Sesusi Wapakulwa Akaipawe

Sesusi wamoneswa ononkhumbi, otyo alingwa omukuele, Pilatu alingi ononkhono mbokumuyovola, mahi ovanakwa novanthu ankho vena-vo avatualako nolusoke luavo. Ankho vahanda umwe Sesusi aipawe. Avatualako okupopila peulu okuti: “Aipaelwe momuti! Aipaelwe momuti!” Pilatu eveti: “Mupolei onwe muene na mumuipae, ame hamuene natyike tyapenga alinga.” — Suau 19:6.

Pilatu ketavelele etyi ova Sundeu ankho vapopia okuti Sesusi watyitukilapo ovatumini. Mahi okuti no tyongeleya Pilatu kametyitavela? Ova Sundeu avapopi vali etyi vahungile Sesusi okuti upopia omapita Huku, pu etyi akoyeswa Nombonge yova Sundeu. Avati: “Onthue tuna otyitumino iya ngetyi otyitumino otyo tyipopia omunthu ou una okuipawa, mokonda yetyi ukahi nokuliti omona wa Huku.” (Suau 19:7) Otyo ankho ku Pilatu otyipe.

Pilatu akondoka meumbo liae, aovola vali onkhalelo onkhuavo yokuyovola Sesusi, wamoneswa-le ononkhumbi ononene, una omukai wae ankho alota ondyoi. (Mateusi 27:19) Pilatu ankho wahuva notyipuka otyo otyipe vekahi nokupopia okuti onkhuatwa Sesusi “omona wa Huku.” Pilatu ankho utyii okuti Sesusi watunda ko Ngalileya. (Luka 23:5-7) Mahi apulu Sesusi okuti: “Ove uwapi?” (Suau 19:9) Okuti Pilatu ankho ukahi nokusoka okuti hamwe Sesusi ankho wali nomuenyo kohale, watunda ku Huku?

Pilatu weivile-ale etyi Sesusi emupopila okuti ohamba, mahi Ouhamba wae kaulingi onthele youye uno. Mokonda Sesusi kahandele okuwana vali etyi apopile-ale, ahapopi natyike. Otyo atyinumanesa Pilatu, apopila Sesusi okuti: “Kuhande okupopia na ame? Ove kutyii okuti ame ndyipondola okukuyovola, tupu ndyipondola okukuipaa?” — Suau 19:10.

Sesusi apopi vala okuti: ‘Ove ankho kupondola okundinga natyike inkha hatyetyi wetyipewa na Huku. Ngotyo omunthu wamphakula ku ove una onkhali onene.’ (Suau 19:11) Mokutala Sesusi ankho kekahi nokupopia okuti wemupakula omunthu wike. Mahi ankho upopia okuti Kaifaa, novanthu ovakuavo, na Sunda Isikaliote vena onkhali onene vali tyipona Pilatu.

Pilatu akala tyahuva nonkhalelo ya Sesusi, nonondaka mbae, atili owoma wokuti Sesusi hamwe wakalele keulu iya hamwe o huku, aovola vali okumuyovola. Mahi, ova Sundeu avapopi onondaka mbatilisile Pilatu owoma. Avati: “Inkha ove uyovola omunthu ou, opo kupanga-ko lya Sesale. Mokonda omunthu ulipaka kouhamba ondyale ya Sesale.” — Suau 19:12.

Pilatu aeta vali Sesusi pondye iya apumphama kotyipundi tyae tyokukoyesila, apopila ovanthu okuti: “Talei ohamba yenyi!” Ova Sundeu avahapilulula omitima viavo. Mahi avapopila peulu okuti: “Muipaa! Muipaa! Muipaela momuti!” Pilatu evepulu okuti: “Ndyipondola okuipaa ohamba yenyi?” Namphila ova Sundeu ankho vahahande okutuminwa nova Loma, mahi pomuvo opo ovanene-nakwa avati: “Onthue tutupu ohamba onkhuavo, o Sesale vala.” — Suau 19:14, 15.

Mokonda Pilatu ankho watila owoma ova Sundeu, evepakulila Sesusi akaipawe. Omafualali aemupolo otyinyanga tyina tyotyivala tyonkhula, aemuvaleka ovikutu viae. Putyina vaya nae akaipawe, Sesusi ankho una okutyinda omuti wae omu makapapelwa.

Pahe ankho o Mutano komutenya, 14 ya Nisan. Sesusi walele lupahi, amoneswa ononkhumbi ononyingi. Tyina ahetekela okutyinda omuti oo walema, ehetyivili mokonda ononkhono utupu vali. Ngotyo, efualali alitumu omunthu umwe utiwa o Simau ankho ukahi nokulamba, utunda ko Silene mo Afilika, opo emutyindile-ko omuti oo alo apa makaipaelwa. Ovanthu ovanyingi ankho vekahi nokulandula-mo otyo valila unene, vaihamenwa netyi ankho Sesusi ekahi nokulingwa.

Sesusi apopila ovakai ankho vekahi nokulila ati: “Vana vo Selusalei muhalilei ame. Lililei onwe muene novana venyi. Mokonda makuya ononthiki ovanthu mavakapopia okuti: ‘Ovakai vehena olutyito vena ehambu, na vana vahakutulile, no vomavele ahanyaminwe!’ Iya avakahimbika okupopila onomphunda okuti: ‘Tokelei ku onthue!’ iya ovipunda aveviti: ‘Tuhikei!’ Inkha valinga ngotyo tyina omuti utalala, iya oñgeni matyikakala tyina wamakukuta?” — Luka 23:28-31.

Sesusi ankho ukahi nokupopia ova Sundeu. Ankho vekahi ngomuti ukahi nokukukuta, mahi nkhele ankho watalala, mokonda Sesusi ukahi pokati kavo iya ova Sundeu vamwe ankho vemutavela. Putyina Sesusi amankhi iya ovalongwa vae avayekepo ongeleya yova Sundeu, ovanthu aveho velongo olio mavakala ngatyina omuti wakukuta. Ovanthu mavekeliyavela unene tyina Huku amaundapesa omafualali ova Loma opo vahanye-po ovanthu velongo olio!