Opalaisu Yapopiwa Mombimbiliya Opi Maikakala? — OMBIMBILIYOTEKA ONLINE yo Watchtower

Ovatangi Vapula . . .

Opalaisu Yapopiwa Mombimbiliya Opi Maikakala?

▪ Jesus walaele omulume umwe ankho ukahi nokunkhia wakala nekolelo, okuti: “Mokakala naame Momphangu Yombembwa.” (Lucas 23:43) Opi omulume oo makakala? Omphangu Yombembwa maikakala keulu, ine o pohi, ine okomphangu onkhuavo, kuna ovanthu vakevela okukoyeswa?

Ovakuaukulu vetu vakalele Momphangu Yombembwa. Ombimbiliya itupopila okuti: “Tupu Jeova Huku walingile otyikunino tyo Endene, koutundilo, ngamo apaka omulume alingile. . . . Iya Jeova Huku apolo omulume emupake motyikunino tyo Endene, pala okutyilima, nokutyiyunga.” (Gênesis 2:8, 15) Etyi onondaka ombo mbapitiyua melaka lio Gregu, ondaka “otyikunino” yapolwa mondaka pa·raʹdei·sos, ihangununa opalaisu ine omphangu yombembwa.

Ngetyi ovalinepi vahandyula ondyuo yavo tyina ovana vamakala ovanyingi, ovotate yetu votete navo ankho vakevelwa okuhandyula otyikunino tyo Endene, tyina ombunga yovanthu yameliyawisa. Huku wapopile okuti: ‘Yulisei oohi aiho iya ikale metumino lienyi.’—Gênesis 1:28.

Omupakeko wetu ankho uhanda ovanthu vakale nomuenyo nokukala novana pano pohi. Ñgeno ankho vakala kombanda yoohi apeho avehesukisa omalangalo. Oohi yalingwa opo ikale eumbo liovanthu aveho. Ohi ina ovipuka ovinyingi oviwa vituetela ehambu enene! Tualingwa opo tukale momphangu imwe ongwa.

Okuti ehando lia Huku liapiluluka? Au. Mokonda Jeova utupopila okuti: “Ondaka itunda momulungu wange, kamaikondoka kuaame tyehena etyi yalinga, mahi, tyotyili mailingi etyi nahanda.” (Isaías 55:11) Etyi palamba omanima 3.000 tunde etyi ovanthu valingwa, Ombimbiliya yapopia konthele “Yomuviukisi woohi una weilinga” okuti oe “katungile oohi opo mukale vala tyihena natyike.” Anthi, “weitunga opo mukale ovanthu.” (Isaías 45:18) Ehando lia Huku kaliapilulukile. Nkhele oohi maikala omphangu yombembwa.

Tyihambukiswa, okuti ononthele ononyingi Mbombimbiliya mbupopia konthele yomuenyo pano pohi. Mongeleka, eulo lia Isaia liati: “Tyotyili, mavakatunga onondyuo avakalamo, mavakatuika omiti avakalia ovinyango viatyo.” (Isaías 65:21) Opi patungwa onondyuo, nokutuikwa omiti? Opi paliwa ovinyango? O pohi. Provérbios 2:21 yahangununa nawa okuti: “Ovaviuki mavakakala kombanda yoohi.”

Tupu Jesus wapopile konthele yopalaisu pano pohi. Tyotyili, tupu walaa opalaisu keulu, mahi opala ovanthu vehehi vaholovonwa. (Lucas 12:32) Ovanthu ovo tyina vamankhi, vatutiliswa opo vaye Mopalaisu keulu okukelihonyeka na Kristu pala okutumina Opalaisu pano pohi. (Revelação 5:10; 14:1-3) Ovatumini ovo vokeulu, mavakatumina nawa Opalaisu pano pohi, monkhalelo yelikuata novitumino via Huku.

Jesus ankho utyii okuti olio ehando lia Huku pala oohi. Mokonda, oe ankho ukahi keulu etyi Tate yae alinga otyikunino tyo Endene. Omuenyo momphangu yombembwa pano pohi opala ovanthu aveho vena ekolelo mwe. (João 3:16) Jesus walaa kese umwe puovo okuti: “Mokakala naame Momphangu Yombembwa.”—Lucas 23:43.

[Olutalatu Lualandwa pefo 10]