Ovilinga Vya Sesusi Ko Peleya

Sesusi ankho ukahi nokulongesa, nokuhakula ovanthu mo Sundeya no mo Selusalei. Konyima ayauka Ondongi yo Solondau opo akalongese punda-umbo na punda-umbo motyilongo tyo Peleya. Liwa-liwa, ankho makondoka vali ko Selusalei.

Pu etyi Sesusi nkhele ankho ekahi mo Peleya, omulume umwe emupulu okuti: “Tatekulu, okuti otyili ovanthu mavahupiswa kavehi?” Omulume oo tyipondola ankho utyii okuti ononkhalamutwe mbonongeleya velitesa onkhango mokonda ankho kavetyii nawa inkha ovanthu mavahupu ovanyingi ine kavehi. Sesusi ahakumbulula epulo olio, mahi apopi otyityi omunthu esukisa okulinga opo ahupe. Ati: “Lingei ononkhono opo munyigilile pepito liahita.” Tyotyili, tyesukisa okulinga ononkhono. Omokonda yatyi? Sesusi ahangununa okuti: “Ovanyingi mavakaovola okunyingila, mahi kamavetyivili.” — Luka 13:23, 24.

Opo alekese okuti tyili tyesukisa umwe okulinga ononkhono ononene, Sesusi aave ongeleka ati: “Putyina hekulu yeumbo amakatuka, aiki pepito, onwe mamukakala kondye otyo mutotola pepito, amuti: ‘Tatekulu, tuyelule.’. . . Mahi ngwe mekemupopila okuti: ‘Ame oku muatunda hikwii. Tundei ponthele yange, amuho onwe vokulinga ovipuka viapenga!’” —Luka 13:25-27.

Ongeleka oyo ilekesa nawa okuti tyina omunthu amasete, hamwe mokonda nkhele ankho ulinga etyi ahanda, kumbi eya mavasi epito liaikwa. Ankho una okuya liwa, alo umwe putyina pena tyimwe tyipondola okumusetesa. Otyo, otyipuka tyike na vana ankho vapondola okupola ouwa ku etyi Sesusi alongesa. Mahi vapumbwa omphitilo yokupaka efendelo liotyotyili pomphangu yotete momuenyo wavo. Kovanthu ankho Sesusi atumwa, ovanyingi puvo kavetavelele etyi Huku alinga, opo eveyovole. Sesusi wati ovanthu ovo, ‘mavakalila, otyo vakema mokonda yokueihamenwa,’ putyina vamayumbwa pondye. Mahi “ovanthu mavakatunda koutundilo no koutakelo, no kokulio no kokumbili kuekumbi,” ovanthu vomalongo aeho, “mavakapumphama komesa Mouhamba wa Huku.” — Luka 13:28, 29.

Sesusi wahangununa okuti: “Kuna ava vesaililwa [ovanthu veheva Sundeu nova Sundeu ankho vatekulwa onya] mavakakala ovatete, tupu kuna ovatete [vongeleya yova Sundeu, vana ankho velimphanda mokonda vatuka movatekula va Ambalaiau] mavekesaililwa.” (Luka 13:30) ‘Okusaililwa’ oko, tyihangununa okuti ovanthu ovo vokuhapandula kamavakanyingila Mouhamba wa Huku.

Ova Faliseu vamwe pahe aveya ku Sesusi, avati: “Tunda-po pano enda, mokonda Helode [Antipa] uhanda okukuipaa.” Tyipondola Ohamba Helode ankho oyo ikahi nokumuhonga okumuipaa opo Sesusi atunde potyilongo ende. Helode tyafwa ankho watila owoma wokuti melipake vali pononkhia mbomuuli omukuavo, ngetyi alingile-ale pu Suau Batisita. Mahi Seusi apopila ova Faliseu, ati: “Endei, kapopilei otyimbandye otyo, muti tyatiwa ‘ame hono nomuhuka mandyitaata ovilulu, andyihakula ovanthu iya muhuka lina andyimanuhula.’” (Luka 13:31, 32) Sesusi ankho wemupopia okuti “otyimbandye,” mokonda ovimbandye vielilungukisa. Mahi, Sesusi ankho kahindilwa ine okukuluminyua na Helode ine hamwe omunthu omukuavo etyi ena okulinga. Ankho mafuisapo ovilinga apewa na Tate yae, okulinga ngetyi Huku ahanda, ha ngetyi ovanthu vahanda.

Sesusi atualako noungendi wae okuenda ko Selusalei, mokonda ngetyi muene apopia, “omuuli kapondola okuipaelwa kondye yo Selusalei.” (Luka 13:33) Mombimbiliya mutupu eulo nalike lipopia okuti Mesiya una okunkhila mepunda-umbo olio. Opo omokonda yatyi Sesusi atila omo ena okuipaelwa? Omokonda o Selusalei ankho oyo ombala yotyilongo, mukala ovatumini 71 Vombonge onene yova Sundeu, iya omo mukoyesilwa vana ankho vahungwa okuti ovauli vomatutu. Tupu, ankho omo mulingilwa ovilikutila viovinyama. Ngotyo, Sesusi ankho wanoñgonoka okuti ankho kapondola okuipaelwa komphangu onkhuavo.

Sesusi eliyave ati: “Vanthu vomo Selusalei, vaipai vovauli, onwe vokutyopa nomamanya vana vatumwa ku onwe. Tuñgapi nahandele okuongiya ovana venyi, ngotyuufwa tyiundika ovipiyona viatyo momapapatelo! Mahi onwe amuhetavela. Talei! Ondyuo yenyi yokufendela Huku meiyeke-po emusila-yo.” (Luka 13:34, 35) Ovanthu velongo liokuanya Omona wa Huku, ankho mavakala novitateka ovinene!

Etyi nkhele Sesusi ehenehike ko Selusalei, omutumini wova Faliseu emukongo aye akalie keumbo liae Motyasapalo. Ovanthu ovakuavo ankho navo vakongwa, ankho vekahi nokumutala nawa etyi malingi omulume umwe ankho una ouvela wokumita (ouvela umwe umitisa olutu, mokonda yomaande omanyingi molutu). Sesusi apulu ova Faliseu novanongo Vovitumino, ati: “Tyaviuka okuhakula Motyasapalo ine tyapenga?” — Luka 14:3.

Nawike wakumbululile. Sesusi ahakula omulume oo, pahe apulu okuti: “Olie pu onwe inkha omona wae ine ongombe yae itokela metoto Motyasapalo, kahateka liwa-liwa eipolo-mo?” (Luka 14:5) Epulo olio alinga ankho liaviuka, mahi nawike wemukumbululile.