Walinga Omahuviso Nepondolo Lialie?

Konyima yetyi Sesusi apopia konthele yokuevela, meumbo lyo mu Faliseu utiwa Simau, ahimbika oungendi omukuavo wokuivisa ko Ngalileya. Olio ankho enima lya vali movilinga viae iya ankho kekahi nokuenda aike. Ankho vena ono apositolu 12, novakai vamwe “apolele ovilulu evehakula omauvela.” (Luka 8:2) Povakai ovo ankho pena Maliya Mandalena na Susana na Suana, omukai wefualali ankho liundapa moseketa Yohamba Helode Antipa.

Tyina ovanthu ovanyingi ankho vanoñgonoka Sesusi veliyawisa, ovakuavo ankho vevilapo okungwangwana konthele yovilinga viae. Otyo tyamoneka nawa etyi Sesusi apola omulume umwe otyilulu, omulume ankho omumphoki, tupu uhapopi iya etyi vemueta ku Sesusi ahakulwa. Pahe omulume ankho wayovolwa kotyilulu, ahimbika okutala nokupopia. Ovanthu avahuvu unene, avelipulu okuti: “Ou haeko Omona wa Daviti?” — Mateusi 12:23.

Ovanthu aveliongiya meumbo omu ankho Sesusi akala, amuyula unene ovanthu iya ovalongwa va Sesusi avahamono omphitilo yokulia. Mahi ha aveho ankho vetavela okuti Sesusi, “Omona wa Daviti.” Ovahoneki vamwe vovitumino nova Faliseu aveho veya okutunda ko Selusalei, mahi ankho kaveile okunoñgonoka Sesusi ine hamwe okumukuatesako. Ankho vekahi nokupopila ovanthu okuti: Sesusi “una Belesebu” iya ukahi nokuundapa “nomutumini wovilulu.” (Maluku 3:22) Etyi vombunga ya Sesusi veiva onondaka ombo, avaende okukakuata Sesusi. Omokonda yatyi?

Alo pomuvo opo, ankho onondenge mba Sesusi kavetavela okuti ngwe Omona wa Huku. (Suau 7:5) Sesusi ankho ulinga ngatyina ekahi nokukatula onondyaya movanthu, onondenge mbae okumutala ngoti welikalela na Sesusi una vekulila kumwe nae ko Nasalee. Avasoko okuti tyafuile walinga komutwe, avapopi okuti: “Wakala otyova.” — Maluku 3:21.

Mahi oityi ovipuka alinga vialekesa? Sesusi ankho wahakula omulume wali notyilulu, pahe omulume oo weetepo iya upopia. Nawike ankho waanya otyipuka otyo. Ngotyo, ovahoneki vovitumino no va Faliseu avaovola okutendeleya Sesusi opo ovanthu vehemutavele. Avati: “Omulume ou utaata ovilulu menyina lya Belesebu, omutumini wovilulu.” — Mateusi 12:24.

Sesusi ankho weete etyi ovahoneki vovitumino no va Faliseu, vekahi nokusoka, moluotyo ati: “Outumini ulityitukila-po uhanyuka-po, nepunda-umbo ine eumbo lielityitukila-po, kalitungu. Ngotyo, inkha Satanasi utaata Satanasi, tyilekesa okuti welityitukila-po, oñgeni ouhamba wae mautualako tyitai?” — Mateusi 12:25, 26.

Olusoko olo luaviuka! Ova Faliseu ankho vetyii okuti ova Sundeu vamwe navo vataata ovilulu. (Ovilinga 19:13) Moluotyo, Sesusi apulu okuti: “Inkha ame ndyitaata ovilulu menyina lya Belesebu iya ovana venyi vevitaata menyina lialie?” Nepulo olio, Sesusi wapopia okuti, opo novana vavo vataata ovilulu menyina lya Belesebu. Sesusi apopi vali tyimwe opo vasoke, ati: “Mahi, inkha ame ndyitaata ovilulu kononkhono mba Huku, naina mukahi nokupumbwa Ouhamba wa Huku.” — Mateusi 12:27, 28.

Opo vetyimone okuti okutaata ovilulu movanthu tyilekesa okuti una vali epondolo enene tyipona Satanasi, Sesusi apopi okuti: “Olie mevili okutemba ondyuo yomunthu wapama, apundu-mo omalumono ae? Tete una okukuta omunthu oo, pahe etyivili okupunda ondyuo yae. Una uhekahi konthele yange, ondyale yange, iya una uhaongiya na ame, utyandyanesa.” (Mateusi 12:29, 30) Ovahoneki vovitumino nova Faliseu tyili-tyili ankho veyele Sesusi iya otyo tyilekesa okuti ankho ovaundapi va Satanasi. Ankho vekahi nokutaata ovanthu Komona wa Huku, una ankho ukahi nokuundapa nepondolo lya Siovaa.

Sesusi alondola ovaundapi ovo va Satanasi, ati: “Ovipuka aviho ovanthu valinga mavaevelwa, tyilinge ononkhali ine ovipuka ovivi vapopia. Mahi una upopia omapita ononkhono mba Huku, kamaevelwa, makala nonkhali ihaevelwa.” (Maluku 3:28, 29) Soka oityi onondaka ombo mbuhangununa ku vana vapopia ovipuka vialingwa kononkhono mba Huku okuti vialingwa na Satanasi!