Kuatesako Ewaneno Lienyi

Mouye auho, onthwe Nombangi mba Siovaa tuati umwe ava veli mewaneno eli, ava veli mewaneno eli. Onthwe tufenda Siovaa nehambu mokonda momawaneno etu, tulongesiwa ovipuka ovinyingi vitukuatesako tukale nawa. Mahi tupu tuna ehambu mokonda no onthwe tuna-vo vimwe tulinga tukuateseko ewaneno lietu. Okuti no ove tyina usoka kewaneno lienyi, uhambukwa?

1. Oityi upondola okulingila ewaneno lienyi?

Atuho tuna vimwe tupondola okulingila ewaneno lietu. Okuti mewaneno lienyi muna omunthu uvela, hamwe wakulupa? Ine muna, okuti pamwe upondola okukemuwana umutuale keliongiyo? Tupu upondola okumulingila-ko ovipuka vimwe ngwe ehevili vali okulinga aike, okukemulandela-ko okulia, nokumukombela-ko meumbo liae. (Tanga Tiaku 1:27.) Otyipuka otyikwavo tupondola okulingila ewaneno lietu, okukomba Mondyuo Yomaliongiyo, nokuviukisa evi viateka. Okuti pena omunthu utukuluminya tulinge ovipuka ovio? Au! Tukuatesa-ko tupu ewaneno lietu, omokonda tuhole Siovaa, tuhole vakuetu. Tulinga umwe etyi Ombimbiliya yapopia yati: “Ame uno! Nthume.” — Isaías 6:8.

Vokuambatisalwa vena vali ovipuka ovikwavo vapondola okulingila ewaneno. Ovalume vapondola okulikuatehila vakale ovakuatesiko vovakulu vewaneno, novakulu vewaneno. Aveho mewaneno, ovakuendye novahikuena, vapondola okukala ovakokoli-ndyila opo vakale omuvo omunyingi nokulongesa ovanthu Ombimbiliya. Vamwe vapondola okuundapa movilinga viokutunga onondyuo mbomaliongiyo, nonondyuo ononkhuavo vali mbeongano. Nkhele ovakuavo, vapondola okukakuatesako ewaneno liehena ovaivisi ovanyingi.

2. Oñgeni tupondola okukuatesako ewaneno lietu netyi tuna-tyo?

Ombimbiliya yati: “Hilivika Siovaa, muhilivika neevi una-vyo.” (Provérbios 3:9) Onthwe tuhambukwa tyina tuava onombongo, novipuka ovikwavo tuna-vyo, tukuateseko ewaneno lietu, novilinga viokulongesa ovanthu Ombimbiliya vili nokulingwa mouye auho. (Tanga 2 Ova Kolindu 9:7.) Onombongo tuava, tupu mbukuatesako vakuetu tyina vatumbukilwa novihuna. Vamwe ono simanu ambuho, nonohanyi ambuho, vatepula ku etyi vena-tyo vakuateseko ovilinga vya Huku. (Tanga 1 Ova Kolindu 16:2.) Mahi pahe onombongo tuahanda okuava matumbupake-pi? Upondola okumbupaka moukasa uli Mondyuo Yomaliongiyo. Okuti hatyo, upondola okulingila mo internet mo donate.jw.org. Tyina tuava etyi tuna-tyo tukuateseko ewaneno lietu, ngotyo tuli nokupopila Siovaa okuti tumuhole.

KUHANDE OKUNOÑGONOKA VALI?

3. Tupondola okukuatesako ewaneno netyi tuna-tyo

Ovo Siovaa na Sesusi vetyihole tyina vamona omunthu ulipola etyi ena-tyo, aave etyi muene tyatunda komutima. Tupopia ngotyo mokonda Sesusi wapandulile omuhepe umwe ankho wahepa unene, mahi no ngotyo elipolo umwe aka ankho ena-ko, ngako aava. Tangei Luka 21:1-4, amutomphola omapulo aa:

• Okuti opo Siovaa ahambukwe tuna okuava onombongo ononyingi?

• Oñgeni ovo Siovaa na Sesusi vakala tyina tuava etyi muene tyatunda komutima?

Talei OVIDIU, mutale onombongo tuava mbenda napi. Pahe amutomphola epulo eli:

OVIDIU: Okuavela Siovaa (4:47)

• Onombongo tuava mbulinga-tyi tyihole okukuatesako Onombangi mouye auho?

4. Tupondola okuundapa

Kohale ovanthu va Huku ankho vaava etyi vena-tyo vakuateseko ovilinga vilingwa mondyuo ya Huku. Mahi tupu ankho vena vali ovipuka ovikwavo valinga. Ovipi pahe? Tangei 2 Crônicas 34:9-11, amutomphola epulo eli:

• Oityi ova Isilayeli valingile vakuateseko ovilinga vilingwa mondyuo ya Huku?

Talei OVIDIU mutale oñgeni Onombangi mba Siovaa valinga umwe ngetyi tyalingile ova Isilayeli. Pahe amutomphola omapulo aa:

OVIDIU: Okuyunga Nawa Onomphangu Mbetu Mbefendelo (3:31)

• Oityi tuna okusukulila nawa Ondyuo yetu Yomaliongiyo, atupangiya liwa evi viateka?

• Ovipuka patyi upondola okulinga no ove ukuateseko-vo ovilinga ovio?

5. Ovalume vapondola okulikuatehila vakale novilinga mewaneno

Ombimbiliya yapopia okuti ovalume vena okulikuatehila vakale novilinga mewaneno, avaundapela vakuavo. Talei OVIDIU mutale etyi tyalinga omukuendye umwe. Pahe amutomphola epulo eli:

OVIDIU: Vakuendye — Likuatehilei Mukale Novilinga Mewaneno (5:19)

• Oityi omukuendye tuamona movidiu alinga akuateseko ewaneno liavo?

Ombimbiliya ipopia etyi omunthu ena okulinga akale omukulu wewaneno, nomukuatesiko wovakulu vewaneno. Tangei 1 Timotiu 3:1-13, amutomphola omapulo aa:

• Opo omunthu akale omukuatesiko wovakulu vewaneno, hamwe omukulu wewaneno, una okukala omunthu ukahi ñgeni?

• Vomeumbo liae, vena okukala ovanthu vekahi ñgeni? — Tala povelesikulu 4 novelesikulu 11.

• Tyina ovalume velikuatehila valinge etyi tuatanga mo tesitu oyo, ewaneno likala ñgeni?

ETYI WELILONGESA

Siovaa uhambukwa tyina tukuatesako ewaneno lietu, tyilinge tyina tuundapa, tyilinge tyina tuava etyi tuna-tyo.

Okupitulula

• Ovipuka patyi tupondola okulingila ewaneno lietu?

• Oñgeni tupondola okukuatesako ovilinga vya Huku netyi tuna-tyo?

• Oityi uhanda okulingila ewaneno lienyi?

KUHANDE OKUOVOLA VALI?

Okuti na hono Huku uhanda ovanthu vae vafete ondisimu?

“Oityi Ombimbiliya Ipopia Tyiyemba Kokupolela Huku Tyike Kekwii?” (Mo jw.org)

Ombimbiliya ipopia ovilinga ovakwendye vapewa tyina vamambatisalwa. Okuti ovilinga ovio, tupu vipondola okulingwa nomukai wambatisalwa?

“Otyilinga Tyononkhalamutwe Mewaneno” (Omutala Womulavi, Hitandyila 2021)

Ovidiu ei ipopia etyi Onombangi vamwe valinga vatuaile omikanda Onombangi vakuavo.

Okuava Omikanda mo Congo (4:25)

Onombangi mba Siovaa kavaiti onombongo kovanthu ngetyi tyilinga onongeleya ononkhuavo. Mahi opo onombongo valinga nambo ovilinga viavo, vembupola-pi?

“Opi Onombangi mba Siovaa Vapola Onombongo Valinge Ovilinga Viavo?” (Mo jw.org)