Okutambula Ovaenda Nokulikuambela

Epunda-umbo lyo Betania livasiwa Koutundilo Womphunda Yomindyambi, paendwa onokilometulu 3 okutunda ko Selusalei. (Suau 11:18) Sesusi ngako aya, anyingila meumbo liovakai ankho velikwai, Malata na Maliya. Ovakai ovo nomphange yavo Lasalu, ankho omapanga a Sesusi avemutambula nawa.

Ankho tyihambukiswa unene okutaleluapo na Mesiya. Malata ankho uhanda okuavela Sesusi okulia kukahi nawa, ahimbika okupongiya. Putyina Malata ankho aundapa, ondenge yae Maliya upumphi ponomphai mba Sesusi, umutehelela. Konyima, Malata apopila Sesusi okuti: “Tatekulu, kuesukile tyina ondenge yange andyekela ovilinga andyike? Mupopila eye ankhuateseko.” — Luka 10:40.

Sesusi ahapopi Maliya, mahi alondola Malata mokonda yokuasukalala novikulia ovinyingi, ati: “Malata, Malata wasukalala nokuatalukwa novipuka ovinyingi. Tyesukisa ovipuka vihehi ine tyike vala. Mahi Maliya waholovona onthele ikahi nawa iya kameipolwa.” (Luka 10:41, 42) Sesusi walekesa okuti katyesukisile okupesela omuvo nokupongiya okulia okunyingi. Okulia namphila kuhehi, kutuuka.

Etyi Malata asoka ankho otyiwa. Ankho walekesa otyituwa otyiwa tyokutambula ovaenda. Mahi mokonda yokuasukalala unene nokulia, ankho ukahi nokupumbwa etyi Omona wa Huku ekahi nokulongesa! Sesusi apopi okuti Maliya wakoya etyi tyakolela vali, matyimuetela ouwa uhapu, iya waava ongeleka ongwa tuesukisa okuhinangela atuho.

Monthiki onkhuavo, Sesusi alongesa vali otyipuka otyikuavo tyakolela. Omulongwa umwe wemuita okuti: “Tatekulu, tulongese okulikuambela ngetyi Suau alongesa ovalongwa vae.” (Luka 11:1) Ankho palamba-le enima notyihupe tunde etyi Sesusi alongesa elikuambelo Melongomona lyo Komphunda. (Mateusi 6:9-13) Mahi tyafuile omulongwa oo ankho kepo, moluotyo Sesusi apitulula ononthele mbavilapo. Konyima apopi ongeleka ilekesa nawa okuti tyesukisa okutualako okulikuambela.

Wati: “Sokei ñgeno umwe pwo onwe una epanga liae aende-ko mokati kovinthiki emupopila okuti: ‘Panga liange, ndevalese-vo onombolo ononthatu, mokonda naendelwa nepanga liange watunda kokule iya ndyitupu etyi ndyimuavela.’ Mahi akumbululila vala mokati, ati: ‘Uhambielele vali. Onthue tueliyeila-le, ame novana vange tulangi-ale. Ame hipinduka-po vali andyikuavela.’ Ame ndyimupopila okuti, kamapinduka-po emuavela mokonda epanga liae, mahi mokonda watualako okumuita mapinduka-po emuavela atyiho ahanda.” — Luka 11:5-8.

Sesusi ankho kekahi nokuti Siovaa wesukisa okuitwa ehimbwe opo akumbulule omalikuambelo, ngetyi tyalinga epanga liomunthu oo. Mahi, ankho ukahi nokulekesa okuti inkha epanga ankho lihahande, liaavela mukuavo watualako okuita, tyotyili Tate yetu keulu woluembia makumbulula ovaumbili vae ovakuatyili vemuita nomutima auho! Sesusi atualako, ati: “Ame ndyimupopila okuti, tualeiko okuita, mamupewa; tualeiko okuovola, mamuvasi; tualeiko okutotola mamuikulwa. Mokonda una wiita, upewa, una wovola, uvasa, iya una utotola wiikulwa.” — Luka 11:9, 10.

Konyima, Sesusi atoneka vali etyi ankho ekahi nokulongesa mokuava ongeleka yo vohe, ati: “Olie pu onwe una omona wae tyina amemuiti ombisi umuavela onyoka, ehemuavela ombisi? Ine hamwe umuita eyiyi, emuavela onge? Ngotyo, inkha onwe vakuankhali mutyivila okuavela ovipuka oviwa ovana venyi, Tate yenyi keulu kamaavela ononkhono mbae vana vemuita?” (Luka 11:11-13) Otyo tyituavela onthumbi onene yokuti Tate yetu uhanda okututehelela nokukumbulula omalikuambelo etu!