Ondyuo Ya Huku Isukukiswa Vali

Sesusi novalongwa vae valala ovinthiki vitatu mo Betania tunde etyi vatunda ko Selikoo. Pahe Tyasikunda komuhuka, monthiki 10 ya Nisan, avaende ko Selusalei. Sesusi ankho waliwa nondyala. Ngotyo, etyi amona omukuyu aende-ko. Okuti ankho kuna omakuyu?

Ankho ohanyi ya Março ikahi nokupwa, mahi omuvo womakuyu ankho uhimbika vala mu Junho. No ngotyo, ankho una omafo atalala, wayova liwa. Sesusi asoko okuti mavasi-ko omakuyu. Mahi, ahavasi-ko nalike. Omafo ankho alekesa ngatyina kuna ovinyango. Sesusi eupopi okuti: “Nawike vali ukalia otyinyango ku ove alo-loo.” (Maluku 11:14) Liwa-liwa, omuti auhimbika okukukuta iya etyi ankho tyihangununa Sesusi wetyipopia monthiki yalandulako komuhuka.

Apalambe omuvo uhehi, Sesusi novalongwa vae avehiki ko Selusalei. Sesusi aende mondyuo ya Huku, muna aile-ale monthiki yokualamba komakumbi. Pahe monthiki oyo kaile-mo vala okukatala-mo; mahi alingi ngetyi alingile-ale omanima etatu konyima po Pasikwa yenima 30 P.K. (Suau 2:14-16) Motyikando etyi, Sesusi ataata ‘vana ankho vekahi nokulandesa, no vokulanda mondyuo ya Huku.’ Tupu, apinaununa “onomesa mbovakumani vonombongo novipundi vya vana ankho valandesila-mo onopomba.” (Maluku 11:15) Alo umwe ahayeke omunthu nawike utyinda ovipuka, akuate mepata liondyuo ya Huku aenda konthele onkhuavo yepunda-umbo.

Omokonda yatyi Sesusi ataatela ovakumani vonombongo, no vokulandesa ovinyama mondyuo ya Huku? Wati: “Katyahonekelwe okuti: ‘Ondyuo yange maikaihanwa okuti ondyuo yomalikuambelo pala omalongo aeho?’ Mahi, onwe mukahi nokuilinga eleva liovimphulu.” (Maluku 11:17) Sesusi waihanene ovalume ovo okuti ovimphulu mokonda ankho vaita onombongo ononyingi kovanthu ankho valanda ovinyama viokulinga ovilikutila. Ku Sesusi otyipuka otyo ankho oumphulu ine okuvaka.

Ovanene-nakwa, novahoneki vovitumino nononkhalamutwe mbova Sundeu aveivi etyi Sesusi alinga, pahe avatokola umwe okumuipaa. Mahi, ankho vena otyitateka tyimwe. Ankho kavetyii oñgeni mavaipaa Sesusi mokonda yovanthu ovanyingi ankho velikongololela pwe opo vatehelele etyi alongesa.

Ha va Sundeu vala veile kotyipito tyo Pasikwa, mahi kueile novanthu vokuetavela efendelo lyo va Sundeu. Pokati kavo ankho pena ova Geleku veile kotyipito pala okufenda. Ovanthu ovo aveya pu Filipe, tyafuile mokonda vapanda enyina liae lyo Geleku, avemuiti vatale Sesusi. Mokutala Filipe ankho utupu onthumbi yokuti okulivasa na Sesusi tyaviuka, moluotyo akapopila Andelee. Pahe Filipe na Andelee avakapopila Sesusi, tyafuile ankho ukahi mondyuo yokufendela.

Sesusi ankho utyii okuti mononthiki mbehehi maipawa, moluotyo oo ankho hamuvo wokuhambukiswa vokuna olumbwe ine wokunoñgonokua vali novanthu. Moluotyo, akumbulula ono apositolu ovo vevali nongeleka, ati: “Oola yokunkhimanekwa Kuomona womulume yehika-po. Ame ndyimupopila otyili okuti, inkha oñgima yotiliku kaitokela meheke ainkhi, itualako vala aike; mahi inkha inkhia, yaava ovinyango ovinyingi.” — Suau 12:23, 24.

Oñgima ike vala yotiliku okuitala ngoti kaisilivila. Mahi inkha ikunwa “ainkhi,” imena aikulu iya aikala nomutwe una onoñgima ononyingi. Tyelifwa notyo, Sesusi ankho oe vala aike uhena onkhali. Mokonda watualako noukuatyili ku Huku alo ankhia, waavela ovanthu ovanyingi vena omutima weliava, omphitilo yokukala nomuenyo wa apeho. Ngotyo, Sesusi ati: “Una uhole omuenyo wae meupesela, mahi una uyala omuenyo wae mouye uno, makakala nomuenyo wahapu.” — Suau 12:25.

Sesusi ankho kekahi nokusoka vala kwe muene, mokonda wati: “Inkha omunthu umwe uhanda okuumbila ame, andandule, apa ndyikahi nomuumbili wange opo makakala. Omunthu uhanda okuumbila ame, Tate mekemuhumba.” (Suau 12:26) Oyo ondyambi ongwa ngatyi! Vana vapandwa na Huku mavakakala Mouhamba wa Kilisitu.

Sesusi asoko kononkhumbi ankho mamoneswa nonkhalelo iihama ankho maipawa, ati: “Pahe ame neihamenwa unene, iya oityi mandyipopi? Tate, ndyovole moola ino.” Sesusi ankho kahande okulityilika okufuisapo ehando lya Huku. Ayawisako okuti: “Mahi etyi, otyo neila moola ino.” (Suau 12:27) Sesusi ankho utavela okulinga atyiho Huku ahanda, alo umwe okuava otyilikutila tyomuenyo wae.