Opasikwa Yahulilila Ya Sesusi Ikahi Popepi

Sesusi ankho wamana okulongesa ono apositolu vekuana Komphunda Yomindyambi, akumbulula epulo valingile konthele yokuya kwae nonthyulilo youye.

Vakalele novilinga ovinyingi monthiki 11 ya Nisan! Mokutala, etyi ankho vekahi nokukondoka ko Betania oku mavakalala, Sesusi apopila ono apositolu mbae okuti: “Mutyii okuti tyina pamalambe ononthiki onombali o Pasikwa, iya Omona womulume mapakulwa aipaelwa momuti.” — Mateusi 26:2.

Mokutala, onthiki yalandulako, Mutatu, Sesusi nono apositolu mbae kavakalele novilinga ovinyingi. Muvali, ankho otyo avela onombei ononkhalamutwe mbonongeleya, ahololola oundingavivi wavo. Pahe ankho vaovola okumuipaa. Moluotyo, Sesusi eheya povanthu monthiki 12 ya Nisan opo pahamoneke natyike tyimutyilika okulinga Opasikwa nono apositolu mbae, tyina ekumbi liamanyingila motyinthiki matyilandulako, putyina onthiki 14 ya Nisan ihimbika.

Mahi ovanene-nakwa novakulu, ankho vasukalala unene tyina Opasikwa ihenehikepo. Aveliongiya mondyuo yomunene-nakwa, Kaifaa. Omokonda yatyi? Ankho vanumana mokonda Sesusi wahololola kovanthu oundingavivi wavo. Avelipakaila-mo “opo vakuatele Sesusi momatutu iya avemuipaa.” Oñgeni mavetyilingi iya onalupi mavetyilingi? Vapopia okuti: “Tuhetyilingei mokueenda kuotyipito, opo ovanthu vehetuyayese.” (Mateusi 26:4, 5) Ankho vena owoma mokonda ovanthu ovanyingi vapanda unene Sesusi.

Pomuvo opo, ononkhalamutwe mbonongeleya avatambula omueenda. Avahambukwa mokonda o umwe pono apositolu mba Sesusi, Sunda Isikaliote. Satanasi ankho wemupaka olusoke luokuyondya Omulongesi wae! Sunda evepulu okuti: “Oityi mamumphe ndyimuyondye opo mumukuate?” (Mateusi 26:15) Mokonda vetyipanda, “avelipakela-mo okumuavela onombongo mbopalata.” (Luka 22:5) Vemuavela otyiñgapi? Velipakela-mo okumuavela onombongo 30 mbopalata. Otyo tyihuvisa mokonda onombongo ombo, mbulifwe pu ombu ankho mbulanda vala omupika. (Êxodo 21:32) Ngotyo, ononkhalamutwe mbonongeleya valekesa okuti vatala Sesusi ngatyina ehena esilivilo. Pahe Sunda “ahimbika okuovola omphitilo yokumupakula kuvo otyo pehena ovanthu.” — Luka 22:6.

Onthiki 13 ya Nisan yahimbika Mutatu, tyina ekumbi linyingila, iya ankho, onthiki ya pandu, otyinthiki tyahulilila-ko Sesusi akala mo Betania. Onthiki yalandulako, ankho mavesukisa okupongiya ovipuka vimwe opo valinge Opasikwa. Ankho vena okuovola ongi, maiipawa aiyokwa aiho tyina onthiki 14 ya Nisan yamahimbika. Opi ankho maveilila iya olie ankho mapongiya ovipuka ovio? Sesusi ketyipopile. Ngotyo, Sunda ankho kametyivili okupopila natyike ovanene-nakwa.

Tyipondola Mukuana kekumbi, etyi ankho vekahi ko Betania, Sesusi atumu Petulu na Suau, ati: “Endei, kapongiyei Opasikwa opo tulie.” Avemupulu okuti: “Opi uhanda tukeipongiyile?” Sesusi ati: “Tyina muamanyingila mepunda-umbo, mamuvasi omulume umwe watyinda omulindi womaande. Mulandulei, alo meumbo amanyingila. Popilei hekulu yeumbo okuti: ‘Omulongesi wati: “Ondyuo yovaenda ili-pi ndyilile-mo Opasikwa novalongwa vange?”’ Iya omulume oo memulekesa ondyuo imwe onene mosapalalo yapongiyua nawa pala ovaenda, ngamo muipongiyila.” — Luka 22:8-12.

Tyimoneka nawa okuti, hekulu yeumbo olio ankho omulongwa wa Sesusi. Mokutala ankho ukevelela-le Sesusi emuite opo alile otyipito otyo meumbo liae. Etyi ono apositolu vevali vehika ko Selusalei, avavasi ovipuka aviho ngetyi Sesusi evepopilile. Ngotyo, avapongiya ongi, novipuka ovikuavo, Sesusi nono apositolu mbae 12, ankho mavesukisa opo valie Opasikwa.