Ankho Uhole Ovanthu

1, 2. Oñgeni Jesus alekesa okuti uhole unene ovanthu?

OMONA wotete wa Huku ongeleka onene younongo wavilapo wa Jeova, wakalele “omesene yovilinga” via Tate yae. Soka kehambu Jesus na Tate yae vakalele nalio “etyi valinga eulu nohi.” Povipuka aviho Tate yae alinga, evi Jesus ankho ehole vikahi “novana vovanthu.” (Provérbios 8:22-31) Enga, ankho uhole ovanthu tunde ponthyimbi.

² Konyima, Jesus walekesa ohole yae noukuatyili ku Tate yae noluembia olunene novanthu etyi atunda keulu, eya pano pohi opo akale omunthu. Jesus noluembia, walinga atyiho opo aave omuenyo wae “ngofeto pala okuyovola ovanthu ovanyingi.” (Mateus 20:28; Filipenses 2:5-8) Etyi Jesus ali pano pohi, Huku wemuavelele epondolo liokulinga omahuviso. Omahuviso oo alekesa okuti Jesus uhole unene ovanthu, netyi makalingila ovanthu apa katutu.

 3. Oityi matulilongesa monthele ei?

³ Etyi Jesus ali pano pohi, tupu ankho wivisa “onondaka onongwa Mbouhamba wa Huku.” (Lucas 4:43) Ankho utyii okuti Ouhamba mausukukisa enyina lia Tate yae nokumanako ovitateka aviho. Etyi Jesus ankho aivisa, walingile omahuviso omanyingi. Omahuviso oo alekesa esuko enene Jesus ankho ena novanthu aveho. Omokonda yatyi otyo tyakolela kuonthwe? Omokonda etyi alinga tyituavela ekevelelo nonthumbi yovipuka maviya komutwe. Pahe matulilongesa omahuviso ekuana Jesus alingile.

 4. Oityi tyamonekelepo etyi Jesus avasa omulume una otyilundu?

⁴ Mokueenda kuovilinga viae viokuivisa, Jesus waile potyilongo tyimwe tyitiwa Galileia. Mepundaumbo olio, wavasilemo omulume umwe ankho una ouvela umwe omuvi, otyilundu. (Marcos 1:39, 40) Omulume ankho wavela unene iya Luka, ankho ondotolo apopi okuti una “weyula motyilundu.” (Lucas 5:12) Ombimbiliya ipopia okuti etyi omulume oo amona Jesus “aikila konongolo emuiti okuti: ‘Tatekulu, inkha uhanda, upondola okumbelula.’” Omulume oo ankho utyii okuti Jesus una epondolo liokumuhakula, mahi ankho wesukisa okunoñgonoka inkha Jesus uhanda okumuhakula. Omokonda yatyi? Omokonda omulume oo ankho wetyiliya ova Faliseu, ankho vatomba ovanthu vokuna otyilundu. Mahi, oityi Jesus ankho asoka? Oityi Jesus ankho apondola okulinga nomulume oo ankho wavipala unene? Inkha ove, ñgeno walinga ñgeni?

 5. Oñgeni Jesus akuatesileko omunthu una otyilundu?

⁵ Tyafuile, omulume wokuavela kapopilile peulu okuti “Nasila, nasila!” ngetyi ankho tyipopia Ovitumino viapelwe Moisesi. (Levítico 13:43-46) Jesus kanumanene. Mahi, wakalele nokankhenda nomulume oo, iya ankho uhanda okumukuatesako. Onthwe katutyii nawa-nawa oityi Jesus asokele mahi tutyii oñgeni akalele. Wakalele nokankhenda nomulume oo, alingi ehuviso. Wemuyama, otyipuka tyimwe ovanthu ankho vahalingi. Nonthumbi nokankhenda, Jesus apopi okuti: “Ame nahanda!” Konyima “otyilundu atyimutundu liwa-liwa.” (Lucas 5:13) Tyotyili, Jeova waavela Jesus epondolo liokulinga ehuviso olio enene, opo alekese oluembia olunene ena novanthu.—Lucas 5:17.

 6. Oityi tyakolela momahuviso Jesus alinga, iya oityi alekesa?

⁶ Nepondolo lia Huku, Jesus ankho wafuapo opo alinge omahuviso omanene. Kahakulile vala otyilundu. Mahi tupu wahakulile ovanthu vena omauvela omakuavo. Ombimbiliya itupopila okuti ovanthu ankho vahuvile “okutala ovihitamulungu vapopia, novilema vieenda, novamphoki vatala.” (Mateus 15:31) Putyina ankho Jesus ahakula omunthu, ankho kesukisile okupola onthele imwe yomunthu ukahi nawa opo ahakule ou wavela. Jesus ankho una epondolo liokuhakula olutu luomunthu wavela. Iya ankho uhakula omunthu aveluka liwa-liwa, ovikando vimwe alo umwe wahakulile ovanthu ankho veli kokule naapa avasiwa. (João 4:46-54) Oityi onongeleka ombo mbulekesa? Mbulekesa okuti Ohamba yetu, Jesus Kristu una epondolo nehando liokumanako omauvela aeho. Tyina tulilongesa oñgeni Jesus atekulile ovanthu, tyituavela onthumbi yokuti mouye omupe “makalingila okankhenda una uhena tyae nomuhepi.” (Salmo 72:13) Mokonda tyili-tyili otyo ahanda, Jesus makahakula aveho vekahi nokumona ononkhumbi.

7, 8. Popia oityi tyaendapo etyi Jesus ehenevase omulume wavela ko Betesata.

⁷ Etyi palamba onohanyi mbehehi tunde etyi ahakula omunthu wotyilundu, Jesus atundu ko Galileia aende ko Judeia atualako okuivisa onondaka onongwa Mbouhamba wa Huku. Tyafuile kuali ovanthu ovanyingi vatehelele etyi Jesus alongesa nokulekesa ohole yae navo. Jesus tyotyili ankho uhanda okukuatesako ovanthu vahepa novokumona ononkhumbi opo vakale nekevelelo.—Isaías 61:1, 2; Lucas 4:18-21.

⁸ Mohanyi ya Nisan, Jesus walingile oungendi okuenda ko Jelusalei kotyipito tyo Pasikwa. Mepundaumbo ankho mueyula ovanthu veya kotyipito tyakolela. Kokulio kuondyuo ya Huku ankho kuna etala litiwa Betesata iya Jesus avasiko omulume umwe wehetyivili okuenda.

9, 10. (a) Omokonda yatyi ankho ovanthu vaila ketala lio Betesata? (b) Oityi Jesus alingele ketala iya otyo tyitulongesa tyi? (Tala olutalatu pefo pahimbikila onthele.)

⁹ Ovanthu vavela ankho venda noko Betesata. Omokonda yatyi? Omokonda ankho vasoka okuti vapondola okuhakulwa kehuviso inkha vanyingila metala putyina omaande ekahi nokupikita. Soka kovanthu vahangayala, vehena ekevelelo, nokuna otyiho vahanda okuhakulwa. Jesus ankho utupu onkhali, ankho kesukile okuhakulwa, iya omokonda yatyi ailako? Wayako mokonda ankho uhole ovanthu. Komphangu oyo avasiko omulume umwe wavela omanima omanyingi tyipona aa Jesus akala pano pohi.—Tanga João 5:5-9.

¹⁰ Jesus apulu omulume inkha uhanda okueenda. Soka komulume wanumana tyina apopila Jesus okuti uhanda ahakulwe mahi katyitavela mokonda petupu ou umukuatesako okumupaka metala. Jesus apopila omulume oo alinge otyipuka tyalema vali. Emupopila apolepo oula wae aende. Omulume apolopo oula wae ahimbika okuenda! Ehuviso olio otyilekeso tyetyi Jesus makalinga mouye omupe. Tupu lilekesa oluembia olunene Jesus ena novanthu. Ankho wovola ovanthu vesukisa okukuatesuako. Ongeleka ya Jesus ituavela ondundo yokutualako okuovola ovanthu vatombwa mo telitoliu yetu mokonda yovipuka ovivi vimoneka mouye muno.

11. Oñgeni Marcos 5:25-34 ilekesa okuti Jesus ankho una oluembia novanthu vavela?

¹¹ Tanga Marcos 5:25-34. Momanima 12, omukai umwe ankho una ouvela wokutunda ohonde. Ouvela oo aukalesa omapita omuenyo wae, okukutikinyamo efendelo liae. Waile konondotolo ononyingi iya amane onombongo ononyingi, mahi nongotyo ouvela wae autualako. Onthiki imwe, asoko otyipuka otyikuavo malingi, anyingila mokati kovanthu ayame komuvalo wa Jesus. (Levítico 15:19, 25) Etyi Jesus eiva okuti epondolo liae liemutunda, apulu olie wemuyama. “Nowoma nokuteketa” omukai “weya aikila konongolo ponthele yae, emupopila otyili atyiho.” Jesus ankho utyii okuti o Jeova wahakula omukai una iya nokankhenda emupopila okuti: “Mona wange ekolelo liove liekuvelukisa. Enda nombembwa veluka ouvela wove omuvi.”

12. (a) Ngetyi tuhole okulilongesa, oityi ove wii konthele ya Jesus? (b) Ongeleka patyi Jesus etuhila?

¹² Tyituhambukiswa okutala okuti Jesus ankho uhole ovanthu haunene vana vavela. Otyo tyelikalela na Satanasi, utuhindila tusoke okuti katusilivila iya petupu nawike una oluembia nonthue. Mahi, omahuviso a Jesus alekesa okuti wesuka nonthue novitateka vietu. Onthue tupandula mokonda tuna Ohamba Nomunene-nakwa una oluembia! (Hebreus 4:15) Tyipondola okupuiya okunoñgonoka oñgeni umunthu wokuavela omuvo omunyingi elitehelela, haunene inkha katunevele. Mahi soka ku Jesus. Ankho una okankhenda novanthu vavela namphila ehenevele. Onthue tupondola okulinga atyiho tuvila opo tuhetekele oluembia lwa Jesus.—1 Pedro 3:8.

13. Oityi etutilo lia Lasalu lilekesa konthele ya Jesus?

¹³ Jesus wakalele nokankhenda noluihamo luavakuavo. Mongeleka, puetyi epanga liae Lasalu ankhia, Jesus “atyimuihama unene, akeme” mokonda watala oluihamo luombunga ya Lasalu nomapanga ae. (Tanga João 11:33-36.) Namphila ankho etyi okuti upondola okututilisa Lasalu, Jesus alili. Kakalele nohonyi navakuavo. Jesus ankho uhole unene Lasalu nombunga yae mokonda yotyo aundapesa epondolo lia Huku opo atutilise Lasalu!—João 11:43, 44.

14, 15. (a) Oityi tyilekesa okuti Jeova uhanda okumanako ononkhumbi mbovanthu? (b) Oityi tulilongesila konondaka ‘mehinangelo lia Huku’?

¹⁴ Ombimbiliya ipopia okuti Jesus ukahi nga Tate yae, Jeova. (Hebreus 1:3) Ngotyo, omahuviso a Jesus alekesa okuti Jeova uhanda okumanako omauvela, noluihamo, nononkhia. Apa katutu, Jeova na Jesus mavakapindulapo ovanthu ovanyingi avakala vali nomuenyo. Jesus wapopia okuti “makuya oola aveho vekahi momalangalo mehinangelo lia Huku” mavakatutiliswa.—João 5:28, 29.

¹⁵ Jesus waundapesa ondaka “momalangalo mehinangelo lia Huku,” pala okulekesa okuti muakutikinya Huku. Huku wepondolo aliho, Wokuatunga ouye auho, upondola okuhinangela oñgeni omunthu ekahi, okukutikinyamo ovituawa viae. (Isaías 40:26) Jeova kevehinangela vala, mahi uhanda okuvehinangela. Omatutilo apopiwa mo Mbimbiliya ongeleka ongwa yetyi matyikamoneka mouye omupe.

16. Elao patyi ovaumbili ovanyingi va Huku vena?

¹⁶ Inkha tutualako nekolelo, matukala nelao liokukatala omahuviso omanene maakalingwa, okuhupiswa mononkhumbi onene! Konyima yo Armagedom, matukatala omahuviso omanyingi. Pomuvo opo ovanthu aveho mavakakala nekongoko ewa. (Isaías 33:24; 35:5, 6; Revelação 21:4) Soka okutala ovanthu vahakavala vali omaka, nokuahaendela vali ko nomphangoti, noko nomuleta, noko misikaleta viovilema, novipuka ankho vivekuatesako okuivako. Jeova utyii okuti ovanthu mavakahupa mo Armagedom mavesukisa ononkhono nekongoko mokonda mavakala novilinga ovinyingi. Mavakapilulula Ohi aikala omphangu yombembwa.—Salmo 115:16.

17, 18. (a) Omokonda yatyi Jesus alingilile omahuviso? (b) Omokonda yatyi ove una okulinga etyi tyesukisa opo ukakale mouye omupe wa Huku?

¹⁷ “Otyinyingi tyovanthu” hono vapamekwa tyina vatanga oñgeni Jesus ahakulile ovavei. (Revelação 7:9) Omahuviso oo apameka ekevelelo lietu liokuti komutwe wandyila kamatukavela vali. Tupu alekesa oñgeni Omona wa Huku wotyiveli ehole ovanthu. (João 10:11; 15:12, 13) Okankhenda okanene ka Jesus kalekesa oluembia olunene Jeova ena novaumbili vae.—João 5:19.

¹⁸ Ouye hono weyula oluihamo, nononkhumbi, nononkhia. (Romanos 8:22) Otyo tuesukisila ouye omupe wa Huku. Mouye omupe, ovanthu aveho mavakala nekongoko ewa ngetyi Huku alaa. Malaquias 4:2 ituavela ekevelelo liokuti “matukahombauka ngotyinyama tyohika,” matukakala nehambu mokonda kamakukakala vali onkhali. Tupandula unene Jeova nomilao viae viakolela vitulunda okulinga atyiho opo tukakale mouye omupe. Tyipameka okunoñgonoka okuti omahuviso a Jesus ongeleka ongwa yetyi makalingila ovanthu aveho komutwe wandyila mokueenda kuoutumini wae!