Sesusi Walekesa Opi Kutuka Ehambu Liotyotyili

Sesusi wawana vali etyi alongesile-ale konthele yelikuambelo, mahi otyo hatyo vala awanene okulongesa mokueenda kuovilinga viae. Etyi alingile omahuviso ko Ngalileya, Sesusi atendeleyua okuti ukahi nokulinga omahuviso kepondolo liomutumini wovilulu. Pahe ovanthu vo mo Sundeya avemutendeleya vali otyipuka otyo.

Etyi Sesusi ataata otyilulu momunthu umwe, ankho tyikahi nokumuhitika ondaka ahapopi, ovanthu ovanyingi avahuvu unene. Mahi onondyale mbae avahahuvu. Onondyale mbae avemutendeleya vali okuti: “Utaata ovilulu menyina lya Belesebu, omutumini wovilulu.” (Luka 11:15) Ovakuavo nkhele ankho vesuka nokulingilwa enyingilikilo lyo keulu opo vanoñgonoke olie Sesusi.

Etyi Sesusi etyimona okuti vaovola okumulola, evekumbulula ngetyi alingile-ale onondyale mbae ko Ngalileya. Evepopila etyi tyilekesa okuti ouhamba welitepuka pokati kaukala tyitai, ati: “Inkha Satanasi welityitukila-po, oñgeni ouhamba wae mautualako tyitai?” Konyima, Sesusi evepopila nawa okuti: “Inkha ame ndyitaata ovilulu kononkhono mba Huku, naina mukahi nokupumbwa Ouhamba wa Huku.” — Luka 11:18-20.

Etyi Sesusi apopia “ononkhono mba Huku,” ankho ñgeno ovateheleli vae vahinangela etyi tyamonekele pomuvo wova Isilayeli. Ovanthu aveho ankho vekahi mepata lya Falao vokuamuene omahuviso Moisesi alingile, vapopile okuti: Etyi “ononkhono mba Huku!” Tupu Huku kononkhono mbae, ahoneka Ovitumino Ekwi komavai omamanya evali. (Êxodo 8:19; 31:18) Tyelifwa notyo, Sesusi kononkhono mba Huku ankho utaata ovilulu movanthu, nokuhakula ovavei. Moluotyo, onondyale mbae ankho vapumbwa Ouhamba wa Huku, mokonda Sesusi, Ohamba yao ankho ukahi ponthele yavo tyina alinga omahuviso oo.

Etyi Sesusi ataata ovilulu movanthu, walekesa okuti una vali epondolo ku Satanasi, ukahi ngomulume wokuapama, upondola okukuata omunthu umwe wamaneka nawa uyunga eumbo liohamba. Sesusi apopi vali onthengele-popia yotyilulu tyatunda momunthu. Tyina omunthu oo eheyulisa ovipuka oviwa pana patunda otyilulu, otyilulu otyo tyimukondokela atyietelela ovikuavo epandu-vali iya onkhalelo yomunthu oo aivili-po okukala omapita tyipona potete. (Mateusi 12:22, 25-29, 43-45) Ova Isilayeli ankho otyo vekahi ngotyo.

Omukai umwe ankho ukahi nokutehelela nawa etyi Sesusi apopia, ati: “Omukai wekukutula ekunyamisa, una ehambu!” Ovakai ova Sundeu ankho vapeleya okukala ina yomuuli umwe, haunene okukala ina ya Mesiya. Ngotyo omukai oo, tyafuile wasokele okuti Maliya una elao enene mokonda wakala ina yomulongesi. Mahi Sesusi wemuviyula, emupopila etyi tyieta ehambu liotyotyili, ati: “Au, vena ehambu ovo vana vatehelela ondaka ya Huku avaendela-mo!” (Luka 11:27, 28) Sesusi nalumwe apopilile ovanthu okuti Maliya una okuhumbwa vali ku vakai vakuavo. Mahi opo omunthu akale nehambu liotyotyili, una okukala omuumbili omukuatyili wa Huku, hakukala ombunga yomunthu wahumbwa ine okukala notyilinga tyimwe.

Ngetyi alingile-ale ko Ngalileya, Sesusi aviyula ovanthu ankho vekahi nokumuita enyingilikilo lyo keulu. Evepopila okuti kamavapewa enyingilikilo nalike, “mavapewa vala lya Sona.” Sona wakala enyingilikilo mononkhalelo onombali, lietyi akala meimo liombisi ononthiki ononthatu, no lietyi aivisa nomutima wakola, ovanthu vo Ninive avelivele. Ngotyo, Sesusi ati: “Mahi tala! Pano pena umwe wapona pu Sona.” (Luka 11:29-32) Tupu Sesusi ankho omunene vali ku Salomau, una wakalele nounongo onkhai-hamba yo ko Sambaa yeile okutehelela.

Sesusi ayawisako okuti: “Tyina omunthu amatemesa okandiyelo, kekeholeka ine okukepaka mombuelo yomesa, mahi ukepaka kombanda yomesa.” (Luka 11:33) Ngotyo, ankho uhanda okupopia okuti okulongesa ovanthu ovo nokuvelingila omahuviso, tyikahi ngatyina waholeka okandiyelo katema. Mokonda omaiho avo ankho kaatale nawa, kavanoñgonokele ovilinga viae.

Sesusi ankho wataata otyilulu momunthu ankho uhetyivili okupopia, pahe apopi. Otyo ñgeno ankho tyilunda ovanthu ovo okunkhimaneka Huku, avapopila ovanthu ovilinga Siovaa ankho ekahi nokulinga. Moluotyo, alondola vana ankho vemupopia omapita, ati: ‘Lungukei, opo otyimimi tyikahi mu onwe tyihakale enthiki. Mahi inkha olutu luenyi aluho lukahi motyimimi, lutupu enthiki nalike, opo malukala notyimimi tyikahi ngotyimimi tyokandiyelo kekahi nokumumimikila.’ —Luka 11:35, 36.