Omu Samaliya Wakala Nokankhenda

Putyina Sesusi nkhele ekahi popepi no Selusalei, ova Sundeu ovanyingi aveya kwe. Vamwe ankho vahanda okulongeswa, ovakuavo ankho vahanda okumulola. Umwe puvo, ankho wii nawa Ovitumino, emupulu okuti: “Mulongesi, oityi nesukisa okulinga opo ndyipiñgane omuenyo wahapu?” — Luka 10:25.

Sesusi etyimono okuti omulume oo ankho kapulile vala opo anoñgonoke. Ankho uhanda Sesusi akumbulule monkhalelo mainumanesa ova Sundeu. Sesusi aimbuka okuti omulume oo ekumbululo muene ulii-ale. Ngotyo, nounongo emukumbulula monkhalelo mailekesa oityi omulume oo ankho asoka.

Sesusi emupulu okuti: “Oityi tyahonekwa Movitumino? Oityi ove unoñgonoka muetyi utanga?” Omulume oo ankho welilongesa Ovitumino vya Huku, moluotyo aave ekumbululo lielikuata netyi vipopia. Apopi etyi tyikahi mu Deuteronômio 6:5 no mu Levítico 19:18, ati: “‘Una okukala nohole na Siovaa Huku yove nomutima wove auho, nomuenyo wove auho, nononkhono mbove ambuho, nomalusoke ove aeho,’ nokukala nohole ‘na munthele yove ngetyi ulihole ove muene.’” (Luka 10:26, 27) Okuti ekumbululo olio ankho liaviuka?

Sesusi apopila omulume, ati: “Wakumbulula nawa; tualako okulinga ngotyo, ukamone omuenyo wahapu.” Mahi okuti etompho alipuila opo? Omulume oo ankho kahande vala okukumbululwa nawa; mahi ankho uhanda “okulilekesa ngatyina omuviuki,” opo alekese okuti etyi asoka, netyi alinga vakuavo, tyaviuka. Ngotyo, apulu okuti: “Mukuetu olie?” (Luka 10:28, 29) Epulo olio limoneka ngoti liapepuka, mahi etyi lihangununa tyaya kohi. Ñgeni ngotyo?

Ova Sundeu ankho vetavela okuti ondaka ‘mukuavo’ ilekesa vala vana vaendela moviso viova Sundeu iya Levítico 19:18 imoneka ngoti yelikuata nolusoke olo. Ova Sundeu, alo umwe ankho vapopia okuti okulinga oupanga nomunthu uhe mu Sundeu ‘tyailikwa movitumino.’ (Ovilinga 10:28) Ngotyo, omulume oo ankho usoka okuti okukala nokankhenda nova Sundeu vakuavo otyo tyaviuka iya tyafuile alo umwe novalongwa vamwe va Sesusi ankho otyo vasoka. Mahi, omunthu uhe mu Sundeu kavemulingi okankhenda mokonda vati ha “munthele” yavo-ko.

Oñgeni Sesusi ankho maviukisa olusoke olo, ahanumanesa omulume oo, nova Sundeu ovakuavo? Sesusi waviukisa olusoke olo nongeleka, wati: “Pena omulume umwe ankho utundilila ko Selusalei ulauka no ko Selikoo, atumbukila movifuanga, avimupolo ovipuka viae aviho, avimuvete unene esala enthuvia.” Sesusi atualako, ati: “Ankho pena omunakwa wakuata metapalo olio, mahi etyi emumona, akuate ponthele. Tupu etyi omu Levita umwe ehika-po emumono, akuate ponthele. Mahi omu Samaliya umwe, ankho wakuata metapalo olio emuvasi, etyi emumona akala nokankhenda nae.” — Luka 10:30-33.

Omulume ankho Sesusi ekahi nokupopila ongeleka oyo, ankho utyii okuti ovanakwa ovanyingi nova Levita, vaundapa mondyuo ya Huku, ankho vakala ko Selikoo. Tyina vakondoka, okutunda mondyuo ya Huku, ankho valauka avaende onokilometulu 23. Okukuata ondyila oyo ankho otyiponga mokonda muna ovifuanga ankho viyolamena ovanthu. Omunakwa nomu Levita, ñgeno ankho vakuatesako omulume oo una otyitateka, mokonda omu Sundeu mukuavo. Mahi mehipululo eli Sesusi apopia, kavemukuatesileko. Wemukuatesako vala omu Samaliya, omulume umwe ankho ova Sundeu vahahande. — Suau 8:48.

Oñgeni omu Samaliya akuatesako omu Sundeu ankho wavetwa? Sesusi wati: “Wafuena-po akutu povipute viae, atili-po omulela novinyu. Pahe emupake kotyimbulu tyae, emutuala mondyuo yokuhikila ovaenda iya emulingi nawa. Onthiki onkhuavo, apolo onombongo onombali mbovivela, embuavela omuyungi wo mondyuo yovaenda ati: ‘Muyunga nawa, inkha wamapesela etyi tyilamba puetyi, haa nkhukondolela-tyo tyina nameya.’” — Luka 10:34, 35.

Etyi Tatekulu Sesusi apopia ongeleka, alingi epulo liakuatesako omulume oo okusoka nawa, ati: “Povanthu ovo vetatu oupi wakala munthele yomulume wavetwa novifuanga?” Tyafuile mokonda ankho omulume oo kahandele okupopia okuti omu “Samaliya,” ati: “Oyou wokuakala nokankhenda nae.” Sesusi pahe emupopila okuti: “Enda, no ove kalinge ngotyo.” — Luka 10:36, 37.

Onkhalelo oyo yokulongesa yaviuka ngatyi! Inkha Sesusi wapopilile omulume oo okuti ovanthu vehe va Sundeu navo ovo munthele yove, okuti omulume oo nova Sundeu vakuavo ñgeno vetavela? Tyipondola ñgeno kavetavelele. Mahi mokonda wapopia ongeleka yapepuka, novipuka ovateheleli vei nawa, epulo omulume oo alinga, liokuati “Mukuetu olie?” alikumbululwa nawa. Omunthu walekesa nawa okuti o munthele ya mukuavo, oyo una wakala nohole, nokankhenda. Ovio ovituwa viapopiwa Movihonekwa tuna okukala navio.