Sesusi Waava Elondolo Konthele Yomalumono

Putyina Sesusi ankho ekahi nokulia meumbo lyo mu Faliseu, ovanthu ovanyingi aveya aveliongiya kondye yeumbo. Otyipuka otyo ankho tyemumonekela-le ko Ngalileya. (Maluku 1:33; 2:2; 3:9) Pahe mo Sundeya, ovanthu ovanyingi ankho vahanda okumutala, nokutehela etyi alongesa, iya otyituwa otyo ankho tyelikalela no tyova Faliseu vana alia navo.

Etyi Sesusi mapopi tete ankho tyihangununa otyipuka tyakolela unene kovalongwa vae, wati: “Lungukei komaandambeyo, onkhiso yova Faliseu.” Sesusi ankho wevelondola-le konthele yotyo, mahi etyi amona pu etyi valia tyalekesa okuti vesukisa okutavela liwa elondolo olio. (Luka 12:1; Maluku 8:15) Ova Faliseu ankho vaovola okulikembesa okulinga ngatyina vena onthilo na Huku opo oundingavivi wavo uhamoneke, mahi ankho vena omalusoke omavi esukisa okuholololwa. Sesusi ati: “Kutupu natyike tyaholekwa tyiheya okuhololoka, kutupu natyike tyo pokamphengi tyihekeivala.” — Luka 12:2.

Tyafuile ovanthu ovanyingi ankho veliongiya pu Sesusi, ova Sundeu ankho veheivile etyi Sesusi alongesile ovanthu mo Ngalileya. Moluotyo, Sesusi awane vali ononthele mbakolela apopile-ale. Alondola ovanthu aveho ankho vemutehelela ati: “Muhatilei owoma vana vapondola okumuipaa mahi vahapondola okulinga vali natyike.” (Luka 12:4) Ngetyi alingile-ale, atoneka vali okupopia okuti vesukisa okukala nonthumbi yokuti Huku mevetekula. Tupu, ankho vesukisa okunoñgonoka Omona womulume nokuimbuka okuti Huku upondola okuvekuatesako. — Mateusi 10:19, 20, 26-33; 12:31, 32.

Omulume umwe pounyingi apopi etyi ankho tyemusukalalesa, ati: “Mulongesi, popila omukulu wange tutepule nae epingo.” (Luka 12:13) Ovitumino ankho vipopia okuti pepingo otyiveli una okutambula vali tyipona vakuavo, otyo ankho nawike upondola okutyipatana. (Deuteronômio 21:17) Mahi tyamoneka nawa okuti omulume oo, ankho uhanda okupewa unene tyipona etyi ankho ena okupewa. Sesusi nounongo aanye okulipaka-po, ati: “Olie wampha otyilinga tyokukala omukoyesi wenyi, ine tyokutetulula ovitateka pokati kenyi vevali?” — Luka 12:14.

Konyima, Sesusi alondola aveho okuti: “Lungukei, nokuliyunga kelungavi, mokonda namphila omunthu omuhona, omuenyo wae kautundu movipuka ena.” (Luka 12:15) Omunthu upondola okukala nomalumono omanyingi, mahi tyina amankhi ovipuka aviho uvisa-po. Sesusi atoneka onondaka ombo nongeleka ilekesa okuti tyakolela okukala novituwa oviwa komaiho a Huku.

Wati: “Epia liomulume umwe omuhona liayela nawa. Ngotyo ahimbika okusoka okuti: ‘Oityi mandyilingi, putyina nehena apa mandyongiya ovikuna viange?’ Pahe ati: ‘Mandyilingi ñgaa: Mandyitungulula ovilimba viange, andyitungu ovinene vali, andyongiya-mo ovilia viange novipuka viange aviho oviwa, mandyilipopila okuti: “Una ovipuka ovinyingi oviwa, mavikala omanima omanyingi, pululukwa, liaa, nwaa, hambukwa.”’ Mahi Huku emupopila okuti: ‘Ove utyova, otyinthiki tyino monkhi. Olie mesala novipuka wapaka?’ Otyo tyimoneka nomunthu uliongiyila omalumono, mahi omuhepi komaiho a Huku.” — Luka 12:16-21.

Ovalongwa va Sesusi novanthu ovakuavo vatehelela, ankho vapondola okutokela meliva liokuovola omalumono omanyingi. Tupu, omasuka-suka omuenyo ankho apondola okuvepola omuvo wokuumbila Siovaa. Ngotyo, Sesusi awane elondolo apopile-ale Melongomona lyo Komphunda, enima notyihupe konyima.

Wati: “Yekei-po okukala notyiho nomienyo vienyi konthele yetyi mamuli ine nolutu luenyi konthele yetyi mamuvale. . . . Talei nawa omakuaila: Kaakunu ombuto, kaateye; tupu etupu ovimbundu, nii ovilimba; mahi Huku weeavela okulia. Onwe kamuna vali esilivilo tyipona oviila? . . . Talei oñgeni ononthemo mbukula: Kambuundapa tupu kambutungu ovikutu; mahi ndyimupopila okuti, alo umwe Salomau wankhimanene unene kavalele ehiwa ngononthemo. . . . Ngotyo, yekei-po okukala notyiho konthele yetyi mamuli netyi mamunu, yekei-po okusukalala unene . . . Tate yenyi utyii okuti onwe muesukisa ovipuka ovio. . . . Tualeiko okuovola Ouhamba wae iya ovipuka ovio mamuviyawisilwa-ko.” —Luka 12:22-31; Mateusi 6:25-33.

Ovalie mavaovola Ouhamba wa Huku? Sesusi wapopia okuti, ‘otyunda otyitutu,’ ovanthu ovakuatyili mavaovola Ouhamba. Ombalulo yavo yo 144.000 ankho maiholololwa vala konyima. Oityi vapakelwa? Sesusi evepopila okuti: “Tate yenyi uhanda okumuavela Ouhamba.” Ovanthu ovo kavaovola omalumono pano pohi pena ovimphulu vipondola okuvaka. Mahi, vaovola ‘olumono luhapu keulu,’ oku mavakatumina na Kilisitu. — Luka 12:32-34.