Okukala Omulongwa Wa Kilisitu Otyilinga Otyinene

Sesusi walongesa ovipuka viakolela etyi ankho ekahi nokulia meumbo lionkhalamutwe yova Faliseu. Pahe atualako noungendi wae aende ko Selusalei, ovanthu ovanyingi avemulandula. Omokonda yatyi? Okuti ankho vahanda umwe okukala ovalanduli vae votyotyili, avetavela okulinga atyiho vaitwa?

Putyina vaya, Sesusi apopi otyipuka tyimwe tyafuile tyihahambukisilwe ovanthu vamwe, ati: “Inkha omunthu umwe uya ku ame, mahi ahayale he na ina nomukai wae, nomona wae, nondenge yae, nomphange yae alo umwe omuenyo wae, kapondola okukala omulongwa wange.” (Luka 14:26) Mahi oityi Sesusi ankho ahanda okupopia?

Sesusi ankho kekahi nokuti vana vakala ovalongwa vae vena okuyala ombunga yavo. Mahi ankho uhanda okupopia okuti vena okukala vali nohole onene na Sesusi. Ankho kavapondola okukala ngomulume apopia mongeleka wehetavelele okuenda oku akongwa mokonda vala wanepa. (Luka 14:20) Ombimbiliya ipopia okuti omukuaukulu wova Sundeu Sakoo, ankho “uyele” Leya, mahi ankho uhole Lakele, tyilekesa okuti ankho uhole vali Lakele tyipona Leya. — Gênesis 29:31; okatoi.

Tala okuti Sesusi wapopia okuti omulongwa wae una okuyala “alo umwe omuenyo wae,” ine ohande. Otyo tyihangununa okuti omulongwa wotyotyili una okukala vali nohole na Sesusi tyipona nomuenyo wae, una okukala tyafuapo alo umwe okupeseka komuenyo wae inkha tyesukisa. Tyayandyuluka nawa okuti okukala omulongwa wa Kilisitu otyilinga otyinene. Omunthu ketavela vala, mahi tete una okusoka nawa-nawa.

Okukala omulongwa muakutikinya okumoneswa ononkhumbi nokuhataikiswa, mokonda Sesusi wati: “Una uhelityindila omuti wae wemone, andandula, kapondola okukala omulongwa wange.” (Luka 14:27) Omulongwa wotyotyili wa Sesusi una okukala tyafuapo opo akoleleye tyina vemuanya, ngetyi tyaendele na Sesusi. Sesusi alo umwe wapopile okuti ankho maipawa nonondyale mbae.

Ngotyo, ovanthu ankho ekahi nokueenda navo, ankho vesukisa okusokolola nawa oityi tyihangununa okukala omulongwa wa Kilisitu. Sesusi apopi ongeleka yalekesa okuti otyo tyakolela unene. Ati: “Mongeleka, olie pu onwe tyina ahanda okutunga ondyuo, tete kasoko atale inkha etyi ena-tyo matyituuka okuitunga aipu? Okuhalingi ngotyo, upondola okutunga elisesu mahi ehetyivili okuitunga aipu.” (Luka 14:28, 29) Ngotyo, tyina vehenekale ovalongwa va Sesusi, vana ankho vekahi nokumulandula, okuenda ko Selusalei ankho vena okutokola okufuisapo otyilinga otyo. Otyo etyitoneka nongeleka onkhuavo.

Ati: “Ohamba patyi yenda vala kovilwa, tete aihapakelwa-mo okutala inkha omafualali 10.000 atuuka okukaluisa ohamba ina omafualali 20.000? Ngotyo, inkha utala kametyivili, utuma ovatumwa-ndaka vae vaye-ko avalingi ombembwa tyina nkhele ohamba onkhuavo ikahi kokule.” Opo atoneke vali onondaka mbae, Sesusi ati: “Tyelifwa notyo, no onwe kalei tyityii okuti una uhasi-po ovipuka viae aviho, kapondola okukala omulongwa wange.” — Luka 14:31-33.

Sesusi ankho kekahi nokupopila vala ovanthu vemulandula metapalo. Aveho velilongesa konthele ya Kilisitu vena okukala tyafuapo opo valinge etyi ankho ekahi nokupopia. Otyo tyilekesa okuti vesukisa okukala tyafuapo konthele yokupeseka komalumono avo, alo umwe omuenyo wavo, opo vakale ovalongwa vae. Tyesukisa okusoka nawa nokulikuambela konthele yotyo.

Pahe Sesusi apopi otyipuka tyimwe apopile-ale Melongomona liae Komphunda etyi apopia okuti ovalongwa vae, ‘omongwa wohi.’ (Mateusi 5:13) Mokutala ankho ukahi nokupopia okuti, ngetyi omongwa ukalesa nawa ovipuka avihavolo, novalongwa vae vakuatesako ovanthu, okuveyakulila kovipuka vinyona oupanga wavo na Huku novituwa viavo. Pahe mokonda ovilinga viae ankho vikahi nokuhika konthyulilo, apopi okuti: “Tyotyili omongwa ukahi nawa. Mahi inkha upwa ononkhono, oityi matyiupepesa vali?” (Luka 14:34) Ovateheleli vae ankho vetyii okuti motyilongo tyavo omongwa pamwe ukala tyasila, mokonda uhonya neheke iya auhasilivila vali.

Ngotyo, Sesusi ankho ukahi nokulekesa okuti alo umwe vana vakala-le ovalongwa vae ehimbwe vena okulunguka opo vahasoye. Tyetyi inkha vasoya, kamavakala vali nesilivilo, ngatyina omongwa uhena vali ononkhono. Ouye upondola okuvelinga omukuele. Haunene, komaiho a Huku kavakala vali tyafuapo, alo umwe vapenyesa enyina liae. Sesusi alekesa nawa okuti tyesukisa unene okulityilika otyiponga otyo, ati: “Olie una omakutwi okutehelela, atehelele.” — Luka 14:35.