Mondyuo Yokufendela Mo Nasalee

Mo Nasalee ovanthu ankho vahambukwa unene. Sesusi ankho okalupindelu mo Nasalee etyi eheneende ku Suau okukambatisalwa, iya pahe palamba enima. Mahi pahe ovanthu vemwii okuti omulume wokulinga ovipuka vihuvisa unene. Ovanthu vakala mo Nasalee vahanda unene okumona etyi malingi ovipuka ovio vihuvisa.

Ekevelelo liavo liliyawisa tyina Sesusi aya kondyuo yokufendela ngetyi ehole okulinga. Mondyuo omo, ovanthu velikuambela, nokutanga omikanda vya Moisesi, ngetyi ankho valinga ‘apeho mo Tyasapalo monondyuo mbokufendela.’ (Ovilinga 15:21) Tupu, ankho vatanga omikanda viovauli. Etyi Sesusi akatuka opo atange, tyafuile waimbukile ovanthu ovanyingi ankho ehole okumona omanima okualamba mondyuo omo yokufendela. Avemuavela ombuingwa yomuuli Isaiya. Avasi onondaka ankho mbupopia konthele ya Una walembulwa nononkhono mba Siovaa, hono mbuvasiwa momukanda wa Isaías 61:1, 2.

Sesusi atange oñgeni Omunthu oo ankho makayovola ononkhuatwa, nokupatula omaiho ovamphoki, tupu apopi konthele yomuvo wokankhenda ka Siovaa ankho ukahi nokuya. Iya Sesusi akondola ombuingwa komukuatesiko wo mondyuo yokufendela, apumphama. Ovanthu aveho ankho vekahi vala nokutala kwe. Konyima ahimbika okupopia, tyafuile wapopile ehimbwe, okukutikinyamo onondaka ombu mbakolela mbati: “Ovihonekwa evi namana okutanga, viafuiswapo hono.” — Luka 4:21.

Ovanthu avahuvu mokonda “yonondaka onongwa mbuhika komutima ankho mbutunda momulungu wae,” avahimbika okulipula okuti: “Ou hamona wa Suse?” Mahi mokonda Sesusi wanoñgonoka okuti ankho vahanda alinge ovipuka vihuvisa veivile, evepopila okuti: “Tyotyili ndyimupopila okuti mamukamphopia okuti: ‘Muhakuli, lihakula ove muene. Tueiva ovipuka ovinyingi walinga mo Kafalanau, tupu linga-vo vimwe muno motyilongo tyove.’” (Luka 4:22, 23) O vomunthele ya Sesusi tyafuile ankho vasoka okuti Sesusi una okuhimbika okuhakula motyilongo tyae, opo akuateseko tete ovanthu vae. Ngotyo, ankho vapondola okusoka okuti Sesusi wevetomba.

Mokonda wamona etyi ankho vasoka, Sesusi apopi ovipuka vimwe viaendele mo Isilayeli kohale. Apopi okuti pononthiki mba Eliya mo Isilayeli ankho muna ovahepe ovanyingi, mahi Eliya katuminwe komuhepe nawike pu ovo. Mahi, aende komuhepe ankho uhe mu Isilayeli ukala ko Salefaa, popepi notyilongo tyo Sindone, iya Eliya alingi ehuviso liokuavela okulia ovanthu na vahupe. (1 Reis 17:8-16) Iya pononthiki mba Eliseu, mo Isilayeli ankho muna ovanthu ovanyingi vena otyilundu, mahi omuuli wavelulile vala Naama omu Silia. — 2 Reis 5:1, 8-14.

Oñgeni ovanthu vo motyilongo tya Sesusi vakalele etyi vatehelela ongeleka Sesusi alinga, ankho ilekesa okuti vena elungavi, tupu vetupu ekolelo? Vana ankho vekahi mondyuo yokufendela avanumana unene, avakatuka, avemutuala liwa-liwa kondye yepunda-umbo. Avemutuala kondyendyi yomphunda ankho kuatungwa epunda-umbo lyo Nasalee opo vemukunyunine mombuelo. Mahi Sesusi evesoponoka, aende tyihalingilwe natyike. Pahe Sesusi aende ko Kafalanau, kokulio Kuelunga lyo Ngalileya.