñgeni ovana vamwe velitehelela etyi pahe vakala ovalume novakai, tyina vasoka okuti Jesus ‘wevekuatele pomaoko evepe ononkhano onongwa.’ (Marcos 10:16) Tupu, ovana vo hono tyina vekula, mavakahinangela nohole ovakulu vewaneno no vakuavo, vasukile navo etyi ovana. Tyakolela vali kovana vaenguaengwa nawa mewaneno tunde poututu, vanoñgonoka okuti ovanthu va Jeova vena ospilitu yae.

Kala Nokankhenda Mouye Uhena Kankhenda

15. Omokonda yatyi tyina hono okankhenda kekahi nokutepuluka katyituhuvisa?

¹⁵ Ovanthu ovanyingi hono, vasoka okuti vetupu omuvo wokulekesa vakuavo okankhenda. Mahi, kese nthiki, kosikola, kovilinga, pokulinga oungendi, no movilinga viokuivisa, ovanthu va Jeova velivasa novanthu vena ontheto youye. Ovituwa viavo ovivi pamue vitunumanesa, mahi otyo katyituhuvisa. Jeova watuma Paulu okutulondola okuti, ‘mononthiki ombu mbahulilila’ onombi, Ovakristau votyotyili, mavekelivasa na vana “vokulihole ovo muene, . . . vehena oluembia.”—2 Timóteo 3:1-3.

16. Oñgeni matulekesa okuti tuna okankhenda mewaneno nga Kristu?

¹⁶ Anthi, mewaneno lio Vakristau votyotyili, muna onkhalelo ongwa yelikalela no yovanthu vomouye. Mokuhetekela Jesus, kese umue puonthue upondola okuvatela pala onkhalelo oyo ongwa. Oñgeni tupondola okutyilinga? Okuhimbika, ovanyingi mewaneno vesukisa ombatelo yetu nepameko, mokonda vena ovitateka viekongoko ine ovikuavo viepuiya. ‘Mononthiki ombu mbahulilila,’ pamue ovitateka ovio viliyawisa vala, mahi havipeko. No Vakristau vo kohale, vali novitateka ngovio. Ngotyo, ombatelo vamwe vesukisa hono, oyo Ovakristau kohale navo vesukisile. Paulu, walondolele Ovakristau okuti, “popiei onondaka mbuungumanesa na vana vasoya, pamekei vokuaneñgena, pwei elundo novanthu aveho.” (1 Tessalonicenses 5:14) Otyo, tyesukisa okukala nokankhenda nga Kristu.

17, 18. Omononkhalelo patyi tupondola okuhetekela okankhenda ka Jesus?

¹⁷ Ovakristau vena otyilinga ‘tyokutambula ovakuatate vavo nokankhenda,’ okuvetekula ngetyi Jesus ñgeno evetekula. Tuna okulekesa esuko liotyotyili na vana tuiyale kohale, na vana ankho tuhei. (3 João 5-8) Jesus ankho oe uhimbika okulekesa okankhenda na vakuavo. Nonthue tuesukisa apeho okupameka vakuetu.—Isaías 32:2; Mateus 11:28-30.

¹⁸ Kese umwe puonthue upondola okulekesa okankhenda, mokulinga ovipuka vilekesa okuti tuesuka nouwa wa vakuetu. Ovola onondyila mbokulinga ovipuka ovio. Okuyawisako Paulu walondola okuti: “Nohole youkuatate, kalei noluembia kese umue na mukuavo. Kalei ovatete kokulekesa ehumbilo kese umue na mukuavo.” (Romanos 12:10) Otyo, tyihanda okuhetekela Kristu, okutekula vakuetu nohole nokankhenda, okulilonga okukala “nohole yotyotyili tyihelikembesa.” (2 Coríntios 6:6) Paulu wapopia ohole yelifwa no ya Kristu okuti: “Oluembia lukoleleya nokuna omutima omuwa. Oluembia lutupu ounkhuelume, kalulisape, kalulipake kounene.” (1 Coríntios 13:4) Tuhakalei nonkhongo novakuatate no nomphange mbetu. Anthi, tutavelei elondolo liati: “Kalei nomitima omiwa kese umue na vakuavo, nokulilingila okankhenda, okulievela pokati, ngetyi Huku emuevela menyina lia Kristu.”—Efésios 4:32.

19. Okukala nokankhenda ngo ka Kristu tyieta ouwa patyi?

¹⁹ Okulinga ononkhono mbokukala nokankhenda ngo ka Kristu apeho, movipuka aviho, tyituetela unene ouwa. Ononkhono mba Jeova mambuundapa nawa mewaneno, okuvatela kese umwe okukala notyinyango otyiwa tyospilitu. Tupu, tyina tuendela mongeleka Jesus asapo, nokuvatela vakuetu navo valinge ngotyo, ombembwa yetu, newaneko mefendelo mavihambukiswa Huku. Moluotyo, tulingei ononkhono apeho mbokukala nepoleyo nokankhenda nga Jesus, mokukala kuetu na vakuetu.

[Olutalatu pefo 11]

Tyina ekolelo liomukuatate liatepuluka, ngetyi tyamonekele na Petulu, okuti matutandaveka okuvoko kuetu opo tumuvatele?

[Olutalatu pefo 13]

Oñgeni ove moave ombatelo opo aveho mewaneno vakale nokankhenda?

Okuti Ove Upondola Okuhangununa?

• Oñgeni Jesus alekesa okuti ankho una “omutima wapoleya nokueliola”?

• Oñgeni Jesus alekesa okankhenda?

• Omononkhalelo patyi mbumwe matulekesa epoleyo nokankhenda nga Kristu mouye uno wononkhali?