Sesusi Upatula Omaiho Ovamphoki Vevali, Akuatesako Sakeu

Sesusi na vana ankho ekahi nokuenda navo, avehiki ko Selikoo, paendwa onthiki okutunda ko Selusalei. O Selikoo ankho epunda-umbo lina ononthele onombali. Limwe ekulu ankho likala okilometulu 1,6 kokule nekuavo epe liatungwa pomuvo woutumini wo Loma. Putyina Sesusi kumwe novaunyingi ankho vekahi mondyila okutunda mepunda-umbo limwe venda mekuavo, ovalume vevali ovamphoki vaita osimola aveivi ovanthu vaviela. Umwe puvo ankho utiwa Balitimeu.

Etyi veiva okuti Sesusi ukahi nokulamba, Balitimeu na mukuavo avahimbika okumulaveleya okuti: “Tatekulu, kala-vo nokankhenda no onthue, Mona wa Daviti!” (Mateusi 20:30) Ovanthu vamwe povaunyingi avevepopila opo vahaviele, mahi avalaveleyila vali peulu. Etyi Sesusi eiva ovanthu vaviela atalama. Apopila vana ankho ekahi navo vakaihane ovanthu vemulaveleya. Avaende kovalume vokuita osimola, avapopila umwe puvo okuti: “Likuatehila! Katuka; ukahi nokukuihana.” (Maluku 10:49) Nokuahambukwa, ovamphoki avalulu ovikutu viavo, avakatuka, avaende ku Sesusi.

Sesusi evepulu okuti: “Oityi muhanda ndyimulingile?” Aveho vevali avati: “Tatekulu, patula-vo omaiho etu.” (Mateusi 20:32, 33) Sesusi akala nokankhenda, ayame komaiho avo iya apopila wike puvo ati: “Enda. Ekolelo liove liekukalesa nawa.” (Maluku 10:52) Ovamphoki vevali avahimbika okumonapo iya avankhimaneka unene Huku. Etyi ovanthu vamona otyipuka otyo, navo avankhimaneka Huku. Ovalume vana ankho ovamphoki avahimbika okulandula Sesusi.

Ankho pena ovanthu ovanyingi veliseta na Sesusi putyina akuata ko Selikoo. Ovanthu aveho ankho vahanda okutala omunthu wapatulile omaiho ovamphoki. Ovanthu ankho vatualako okuya ku Sesusi okutunda kononthele ambuho; mahi vamwe avehetyivili okumumona. Umwe puvo ankho o Sakeu. Ankho onkhalamutwe yovatanthi velilimu ko Selikoo. Mokonda omusupi, ankho ketyivilile okutala etyi tyikahi nokuenda-po. Sakeu ahateka komutwe, alondo komuti womukuyu mondyila Sesusi ankho makuate. Ngotyo, pahe etyivili okutala nawa ovipuka aviho. Etyi Sesusi ehika popepi, amono Sakeu komuti, emuti: “Sakeu tuluka liwa, mokonda hono ndyenda keumbo liove.” (Luka 19:5) Sakeu atuluka, ahateka aende keumbo liae opo atambule omuenda wae wakolela.

Etyi ovanthu vamona otyipuka otyo, avahimbika okuñgoñga. Ankho vasoka okuti katyaviukile Sesusi aye meumbo liomunthu vatala okuti ulinga ononkhali. Sakeu ankho omuhona mokonda ankho uvaka onombongo tyina afetesa elilimu.

Putyina Sesusi anyingila meumbo lya Sakeu, ovanthu avanumana, avati: “Wanyingila meumbo liomunthu ulinga ononkhali.” Mahi Seusi ankho weete okuti Sakeu una omutima omuwa, melivele. Moluotyo Sesusi ankho kanumanene. Sakeu akatuka emupopila okuti: ‘Tala! Tatekulu, mandyitepula pokati omalumono ange andyiavela ovahepi, iya una napunda tyae ame mandyimukondolela etyi tyituuka pu vikuana.’ — Luka 19:7, 8. 

Nonkhalelo oyo ongwa Sakeu walekesa okuti welivela umwe tyotyili! Tyafuile watala nawa pomikanda vielilimu onombongo atambaula kova Sundeu ovanyingi iya alae okuvekondolela evi vituuka pu vikuana. Otyo ankho tyilamba pu etyi ovitumino vya Huku viita. (Êxodo 22:1; Levítico 6:2-5) Tupu, Sakeu walaa okutepula pokati omalumono ae, opo onthele imwe eyavele ovahepi.

Sesusi ahambukwa netyi Sakeu alekesa okuti welivela iya emupopila okuti: “Onthiki yo hono eyovo lieya meumbo muno, mokonda no ove umona wa Ambalaiau. Mokonda Omona womulume weya okuovola vana vavomba opo eveyovole.” — Luka 19:9, 10.

Ankho palamba vala omuvo uhehi, etyi Sesusi apopile onthengele-popia yomona wavombele ilekesa onkhalelo vana ‘vavomba’ vakala. (Luka 15:11-24) Pahe ankho ukahi nokulekesa ongeleka yotyotyili, yomunthu ukahi ngatyina ankho avomba, pahe wavasiwa. Ononkhalamutwe mbonongeleya novalanduli vavo nokuanumana avapopi omapita Sesusi mokonda wesuka novanthu vekahi nga Sakeu. Sesusi nkhele utualako nokuovola ovana va Ambalaiau vavomba nokuveyovola.