Ulongesa Okuliola Omutima Po Pasikwa Yahulilila

Ngetyi Sesusi evetuma, Petulu na Suau ankho vehika-le ko Selusalei opo vapongiye Opasikwa. Konyima, Sesusi nono apositolu ekwi avalandula-ko. Ankho okekumbi iya ekumbi ankho likahi nokunyingila putyina Sesusi novalongwa vae valauka Komphunda Yomindyambi. Oyo ankho onthiki yahulilila Sesusi amona epunda-umbo komutenya alo atutiliswa.

Kapakalele ehimbwe, Sesusi novalongwa vae avehiki mepunda-umbo, avaende keumbo ankho mavakalila Opasikwa. Avalondo kosapalalo mondyuo imwe onene. Etyi vehika-mo avavasi ovipuka aviho viapongiyua-le opo valie. Sesusi ankho ukevelela nehambu omuvo oo, moluotyo apopi okuti: “Ankho nahanda unene okulia Opasikwa ei no onwe tyina nehenemoneswe ononkhumbi.” — Luka 22:15.

Pomuvo opo otyituwa tyokulambesa onokopo mbovinyu kovanthu po Pasikwa ankho tyahimbika-le omanima omanyingi konyima. Pahe, etyi atambula okopo imwe, Sesusi elikuambela iya ati: “Umei, litambekei, kese umwe pu onwe anwe-ko. Ame ndyimupopila okuti, okutuka hono, himanu vali ovinyu alo Ouhamba wa Huku uya.” (Luka 22:17, 18) Otyo ankho tyalekesa nawa okuti ononkhia mba Sesusi mbuli popepi.

Pu etyi vekahi nokulia Opasikwa, Sesusi alingi otyipuka tyihuvisa. Wakatuka, alulu omuvalo wae wo kombanda, akuate etuaya. Konyima, apake omaande mombasia ankho ikahi popepi. Pomuvo opo, hekulu yeumbo ankho oe ukoha onomphai mbovaenda, tyafuile ankho utuma omupika. (Luka 7:44) Monthiki oyo hekulu yeumbo ankho kemo, moluotyo, Sesusi alingi otyilinga otyo. Kese umwe pono apositolu ankho upondola okulinga otyilinga otyo, mahi nawike wetyilingile. Okuti omokonda ankho velipakela onkhongo? Katutyii, mahi etyi Sesusi evekoha onomphai atyivekundisa.

Etyi Sesusi ehika pu Petulu, Petulu aanye ati: “Ove kupondola okukoha onomphai mbange.” Sesusi ati: “Inkha hikoho onomphai mbove, kupondola okukala na ame.” Petulu akumbulula okuti: “Tatekulu, uhankhohe vala konomphai mahi tupu nkhohe komankhanya no momutwe.” Tyipondola ahuvu etyi Sesusi emupopila okuti: “Una welikoha-le olutu aluho wasukuka-le nawa, kesukisa vali okulikoha, mahi ukoha vala konomphai. Iya onwe muasukuka, mahi ha amuho-ko.” — Suau 13:8-10.

Sesusi wakoha onomphai mbono apositolu 12, okukutikinya-mo Sunda Isikaliote. Etyi Sesusi avala omuvalo wae wo kombanda, apumphama komesa, apulu okuti: “Etyi nemulinga muetyinoñgonoka? Onwe mundyihana okuti ‘Mulongesi’ ‘Tatekulu,’ iya mupopia umwe nawa, mokonda ame umwe. Ngotyo, inkha ame Tatekulu, ame Mulongesi, nakoha onomphai mbenyi, no onwe muna okukoha onomphai mba vakuenyi. Mokonda ame nemuavela ongeleka yokuti ngetyi ame nemulinga, no onwe otyo muna okulinga. Ndyimupopila otyili okuti, omupika hamunene vali tyipona omuhona wae, na una watumwa hamunene vali tyipona una wemutuma. Inkha muanoñgonoka ovipuka ovio, mamukala nehambu inkha muvilinga.” — Suau 13:12-17.

Oyo onkhalelo ongwa yokulongesa okuliola omutima ngatyi! Ovalanduli va Sesusi kavapondola okuovola omphangu yo tete, okusoka okuti vena vali esilivilo iya vena okuundapelwa. Mahi, vesukisa okuhetekela Sesusi, ha mokulandula otyiso tyokukoha onomphai mba vakuavo, mahi omokukala tyafuapo opo vaundapele vakuavo nomutima weliola, tyihena okapungulula.