• Ovola Omalumono Otyotyili
    Omutala Womulavi (Wokulilongesua)—2017 | Kakwenye

    • 4, 5. (a) Oityi tyaenda nomuundapi omukalavi wapopiua mehipululo lia Jesus? (b) Oityi Jesus apopila ovalanduli vae valinge?

      4 Tanga Lucas 16:​1-9. Ehipululo lia Jesus lio muundapi omukalavi litulunda okusoka. Omuhona weiva okuti omuundapi wae ukahi nokupesela omalumono ae, atokola okumutaata.a (Okatoi.) Mahi omuundapi “asoko nounongo.” Tyina nkhele ehenetewe movilinga, ulinga oupanga novanthu opo ha vemukuateseko. Jesus kapopile ehipululo eli opo ovalongwa vae valinge oupanga novanthu, ine okulinga ovipuka viapenga opo ha vahupe. Wati otyo ovanthu vomouye valinga. Mahi, Jesus wapopia ehipululo olio opo alongese otyipuka tyimwe tyakolela.

      5 Jesus ankho utyii okuti ngetyi omuundapi ankho ekahi motyitateka, ovalanduli vae ovanyingi vapondola okukala novitateka mokonda vakala mouye uno omukalavi. Otyo apopila okuti: “Lingei omapanga nomalumono ahaviukile.” Omokonda yatyi apopila ngotyo? Mokonda tyina omalumono amapu, omapanga oo, Jeova na Jesus “mavevetambula monomphangu mbahapu.” Oityi tulilongesila kelondolo lia Jesus?

       6. Oñgeni tutyii okuti ouye uno wonondando kaulingi onthele yehando lia Huku?

      6 Namphila Jesus ahapopile omokonda yatyi aihanena omalumono okuti “kaaviukile,” mahi Ombimbiliya iyandyulula nawa okuti okukala nonombongo ononyingi katyilingi onthele yehando lia Huku. Mongeleka, Jeova tyahakuluminyua waavela Andau na Eva ovipuka aviho ankho vesukisa motyikunino tyo Endene. (Gênesis 2:15, 16) Etyi Huku aavela ospilitu sandu ovalembulwa, “nawike wapopia okuti ovipuka ena oviae muene, mahi ovipuka aviho ankho vena veliavela na vakuavo.” (Atos 4:32) Omuuli Isaia wapopia konthele yomuvo ovanthu aveho mavakakala nehambu liovipuka oviwa ohi mayave. (Isaías 25:6-9; 65:21, 22) Mahi tyina omuvo oo uhenehike-po, ovalanduli va Jesus vesukisa “okukala nounongo wokusoka.” Pamwe mavesukisa okuundapesa omalumono omouye uno opo velitekule, mahi tupu otyo vaovola okuhambukiswa Huku.