“Petupu Omunthu Unepopie Nga Una”

Sesusi nkhele ankho ukahi ko Selusalei Motyipito Tyomakaka (ine Onohinge). Ankho wahambukwa mokonda “ovanyingi vakala nekolelo mwe.” Mahi otyo ankho katyahambukisilwe ononkhalamutwe mbonongeleya. Avatumu omafualali, ankho aundapa ngatyina omakakunye ongeleya opo akakuate Sesusi. (Suau 7:31, 32) Mahi Sesusi ahaholama.

Sesusi atualako okulongesa ovanthu mo Selusalei poluhandya, ati: “Ame mandyikala vali no onwe katutu, tyina neheneende ku Una wanthuma. Onwe mamundyovola, mahi kamamumbasi, iya oku ndyikakala onwe kamupondola okuya-ko.” (Suau 7:33, 34) Ova Sundeu ankho kavetyinoñgonokele, avahimbika okulipula poyavo okuti: “Opi omulume ou ahanda okuenda, atuhemuvasi? Okuti uhanda okuenda kova Sundeu veliyandyana pokati kova Geleku, alongesa ova Geleku? Oityi mahande okupopia etyi ati: ‘Onwe mamundyovola, mahi kamamumbasi, iya oku ndyikakala onwe kamupondola okuya-ko’?” (Suau 7:35, 36) Mahi Sesusi ankho ukahi nokupopia konthele yetyi mankhi, atutila aende keulu iya onondyale mbae ankho kavapondola okuendako.

Onthiki ya pandu-vali yotyipito pahe aihiki-po. Ononthiki ambuho komuhuka, ovanakwa ankho vapola omaande Metala lyo Siloe, aveetili potyipuka tyimwe opo aende pomutala wo mondyuo ya Huku. Tyipondola opo Sesusi ahinangelese ovanthu otyituwa otyo, apopila peulu ati: “Inkha pena ou waliwa nohunga, eye ku ame anwe. Kese umwe una ekolelo mu ame, ngetyi ovihonekwa viapopia: ‘Mokati kae mamukakena omaande omuenyo.’” — Suau 7:37, 38.

Sesusi ankho ukahi nokupopia konthele yetyi matyiende novalongwa vae putyina vamalembulwa nononkhono mba Huku iya avaihanwa vakakale keulu. Okulembulwa oko ankho makulingwa konyima yononkhia mba Sesusi. Okuhimbikila menima lialandulako monthiki yo Pendekosite, omaande oo aahimbika okuenda, etyi ovalongwa va Sesusi valembulwa nononkhono mba Huku, avahimbika okuivisa otyili movanthu.

Mokupopia konthele yetyi Sesusi alongesa, vamwe avati: “Ou tyili-tyili Omuuli,” tyafuile ankho vasoka komuuli waulilwe okuti makala omunene vali ku Moisesi. Ovakuavo avati: “Ou o Kilisitu.” Mahi ovakuavo vali avati: “Okuti Kilisitu utunda ko Ngalileya? Ovihonekwa kaviapopile okuti Kilisitu matundu movatekula va Daviti, kotyilongo tyo Mbelei kepunda-umbo oku ankho Daviti akala?” —Suau 7:40-42.

Ovanthu ankho vasoka ovipuka vielikalaila. Namphila ankho vamwe vahanda okukuata Sesusi, mahi nawike wemuyamene. Etyi omafualali akondoka kononkhalamutwe mbonongeleya tyihena Sesusi, ovanene-nakwa nova Faliseu avevepulu okuti: “Omokonda yatyi muhemuetelele kuno?” Omafualali aati: “Petupu omunthu unepopie nga una.” Ononkhalamutwe mbonongeleya avanumana avevepenye iya avati: “Okuti no onwe muakembwa? Okuti pena omutumini ine hamwe omu Faliseu wakala nekolelo mwe? Ovanthu ovo kavei Ovitumino, ovanthu vokuahinganwa.” — Suau7:45-49.

Moluotyo, omu Faliseu ankho uundapa mombonge onene yova Sundeu utiwa o Nikondemu, aamena Sesusi. Ankho palamba vala omanima evali notyihupe etyi Nikondemu aile ku Sesusi kongulohi iya alekesa okuti una ekolelo mwe. Nikondemu ati: “Okuti Ovitumino vietu vikoyesa omunthu tyina ehenetehelelwe iya etyi ekahi nokulinga atyinoñgonokwa?” Opo veliamene oityi vapopia? Vemupopia okuti: “Okuti no ove umu Ngalileya? Ovolola, motale okuti petupu omuuli makatunda ko Ngalileya.” — Suau 7:51, 52.

Ovihonekwa kavipopi nawa okuti ko Ngalileya ankho makutundu omuuli. Mahi Ondaka ya Huku yapopia nawa okuti Kilisitu ankho oko matundu; yaula okuti, ko “Ngalileya yomalongo” ankho makumoneka “otyimimi otyinene.” (Isaías 9:1, 2; Mateusi 4:13-17) Tupu, ngetyi Ovihonekwa viapopile, Sesusi watyitilwa ko Mbelei iya watunda momuhoko wa Daviti. Namphila ova Faliseu ankho vei nawa otyipuka otyo, mahi tyipondola ovo ankho vekahi nokuyandyanesa omalusoke apenga konthele ya Sesusi.