Onthengele-popia Yonomina Ekwi

Namphila ankho Sesusi maende no ko Selusalei, tyafuile nkhele ankho ukahi meumbo lya Sakeu novalongwa vae. Ovalongwa ankho vetavela okuti kuakamba katutu “Ouhamba wa Huku” mauvialekwa, iya Sesusi oe makala Ohamba. (Luka 19:11) Mahi ankho otyo kavetyinoñgonokele nawa, ngetyi ankho vahanoñgonokele okuti Sesusi una okunkhia. Moluotyo, Sesusi evepopila onthengele-popia opo evekuateseko okutala okuti Ouhamba ankho mauya komutwe wandyila.

Ati: “Omulume umwe omona wohamba, ankho waya kotyilongo kokule opo akavialekwe kouhamba, haa na akondoke.” (Luka 19:12) Oungendi oo ankho maukala ehimbwe. Tyimoneka nawa okuti Sesusi oe “omona wohamba” wenda “kotyilongo kokule,” keulu, oku Tate yae ankho mekemuavela epondolo liokukala ohamba.

Monthengele-popia oyo, tyina nkhele “omona wohamba” eheneende, wiihana ovapika vae ekwi, aavela kese umwe omina, evepopila okuti: “Lingei nambo ovitanda alo ndyikondoka.” (Luka 19:13) Omina ike, ankho onombongo ononyingi. Ankho onombongo mbufetwa omunthu waundapa mepia omuvo ulamba ponohanyi ononthatu.

Ovalongwa tyafuile vaimbukile okuti ankho vekahi ngovapika ekwi vapopiwa monthengele-popia, mokonda Sesusi ankho weveeleka-le novateyi. (Mateusi 9:35-38) Tyotyili, ankho kekahi nokuveita opo vakateye ovilia momapia. Mahi, okuteya oko, ankho okukuatesako ovanthu okukala ovalongwa opo vakanyingile Mouhamba wa Huku. Ovalongwa ankho mavaundapesa omuvo wavo auho, nononkhono, alo umwe omalumono opo vakuateseko vakuavo okukala onomphinga Mbouhamba.

Oityi vali Sesusi apopia monthengele-popia yae? Wapopia okuti ovanthu “vo motyilongo tyae ankho vemuyele [omona wohamba] iya avatumu ovanthu vekemupopile okuti: ‘Onthue katuhande omulume oo akale ohamba yetu.’” (Luka 19:14) Ovalongwa ankho vetyii okuti ova Sundeu kavahande Sesusi, alo umwe vamwe vahandele okumuipaa. Konyima yononkhia mba Sesusi, etyi apitale keulu, ova Sundeu valekesile okuti vemuyele, etyi vamonesa ononkhumbi ovalongwa vae. Onondyale ombo valekesa nawa okuti ankho kavahande Sesusi akale Ohamba yavo. — Suau 19:15, 16; Ovilinga 4:13-18; 5:40.

Oñgeni ovapika ekwi vaundapesa onomina mbavo tyina “omona wohamba” ‘ehenevialekwe kouhamba’ iya akondoka? Sesusi wati: “Etyi avialekwa kouhamba akondoka, aihana ovapika vana apele onombongo, opo atale etyi vamonena konombongo evepele movitanda valinga. Ngotyo, wo tete eya ati: ‘Tatekulu komina yove namonena-ko vali onomina ekwi.’ Iya emupopila okuti: ‘Waundapa nawa mupika ondalawa! Mokonda wakala omukuatyili mokapuka okatutu, motumina omapunda-umbo ekwi.’ Iya wa vali eya ati: ‘Tatekulu, komina yove namonena-ko vali onomina ononthano.’ Nae emupopila okuti: ‘No ove motumina omapunda-umbo etano.’” — Luka 19:15-19.

Inkha ovalongwa vanoñgonoka okuti vekahi ngovapika vaundapesa omuvo wavo auho, nononkhono mbavo, alo umwe omalumono avo opo valinge vali ovalongwa, ankho vapondola okukala nonthumbi yokuti mavahambukiswa Sesusi. Tupu ankho vapondola okukala nonthumbi yokuti meveyambe mokonda yononkhono valinga. Ovalongwa va Sesusi ankho vena ononkhalelo mbomuenyo mbelikalaila, no nomphitilo, nounongo welikalela. Mahi no ngotyo Sesusi, una ankho ‘mavialekwa kouhamba,’ manoñgonoka ononkhono ovalongwa vae ovakuatyili valinga, iya eveyambe. — Mateusi 28:19, 20.

Sesusi amanuhula onthengele-popia yae nokupopia konthele yomupika welikalela, ati: “Mahi [omupika] omukuavo weya, ati: ‘Tatekulu omina yove oyei, ankho neiholeka potyinyanga. Utyii, ame ankho nekutila owoma, mokonda umukalavi, upola apa uhapakele, tupu uteya apa uhakunine.’ Iya emupopila okuti: ‘Ndyikukoyesila konondaka mbove muene, mupika ondingavivi. Ove ankho utyii okuti ndyimukalavi, ndyipola apa nahapakele, andyiteye apa nahakunine? Naina oityi uhapakelele onombongo mbange kombango? Ñgeno tyina nameya nekembupola-ko iya avandyawisila-ko.’ Moluotyo apopila vana ankho veli-po ati: ‘Mupolei omina oyo amuyavela una wokuna onomina ekwi.’” — Luka 19:20-24.

Mokonda omupika oo kaundapele opo ayawise komalumono ouhamba womuhona wae, apolwa omina yae. Ono apositolu ankho vakevelela Sesusi atumine Mouhamba wa Huku. Ngotyo, etyi Sesusi apopia konthele yomupika oo, tyafuile avaimbuka okuti inkha kavaundapa nombili kamavakakala Mouhamba wa Huku.

Onondaka mba Sesusi tyipondola mbaavelele ondundo ovalongwa ovakuatyili okulinga vali ononkhono. Sesusi amanuhula, ati: “Ame ndyimupopila okuti, omunthu wokuna, makapewa vali, mahi, una uhena, alo etyi ena meketyipolwa.” Ayawisako okuti onondyale mbae, vahahande ‘akale ohamba yavo,’ ankho mavakaipawa. Konyima, Sesusi atualako noungendi wae, okuenda ko Selusalei. — Luka 19:26-28.